Caranza free opiniom

Palavras para Matilde

2011-12-13T01:49:00.000+01:00

Que nom hai palavras para ti, di o Presidente do teu país, Nuñez Feijoo. Só lamentar o feito, di desde Madrid. Como se esta manhá fosses pola rua e umha árvore atravessara o teu último dia, como se na cama dum hospital o teu último alento jovem fosse o feche dumha longa enfermidade. Umha mulher nova, 38 anos... e nom tem palavras, só o lamento.

Mas ti mereces palavras, palavras fortes, vivas ante a tua morte. Palavras como Igualdade,como Justiça, como Liberdade, como Respecto, como Seguridade, como Tranquilidade... E mereces palavras de raiba e de impotência como Basta!, Abonda!, Nem Umha Mais!, Malditos Machistas. E o teu Presidente nom as atopa. Nom atopa a racionalidade do teu assassinato. Nom vê mais aló que um triste e inevitável sucesso.

Matilde, o teu, é um assassinato político. O teu nome vai no ronsel de muitos nomes mais. Nomes enfiados numha espiral violenta, froito dumha guerra que nom tem grandes trincheiras nem cámaras enviadas a um campo de batalha ou a umha cidade sitiada. A guerra do machismo contra os direitos das mulheres. Umha guerra de séculos, em tempos justificada por leis naturais, divinas ou humanas. Umha guerra que ante a insurreiçom das escravas, mostrasse virulenta nestes tempos. Umha guerra que, ainda que esteja oculta muitas vezes entre muros, nos patios, nas mesas ou entre cobertores, tem estrategas e cúmplices em governos, púlpitos, parlamentos, julgados, conselhos de redaçons, clubes de elites, cuarteis gerais, e, como nom! conselhos de administraçom.

Eres a última morte, mas nom a última das vitimas. Sintimo-las caminhar, respirar, falar... e também discutir, pensar, ocultar, chorar, dissimular, fingir, tremar,... Porque a guerra é triste, dura, destrutiva, abominável. Mas quero agora Matilde, dizer o teu nome enteiro, e o digo mil vezes. Matilde Vázquez Ramallal, Matilde Vázquez Ramallal... Por todas as noites que te setiches livre. Por todas as noites que caminaches tranquila. Por todos os menceres onde sonhaches e sorriches. Só podemos, ao pé do teu corpo frio, continuar caminho, nom já por ti, se nom por todas nós, por todas as que estam por vir.

Da Assembleia Nacional do BNG

2011-12-10T00:31:00.001+01:00

Nom se me poderá dizer, com este artigo de opiniom, que me estou metendo em casa alhea, ou em assuntos que nom som da minha incumbência. A Assembleia Nacional do BNG, prevista para Janeiro, implica-nos a todas as pessoas que nos sentimos nacionalistas. Nom porque o nacionalismo seja igual ao BNG, nem tampouco polo contrário. O nacionalismo como expressom social, cultural e também política, tem muitas variantes e variáveis, mas é esta assembleia de Janeiro onde se vai concentrar a maior força de decisom nacionalista organizada, que vai ter umha clara influencia ou efeito dominó, em todas as outras expressons do nacionalismo, incluído o independentismo.

Nom estou certa do resultado desta assembleia, só estou certa de que o que transcende publicamente, nos meios de comunicaçom, nas redes sociais, nalgumhas reunions, ou nas conversas privadas... é que o debate gira ao redor da questom organizativa. Isto, sendo importante, nom é, baixo o meu ponto de vista, o fundamental ou o único a reformular na organizaçom de referência do nacionalismo. Hai que falar das políticas. Das que se implementarom, e das que se tenhem que defedender e implementar. E, relacionado com essas políticas, a questom da financiaçom, espelho que nos reflicte o subconsciente ativo de qualquer organizaçom.

Se o debate se resolve polarizando-se em dous blocos, o bloco UPG e o bloco anti-UPG, pouco se resolveria dos problemas que tem o nacionalismo político, para criar referencias que consigam a necessária hegemonia social. Umha hegemonia que ostenta o Partido Popular, abrigado e camuflado desde hai muitos anos coas peles de cordeiro galeguista. Tanto dentro do bloco-UPG, como dentro do bloco crítico coas práticas organizativas deste partido dentro do BNG, existem pessoas descontentas com muitas das políticas aplicadas nas instituiçons onde se conseguiu representaçom, ou nos movimentos sociais onde atuam militantes da organizaçom. E, existem também muitas pessoas noutra posiçom, pessoas que acreditam que o BNG nom tem dado os passos necessários para se converter no PSOE galego. Pessoas que acreditam num projeto ao estilo PSC, mas nos seus melhores tempos, claro. Eis o verdadeiro debate de Janeiro, o eterno debate de se colher o caminho da esquerda ou da direita. Esse debate que tem que partir dum consenso sobre o que é hoje, às portas do 2012, o caminho da esquerda, e clarificar também, si a social democracia hoje é útil para resolver os problemas da cidadania ante um capitalismo destrutivo e insaciável. Um debate que tem que falar de obxectivos e do “como” consegui-los, com claridade, sem ambiguidades ou curtopracismos.

O affaire Reganosa, a Cidade da Cultura, a defesa do AVE, a reivindicaçom de mais cota de CO2 e a mobilizaçom a prol do carbóm importado; a defensa das planta de agrocombustíbeis, do porto deportivo de Masó, a supeditaçom ás Caixas de Aforro, a reivindicaçom na Comissom de defensa do senado dumha planta de fabricaçom de avións espias para Ourense; o mantimento das deputaçons, o ataque ao Sindicato Labrego Galego, ... som algumhas das políticas às que assistimos nos últimos anos. Agora toca decidir. Agora toca saber se hai que completar esse caminho começado, ou virar de rumo.

A situaçom econômica e social, que só está começando a despontar em Galiza, se colhemos em consideraçom as ameaças de que o PP vai cumprir ao milímetro os plans de entregar aos mercados os nossos direitos convertidos em negócio, fai que muitas das pessoas que sofrem estas políticas, que som a maioria social, queiram ver nas organizaçons, e nas instituiçons a onde vam a representa-las, as forças que os defendam dessa perda de direitos. Os últimos resultados eleitorais, podiam ter essa leitura: um aumento dos votos a EU, como organizaçom mais útil para defender-se dos poderosos e menos desafectada dum movimento social emergente, o 15-M, capaz de fazer umha crítica em profundidade, tanto à representaçom e práctica partidária como ao capitalismo, e umha nova perda do voto ao BNG como consequência do seu processo de metamorfose à socialdemocracia, caída em desgraça por obra e graça da prática do PSOE.

Som momentos de agudas contradiçons. Som momentos de novas alternativas. O poder financeiro usurpa o poder político e a soberania nacional de muitos povos na Europa. A débida econômica do BNG co novo banco nascido das práticas especulativas das antigas caixas, nom pode ser obstáculo para criar uns novos referentes políticos, que construam as alternativas necessárias para identificar claramente os caminhos elegidos. Mesmo, umha valente decisom sobre essa débida, poderia resultar clarificadora da posiçom do nacionalismo frente ao poder financeiro, e um sinceiro e claro apoio para as alternativas de economia social que existem na Galiza.

Políticas que nos defendam dos poderosos, decisons com valentia política; prática política de mobilizaçom e organizaçom de maiorias sociais, construçom e apoio de alternativas reais aos modelos económicos e energéticos... Só assim se poderá aglutinar às forças transformadoras que gravitam em distintas órbitas, ainda que afastando-se inevitavelmente de repetir rutas e experiencias políticas de elites redentoras, que ainda que recurrentes no tempo, como vivemos estes dias, devenirom fracassos na recente história do país. Abrir campos de encontro e diálogo para confluir expresións políticas e sociais que estám condeadas a entender-se, e construir essa hegemonia social que permita as grandes transformaçons no nosso país. Transformaçons cara um novo sistema econômico e social, que essa mesma hegemonia nos irá concretando na sua conformaçom.

Aguardamos muito de Janeiro.

A hora de Cristina

2011-10-12T22:53:00.001+02:00

A chamada ao 112 *, nom salvou a vida de Cristina González Sacau... Pode ser que a privatizaçom e merma deste serviço, tivesse algo a ver... Mas nom é nesses minutos de urgência na única hora na que as mulheres vítimas de violência machista se jogam a vida. Os dados do infortúnio para Cristina já foram lançados antes, na sua vida e na de centos de mulheres que moi perto de nós tenhem marcada a sua hora e o seu dia, no calendário da violência machista.

A hora de Cristina estava marcada, quando os seus gritos fixerom eco no baleiro da consciência dumha vizinhança que assegura ter ouvido o que parecia umha rifa entre ela e a sua ex-parelha.

A hora de Cristina estava marcada, quando os serviços comunitários e especializados, antes já escassos, começarom a ser recortados e inabilitados para a prevençom de situaçons de risco.

A hora de Cristina estava marcada, cando a sanidade pública, que já antes carecia de recursos suficientes para formar profissionais, desenvolver protocolos ou mesmo ampliar a abordagem de áreas fundamentais como a saúde mental, começou o seu desmantelamento.

A hora de Cristina estava marcada, cando na escola dos seus filhos, ninguém capacitou ao professorado para detectar situaçons de risco em menores.

A hora de Cristina estava marcada, cando de pequena aprendeu a renunciar aos seus direitos sonhando cum amor de filme "tua para sempre".

A hora de Cristina estava marcada, cando a sua ex-parelha aprendeu a confundir desejos com direitos, e aprendeu a amar co filme "ou minha ou de ninguém".

É hora de desprogramar os relógios da violência machista. É hora de tomar definitivamente consciência dos engranaxes que fam que a maquinária sanguenta siga funcionando. É hora do compromisso coas transformaçons que necessitam as nossas sociedades para deixar de cobrar-se miles de vidas de mulheres cada ano. É hora de abandoar um modelo de vida que gira só ao redor do valor do máximo benefício e da lei do mais forte. É hora de construirmos um outro modelo social que valorize os cuidados e teça os afetos com fios de liberdade e igualdade. O 15 de outubro, em todo o planeta, mobilizaremo-nos por um cambio no modelo econômico, social e político. Metamos também nas praças de todo o mundo, este 15 de outubro, a vontade de parar este macabro relógio.

* El País
Foto: LALO R. VILLAR | 12-10-2011 Levantamento do cadáver de Cristina González Sacau assassinada em Vigo

Onte em Ferrol

2011-09-24T08:24:00.001+02:00

Umha pequena manifestaçom, convertida num passaruas inaugurativo, recorreu onte as ruas de Ferrol. Foi o inicio do Foro Social de Ferrol Terra que vai desenvolver debates, reflexons, e horas de convívio... ao longo do sábado e o domingo. Umha pequena manifestaçom que sorprendia aos habitantes do centro da cidade com música e cunhas publicitadoras do Foro, mentres se lhes ofertava um programa de mam, que recolhia um trabalho de mais dum ano para criar esse espaço de encontro e colaboraçom. Umha pequena manifestaçom que, se bem nom foi quem de ilusionar e comprometer a movementos e colectivos mais amplos, gardou e garda no seu seio, no seu xeito de comprometer e compromisso, a ineludível rebeldia de que "um outro mundo é possível", e se nos achegamos, se nos unimos "um outro mundo é mais factível". Começa logo o Foro Social de Ferrol Terra.

Para Pablo e Raquel

2011-09-18T11:56:00.004+02:00

Chamáchedes-nos e acudimos. É a celebraçom compartida do Amor, e vimos celebrá-lo com vós, e sentimo-nos elegidos e elegidas, porque imos assistir, a um compromisso público do coidado, do alouminho..., e também da uniom do construído e do que se vai construir. E estamos aqui com alegria, porque todos estes anos fumos vendo como o nordes juntava-se co vento saudoso e húmido dum cálido sur. E é nessas misturas onde agromam os froitos mais gorentosos. E vimos como a calma dos mares onde medrava Raquel, ia, nos seus olhos azulados, asolagando os abatidos cantis dum pequeno anaco de costa Ártabra que arribou ao mar de Vigo. E reconhecemos, que o espumoso mar onde medrava Pablo, era quem de fazer agromar nos lábios de Raquel um novo mar de sorrisos. Agora querem, que algumhas dessas palavras, que se digerom nestes anos cos seus soles e os seus frios, na intimidade que dám fogons, banho e cama compartidos, podam ser ouvidas por todos e todas nós, porque nos querem, porque vos queremos. E aqui estamos para escoita-lo e para dizervo-lo. E aqui estamos, deixando por um momento as dores e frustaçons de cada dia, para compartir este anaquinho de vida que nos agasalhades, para ouvi-lo, para fala-lo, para canta-lo, para festeja-lo. Coidade do vosso Amor, coidade de Paulinho, e coidade de nós, como vindes fazendo entre brancas e corcheas, tecendo bicos.

Som os sinos da Liberdade os que repicam em Libia?

2011-08-24T13:37:00.000+02:00

Quando nas escolas de Líbia, os nenos e nenas estudem que unhas potencias estrangeiras bombardearom durante case seis meses o seu país, causando miles de mortes, apoiando com armas e mercenários à oposiçom para derrogar um governo; quando se explique que os recursos naturais, antes nacionalizados, fôrom desde aquela expoliados sem controlo por grupos de negócio pertencentes a interesses financeiros alheos, e quando se fale do empobrecimento da povoaçom que resultou desse roubo, depois de ser o país africano co maior índice de desenvolvimento humano, a nossa descendência, terá que esforçar-se para ser vista como parte da Humanidade, por essa longa lista de povos agredidos e saqueados, no nome da liberdade e da democracia.

Mas, nom seremos nós quem tenha que pedir perdom, mesmo o mundo poida que nom tenha um lugar para a nossa civilizaçom de Império, e sejamos tam só um objecto de estudo, como o som agora o império romano, ou o inca ou o austro-húngaro. Por isso, a historia dos vencidos e vencidas, a historia dos povos submetidos, carece sempre de momentos de reparaçom e perdom. Sempre é tarde, sempre é tarde para as vítimas. Ninguém poderá borrar o sofrimento polas mortes, as feridas, os exílios, causados por estes seis meses de bombardeios e intenso trafego de armas...

Estes seis meses centrárom as críticas num modelo político, o liderado por Gadafi, líder da revoluçom socialista que pujo fim à monarquia pró-ocidental, e pouco se sabia das ideias do Conselho Nacional de Transiçom. Quem nos posicionávamos radicalmente em contra da guerra, da intervençom da OTAN no conflito, ilegal e desproporcionada, tinhamos algo moi claro em quanto à categoria política dos grupos armados que estes dias tomavam Trípoli, umha oposiçom que nom tem reparo em chegar ao poder cum despregue militar imperial e hipotecando os recursos materiais (água, petróleo e gás) e financeiros do seu país.

Mas agora, um representante do Conselho Nacional de Transiçom, Magmu Jibril, até este mês de Março com responsabilidades de política econômica no regime de Gadafi e conhecido polas suas teses neoliberais, deu um discurso bastante esclarecedor dos objetivos que perseguiam, quando menos umha das partes em conflito, a restituçom das propriedades nacionalizadas que pertenciam a distintas famílias italianas e israelitas, vinculadas ao regime monárquico líbio que se instaurou por parte das potencias ganhadoras da Segunda Guerra Mundial. Umha devoluçom que se fara sem lugar a dúvidas a cámbio da liberalizaçom e privatizaçom das riquezas líbias, postas em bandeja para ser explotadas pola Uniom Europeia, USA e mesmo regímens da zona como Israel.

Eis as razons últimas da força militar imperial, autodenominada Comunidade Internacional; eis a diferencia entre o movimento opositor líbio, por muito que entre eles poida existir algum grupo pan-arabista e democrático, com críticas fundadas ao governo de Gadafi, e os movimentos populares de Egito, Argel, Tunicina ou o 15M. Em Líbia a bandeira da liberdade está movida polo vento do dinheiro; o ritmo dos cantos e das consignas está marcado polas bombas e os morteiros; as únicas assembleias som as reunions às que asistem as grandes potencias onde se vam decidindo dia trás dia, as sançons, as agresons, a destruiçom...

A operaçom militar resultou muito exitosa. Consolida-se logo como um precedente a nivel internacional. Abre-se a veda da caça de governos hostis ao Império. Umha chamada telefônica, um pequeno contrato de venda das riquezas do país, umha reuniom do Conselho de Seguridade da ONU..., e um grupo opositor pode ser posto no poder por este novo exército de liberaçom a conveniência, que é a OTAN. Quem será o seguinte? Venezuela? Bolivia? Ecuador?...

Na reportagem fotográfica feita depois da reuniom celebrada esta semana entre a ministra Carme Chacón e a ministra Trinidad Jimenez, havia moitos sorrisos. Nada adequado para avaliar umha guerra onde se está participando, matando, destruindo povoaçons e infraestruturas que nom lhes pertencem, ou é que tenhem saudade de quando Fernando O Católico conquistou Trípoli em 1510? Ou o sorriso é porque os interesses de REPSOL estám assegurados? Seria este o poder co que sonhavam estas duas mulheres socialistas, democratas, e no seu momento pacifistas? Que perverso processo pessoal anulou a sua consciência?

Quem expulsará aos mercaderes do templo?

2011-08-12T09:30:00.000+02:00

O próximo 10 de setembro, a rede galega de crentes cristians, convidada pola Asociación Irimia, subirá ao Monte Xiabre de Vilagarcía. Será um dia de festa, reivindicaçom e oraçom. É a reuniom de moitas comunidades que umha vez ao ano, desde há já trinta e quatro, celebram umha intensa comunhom coa Natureza, e o sermos humanos, no que reconhecem o divino. Umha celebraçom onde o compartilhado, obra a milagre de converter em irmaos e irmas, a quem nom o som.

Por uns segundos, dias atrás, as televisons ofereciam umhas imagens, quando menos insólitas e inquietantes, da celebraçom dos funerais polas vítimas da massacre de Noruega. Insólitas porque nelas o oficio religioso estava protagonizado por um home e umha mulher, e na roupagem e nos acenos que realizavam nesses segundos nos que as cámaras enfocárom o altar, nom se percebia hierarquia entre oficiantes. Inquietantes, para algúns desde logo, porque nom se volvérom a emitir. Eis a Igreja de Noruega, que celebra desde 1993 matrimônios entre pessoas do mesmo sexo e tem a umha mulher bispa, como presidenta da sua Conferencia Episcopal.

Umhas semanas depois da celebraçom deste funeral, e umhas antes da Romaxe que levará ao Monte Xiabre às comunidades de base cristians galegas, estamos assistindo a umha demostraçom fastuosa e provocadora dum poder eclesial que busca perpetuar a sua dorosa doctrina e organizaçom social. Umha organizaçom baseada na desigualdade, ensalçadora e reprodutora do sofrimento humano e que desfruta de privilégios e status herdados de situaçons históricas que nada tenhem a ver coa democracia.

Contabilizei até seis canles de televisom que levam anunciando o evento. Conheço o palco coas suas extraordinárias dimensons. Conheço o desenho dos douscentos confessionários que se utilizaram na “Festa do perdom”, até o menú que Rouco Varela oferecerá como anfritiom a um seleto grupo, Papa incluído, de invitados. Com cada nova, o evento vai colhendo mais e mais personalidade megalômana. Cumpre lembrar que a megalomania é um estado psicopatológico caracterizado polos delírios de grandeza, poder, riqueza ou omnipotência. Trata-se dumha obsessom compulsiva por ter o controlo, pastores sobre as ovelhas.

Ás bases católicas praticantes se lhes comunicou que elas iam ser as financiadoras do projeto, coas aportaçons que significavam o acolhimento nas suas casas, de jovens, e nom tam jovens, participantes. As canles televisivas confessionais, desinformavam a respeito do dinheiro público doado generosamente em tempos de escassez, polos governos amigos, e polos governos temerosos do poder de Roma, para assegurar esse novo sentimento vitimista, que tanto rédito lhe trae ao integrismo entre as suas bases, “aos católicos se nos persegue neste pais”, “ninguém nos dá nada”, “em nenhum país passa o que passa aqui coa viagem do Papa”, “hai que pensar que é um chefe de estado e como tal tem que ser recebido”.

Assim, mentres os nenos e as nenas em Somália agonizam nos colos das suas nais e em Líbia os bombardeios diários pretendem convertê-la na nova Gaza... Mentres os anceios de liberdade e democracia abroiam em cada praça..., um grupo de homens negadores da democracia, da igualdade e da felicidade humana, faram ostentaçom do seu poder, e das suas boas relaçons cos poderosos, e verqueram sobre nós as suas ideias opressoras sobre a vida e a morte, sobre a sexualidade, sobre a convivência e os afetos... , e utilizaram todo o seu poder para impor essas ideias ao conjunto da sociedade mediante o apoio ao projeto político que lho vem assegurando ao longo de todos estes anos desde que rematou a ditadura. E o faram abençoando às suas empresas patrocinadoras, Banco de Santander, Caja Madrid, Endesa, Fomento de Construcciones y Contratas, Movistar... Mágoa do Cristo anticlerical e radical que expulsou aos mercaderes do templo!

Zapatos rotos

2011-07-03T18:53:00.000+02:00

Nom escrevo nunca sobre o meu trabalho, é como se este jeito de espir-se em público, rompesse a intimidade necessária entre a mestra e o alunado. Se o fago agora é porque, desde os oitenta, nom volvera a ver zapatos rotos nas aulas, e sinto-me chamada a denunciá-lo, falá-lo alto para que se saiba, para que se escoite. Preciso pôr os zapatos rotos em riba de todas as mesas, de todos os despachos. Se quadrar, em riba de todas as consciências...

A escola pública, com luzes e sombras, vinha nestas últimas décadas, fazendo dalgum jeito de conversor de desigualdades. Coidava às crianças, dando-lhes de comer, guardando-as ao quente e em lugares limpos e salubres... Achegava-os a mundos às vezes inalcançáveis, coma a música, o cinema, o teatro, a literatura de qualidade, os museus... A escola era o lugar de encontro com iguais, para quem vivia longe de outras crianças, e era o lugar para aprender valores de Cooperaçom, de Ecologismo, de Paz e ultimamente também de Igualdade. A escola transmitia os nossos sinais de identidade, fazendo em muitos casos labores de recuperaçom impagáveis, com o Antroido, o Samaim e Magostos, os Maios... e também foi motor de dignidade para a nossa Língua, e saiu na defesa do país quando o chapapote salpicou as janelas das aulas... Ademais de todo isto, a escola desenvolvia um curriculum e acatava normas e decretos, que a instruírom em singraduras cheias de tormentas e rumbos incertos, mas onde a pericia colectiva da comunidade escolar, sempre mantivo o barco a flote.

A escola ía aprendendo a acolher a cada quem como era, atendendo as suas particularidades e necessidades, buscando o seu acobilho nas melhores circunstancias. Falo em passado por precauçom, porque o presente e o futuro som de zapatos rotos. No presente a escola pública, a escola com maiúsculas, vê-se na obriga de volcar as suas energias em defender-se a si mesma, como instituiçom, como serviço público de qualidade, como casa de todos e de todas, onde ninguém pode ser rechaçado ou rechaçada, onde a ninguém se lhe pode exigir mais do que tem ou do que pode dar. Até agora, quando o trabalho, os recursos que chegavam a cada casa eram escasos, a escola, a sanidade, e os serviços sociais, estavam aí, com todas as eivas que poidamos lembrar neste momento, mais estavam, e botávamos mam delas para cambiar zapatos rotos, por seguridade, saúde, afecto e alegria.

Os depredadores estám aqui, às portas das nossas escolas. Nalgumhas, como San Xoan de Filgueira, no meu concelho, o profesorado e as famílias, precisam já de guarda-las de noite e de día, porque o zarpazo quere ser mortal. Assim, com a presencia continuada dos seus próprios corpos, numhas instalaçons que deveriam estar baleiras polo merecido descanso estival, querem simbolizar a defensa do que é um bem comúm e um direito universal, precisamente numha escola onde os nenos e nenas conformam um abano de múltiples miradas, cores e cantos.

Com astucia, os depredadores vam marcando ailhadamente as suas vítimas. Por isso cumpre ver-nos como um todo, como sociedade, como povo atacado no mais fundamental dos seus direitos, e assim atuar, desde a unidade e a fortaleza que dá sentir que somos a maioria. Só assim poderemos manter o que temos e avançar no que é nosso, no que é de todas e de todos. Esses zapatos rotos deveriam ser nas nossas consciências, a cunha que nos permitira frear a nória privatizadora. Umha nória que vira e vira baleirando os direitos de moitas crianças, enxoitando as suas vidas e o seu futuro. Um futuro que volve um dia trás outro a cotizar na bolsa, e quanto mais gris e frio se volve, mais cotizam os seus activos, aumentando a voracidade insaciável dos depredadores de direitos.

Esteiro na noite

2011-06-19T12:00:00.001+02:00

A associaçom vizinhal de Esteiro, vai-lhe dar a Jose Manuel Rey Varela, novo alcalde de Ferrol do Partido Popular, a oportunidade de prender o lume da fogueira de Sam Joam. Nesta noite do solstício, prende-se lume ao velho para purificar e fazer possível o novo. É a noite onde invocamos a proteçom desse lume para que nos aparte os perigos

“Salto-che lume de Sam Joam
para que nom me trave
nem cobra nem cam”

Som muitos os afetos e cumplicidades que me unem a vários diretivos da entidade vizinhal. É por isso que sego com preocupaçom os possíveis efeitos que para este bairro, e para o conjunto da cidadania desta cidade, poida ter este acto simbólico. Vai prender o lume do Solstício, umha mam que pertence a um corpo político-econômico, que vem prendendo lume nos nossos direitos, e nom precisamente com intençons purificadoras, nem com intençons de propiciar o nascimento de algo novo. Os ataques ao ensino e à sanidade pública, a privatizaçom de serviços sociais, o recorte em gasto público, o apoio incondicional à banca, a destruçom e contaminaçom do território... é o que em Esteiro vai iniciar o ciclo anual dumha festa que sobrevive desde a orige dos tempos, numha noite onde a terra e os astros nos chamam a sentir-nos parte do que somos, uns seres vivos mais, nesta “única nave, pequena e contaminada”, que habitamos (parafraseando a Walter Martínez).

Será que ignoro eu todas às meigas que a asociaçom vicinhal tem convocadas para essa mesma noite? Será possível que esse seja o gesto preciso para conseguires cousas como umha escola infantil pública pola que o bairro leva tempo luitando?... Estará a associaçom vizinhal convencida de que é melhor somar-se à estrategia que já abraçarom com anterioridade outros colectivos, assinando um contrato de voto ao Partido Popular, para intentar frear as agressons que intuíam por parte do “matom de patio de recreo”, que com toda seguridade vai acaparar um poder case absoluto que vai mais aló da instituiçom municipal? Colectivos estes, marginalizados da nossa cidade, ainda que nom tam minoritarios como para nom ter sido tomados em conta na caríssima estrategia eleitoral do PP.

Na outra ponta da cidade, a Asociaçom Cultural A Revolta prenderá o lume como cada ano, e nom se saberá que mam iniciará o rito purificador. Tampouco se sabe se os cartos que se vam juntar vam ser destinados à causa saharaui, à loita contra a planta de gas ou à própria asociaçom para poder manter-se nestes tempos de recortes... a asembleia decidirá nestes días. Também é certo que a Asociaçom A Revolta nom tem a responsabilidade de loitar polos interesses dum bairro populoso como o de Esteiro, nem depende dela que as crianças de 0 a 3 anos tenham umha escolarizaçom pública de calidade...Som tempos difíceis onde as tebras confundem os caminhos... Por isso, quando salte o lume na fogueira da Revolta berrarei pensando na diretiva da associaçom vizinhal de Esteiro

“Salto-che lume de Sam Joam
para que nom lhes trave
nem cobra nem cam”

Gloria, pequena Gloria...

2011-05-20T01:12:00.000+02:00

Um sentimento de fracasso asulaga-nos estes dias a moitas feministas. Fracassamos. Fracassamos mais umha vez porque Gloria morreu. Fracassamos porque nom pudemos apartar da sua vida o machismo assassino. Fracassamos porque nom fomos quem de dar-lhe as coordenadas certas para navegar polos mares do enamoramento, nos rumbos do amor, dos afeitos... Fracassamos, porque nom fomos quem de conseguir que a gente que a rodeava, tivesse as ferramentas necessárias para construir os diques de contençom social para que o tsunami destrutor do machismo, nom acaba-se arrasando coa sua curta vida de dezanove anos.

Fracassamos as feministas porque umha pessoa nova, um moço de 30 anos, abraçou a possessom, a manipulaçom, os ciumes, a violência extrema, fronte à igualdade e à liberdade . Fracassamos as feministas, porque esse rapaz passou mais de 27 anos da sua vida no sistema educativo, desde Educaçom Infantil até a Universidade, e nom fomos quem de que se detecta-se essa opçom, que por força tivo que ir construindo-se desde idades moi temperás. Fracassamos porque este moço, estivo controlado na sanidade pública, primeiro em Pediatria, logo na consulta de família, e só se pudo detectar algumhas infecçons, mas nom o vírus letal do machismo.

Fracassamos porque o pequeno corpo de Gloria, pesa sobre nós coma umha lousa, e nom temos como leva-la polas ruas, nos nossos hombreiros. Nom podemos leva-la ao centro da praça, à praça onde está o debate público, o debate eleitoral, ou às praças onde gente nova coma ela debate o futuro que querem. Um debate que nom se viu salpicado nem paralisado polo sangue de Gloria, nem pola tragédia em dous actos do machismo em acçom.

Fracassamos, e nom podemos escusar-nos nen agochar-nos detrás dumhas instituiçons que botam contas e recortam em políticas de igualdade. Nom podemos esconder a nossa responsabilidade detrás de sistemas públicos ou actuaçons profissionais que faltam ao seu compromisso de aplicar protocolos ou construir espaços de prevençom da violência machista. Nom podemos minimizar o nosso fracasso detrás da irresponsabilidade dos médios de comunicaçom que seguem sem aplicar um código ético que ajude a informar e formar nunha realidade social que se cobra muitas vidas e se alimenta dumha imensa lista de vítimas. Nom podemos sinalar, sem sinalar o nosso fracasso, à Hierarquia católica por manter umha moral, um discurso e umha pratica que alimenta a misoginia , desde umha estruturas religiosas antidemocráticas onde se combate a igualdade e a liberdade. O fracasso é nosso, nom dum Partido Popular que nos leva com rumbo fixo, bem posta a mao no leme, ao maior retrocesso social das últimas décadas, remando contra a Lei de Igualdade, contra a Lei Integral contra a Violência Machista, e botando-nos as redes da Lei de Família para afogar-nos em espaços sem liberdades e direitos. É o nosso fracasso e nom podemos simplesmente olhar a umhas forças políticas de esquerda que ainda lhes custa assumir os princípios da paridade e da corresponsabilidade, e quando nom dam passos titubeantes, dam passos atrás segundo vire o vento económico-social.

É nosso este fracasso, porque as feministas todos os dias das nossas vidas coas suas noites, pensamos, atuamos, criamos...para que isto nom suceda. Por isso, quando sucede, todas nós sentimos o fracasso. Um fracasso que nos leva a remexer no mais adentro todas as nossas ideias para perguntar-nos, que estamos fazendo mal? que mais podemos fazer? ... Porque sentimos o fracasso e a dor, mas nom nos rendemos.

Lei de Familia, irmá menor, Constituiçom húngara irmá maior

2011-04-22T15:55:00.002+02:00

Quem assegura que o PP nom tem proxecto, quem fala de “nom-governo”, ou “dum governo sem rumbo”, equivoca-se e pode estar enviando à cidadania umha mensagem confusa, que nom ajuda a organizar umha boa defesa num contexto moi agressivo, onde os direitos fundamentais estám postos à venda e som questionados e violados diariamente.

O anteproxecto de “Lei de Família”, elaborado pola Xunta de Galicia, que vai ser posto a aprovaçom polo Parlamento Galego, depois das eleiçons municipais, é toda umha declaraçom programática de qual é o modelo social que nos tem preparado esta nom-maioria política, que se afixo cumha raquítica maioria parlamentária, e aspira a converter-se na maioria social, tendo para elo toda a maquinaria ao seu dispor: poder econômico, hegemonia mediática, poder legislativo (tanto na cámara galega, como, se nom ponhemos remédio, nas cámaras locais), e poder religioso.

O anteproxecto de Lei de Família, é umha volta aos episódios mais grises da nossa História contemporánea. Esta Lei nega a igualdade das distintas formas de convivência, como o matrimonio homossexual, e inventa direitos inexistentes, como os direitos do feto, para roubar direitos conquistados, exercidos e reconhecidos, entre outros, o direito ao aborto. Esta Lei nom apoia à maternidade, senom que a converte numha penitencia obrigatória, um caminho de espinas a percorrer, para ao final, entregar “o fruto do nosso ventre” a instituiçons afins. Todo um perverso ideário, que entre outros, nega o direito de todos os nenos e nenas a ser desejados.

Quem tenha dúvidas de até onde nos pode levar esta Lei, que consulte o proxecto de nova constituiçom húngara, aprovado polo Parlamento. País que preside nestes momentos a Uniom Europeia e que está sendo noticia polas acçons e actitudes racistas e xenófobas, que atentam nomeadamente contra o Povo Cigano. Todo este ódio, teria que entrar em contradiçom cos valores que supostamente se auto-outorga a hierarquia católica, e que aparecem como marco inspirador da sua nova constituiçom. Valores por outra banda, que nom podem ser considerados propriedade de nengumha confessom religiosa.

Que difícil situaçom para as pessoas que honradamente seguem o legado de Cristo “amádevos os uns aos outros...”, ”é mais difícil que um rico acade o reino dos ceos...”, ou “bem aventurados os que tenhem fame e sede de justiça...”!!! Mais bem semelha que o partido que governa Hungria e que esta imponhendo o integrismo católico na sua constituiçom, está cheio de “sepulcros branqueados”.

Esta constituiçom húngara que abre brecha na Europa e onde se inspiram os sectores do PP que promovem a Lei de Família, ademais de considerar o aborto como inconstitucional, outorga ao pai de família o direito ao voto dos filhos ou filhas menores. Igual que pretende o PP imponher o direito a decidir por parte dos progenitores, se umha nena tem que ser nai ou nom. Umha vez mais, inventam-se direitos nom existentes, como o direito ao voto na minoria de idade, para roubar ou negar direitos conquistados. Outorgará o parlamento galego o direito a exercer duas vezes o voto às mulheres gestantes? Terá o pai de família direito a votar três vezes no nome da sua filha menor e do feto em gestaçom? Chegaremos a ver ao feto participando de debates públicos?

A este esperpento de sociedade nos está levando o avance do Partido Popular na Galiza e do conservadorismo em geral na Europa, num terreio aboado, temos que reconhecê-lo, por a entrega dumha parte das forças progressistas, aos ditados do poder financeiro.

A pobreza e a marginaçom emergentes polo efeito destas políticas impostas, tenhem aguardando às estruturas católicas, e também em menor medida, doutras confesións religiosas, para volver a encher os seus templos. A caridade suplindo à solidariedade e à justiça social, umha vez que os sectores públicos de assistência social sejam depauperados e privatizados. Eis o controlo social mais perverso, o exercido polo prato de comida quente.

Neste rio revolto, aparecem iniciativas de protesta e denuncia que, intentando defender posicionamentos laicos, entram num terreio que converte em vitimas aos verdugos. Os ataques às igrejas, ou a irrupçom em espaços de culto, som ataques à liberdade religiosa que é um direito humano, e como tal deve ser respeitado.

Para visualizar ou simbolizar todas estas manifestaçons e protestas, hai edifícios vinculados à hierarquia católica, departamentos nas universidades, mesmo entidades financeiras,... que nom som lugares de culto, e que sinalam a diferença entre o que é a espiritualidade e a instituiçom patriarcal e antidemocrática que pretende imponher o seu proxecto a toda a sociedade, utilizando o seu poder econômico e os seus diferentes lobbys.

Estamos às portas de fortes convulsons sociais, nom deixemos de consultar a brúxula. É preciso nom perder o rumo e que o tsunami social nom acabe movendo os muinhos da direita para volver a proxectar a nossa vida em branco e preto.

Galiza já tem petróleo

2011-03-27T23:41:00.001+02:00

Baixo o lema "A auga fonte de creaçom", em Dezembro de 2010, celebrou-se n'A Corunha o Fórum da Auga. Unirom-se para organizar o evento, duas fundaçons que somam um grande poder económico, político e mediático, a "Fundación Agbar" e a "Fundación Santiago Rey Fernández Latorre". A segunda vinculada ao grupo de comunicaçom ao que pertence "La Voz de Galicia"; a primeira vinculada ao Grupo Abgar propriedade num 75% de SUEZ ENVIRONNEMENT, dedicada, principalmente, ao negócio de comercializaçom, distribuiçom e tratamento da auga, da corporaçom transnacional francesa GDF-Suez.

O representante dos interesses desta coorporaçom, Angel Simón, comunicou publicamente parte do resultado dum encontro que mantivo co Presidente da Xunta de Galicia, Nuñez Feijoo, conforme a empresa Agbar ía ubicar na Galiza um dos seus centros tecnológicos onde se investiga em patentes, que aumentam o poder tecnológico desta multinacional e lhe vai permitindo afazer-se coa propriedade de cada vez mais quantidade de auga em todo o planeta. O que ninguém contou foi o que Nuñez Feijoo ofereceu a esta poderosa companhia. Será todo isto fruto doutros encontros onde se concretou em que termos se redactaria a nova Lei de Augas de Galicia?

Na actualidade, Aquagest, filial desta poderosa multinacional da auga, gestiona na Galiza o seu suministro a um milhom de galegos e galegas de 60 concellos, segundo dados da própria empresa. Polo de agora a súa gestom reduzia-se ao suministro e tratamento. Coa nova Lei de Augas, a receḿ criada empresa Augas de Galicia, erigida em "proprietária" de toda a auga do país, incluída a que chove, pode chegar a acordos, fazer concessions ou mesmo ser sujeito, ela mesma, de privatizaçom por parte do Governo da Xunta, e passar a formar parte desta poderosa corporaçom que se adica a lucrar-se co que tem que ser um bem público, social e universal, um direito e nom umha mercadoria, a auga.

Perigosamente Angel Simón declarou que Galiza é o país da auga. Toda umha declaraçom! vindo do representante de Agbar que factura mais de 3.100 milhós de euros ao ano. Toda umha declaraçom que nos pom no ponto de mira da cobiça que move a este tipo de grupos económicos.

Hai tempo que se fala da guerra da auga ... Gérard Mestrallet, presidente e director geral de GDF-Suez, numha conferência celebrada o passado 16 de Março em Barcelona, apresentada por Angel Simón, afirmou que os movimentos políticos e sociais que se estám produzindo no Mediterráneo, podem abrir muitas posibilidades de inversom. Líbia tem petróleo, gas e auga, muitas reservas de auga fóssil, num dos aquíferos mais grandes do planeta.

Galiza é o país da auga, o que traduzido ás coordenadas político-económicas actuais, é como ter "petróleo azul". Nom deixemos que esta riqueza se converta na nossa desgraça. Deroguemos a Lei de Augas.

Parte de guerra

2011-03-26T14:49:00.003+01:00

A umha semana da declaraçom de guerra e entrada em acçom por parte do exército do império sobre Líbia, o parte de guerra arroja o seguinte balance:

Podem-se contar por milhares as baixas no bando democrático. Cada dia mais pessoas som vítimas da crença de que a força e a destruçom servem para arranjar os conflitos. Estas vitimas o som sobre todo polo efeito do gas deturpador que desde distintos frentes informativos se lançam contra umha povoaçom desprotegida ante a manipulaçom informativa.
Em quanto aos efetivos do bando democrático, a situaçom empeora por momentos. Umhas forças já moi debilitadas pola política de pactos e polas presions e chantagens das forças económicas imperiais, sobre todo em quanto efetivos sindicais e unidades políticas se refere, forom reduzidas ao mínimo desde os primeiros ataques. No caso do estado espanhol, a frente de defensa democrática, o parlamento, ficou só com tres efetivos em activo, pertencentes às brigadas do BNG e IU.
Às possibilidades de reorganizaçom das forças democráticas vam necessitar dum grande esforço. A umha clarisima desventaxa de médios, une-se as diferenças que emergem entre os distintos grupos condenados a um entendimento ou a umha vitoria sem resistência por parte das forças imperiais. Começa a ver-se ainda assim, uns primeiros movimentos de recuperaçom em espaços tradicionalmente dominados polas forças democráticas, como som as ruas dalgumhas cidades, que acolhem estes días mobilizaçons e protestas.
As posicións ofensivas das grandes coorporacións energéticas e da industria militar, pola sua parte, avançam sem apenas resistencia e sem que se tenha conhecemento de nengumha baixa ou danos sofridos.

Galiza 26 de Março de 2011

____________________

Imos à guerra!

2011-03-19T12:10:00.001+01:00

Nom sei moi bem a quem lhe sorria o representante chinês quando alçou a mam no Conselho de Seguridade da ONU. Nom estou certa se foi ao representante francês, ao ruso ou à representante de USA. O que sim acertei foi a interpretar o que aquele sorriso vinha a dizer. Era a brincadeira de quem até o último momento joga co ocultamento da sua carta numha partida de baralha, convertendo numha trivialidade o feito terrorífico da aprovaçom dumha guerra de intervençom, num país soberano, por parte dumha coalizom de potencias estrangeiras.

Para resolver um conflito o último que se deve fazer é avivá-lo, ampliá-lo ou agravá-lo. Eis o que vem de fazer o Conselho de Seguridade sem tam sequer avaliar o informe de situaçom realizado polos seus enviados especiais a Líbia.

Os submarinos atômicos, os porta-avions, os caças de combate, os avions pilotados por controle remoto... nom vam ajudar à estabilidade, nem proteger vidas humanas ou praticar solidariedade como tam hipocritamente manifestava a Ministra de Defesa, Carmo Chacón. As armas som para matar e a guerra para destruir.

O representante francês no Conselho de Seguridade dizia que nom se disponha de muito tempo, mesmo falava de horas para que a intervençom fosse possível. A diferença parecia estar em que o regime de Gadafi podia em horas, estabilizar a situaçom e sufocar o levantamento armado contra do seu governo. O objectivo da operaçom militar internacional queda assim totalmente espido. Pretende-se umha intervençom para desestabilizar o país, acavar coas instituiçons do estado libio e fazer-se cos recursos naturais ( petróleo, gas e sobre todo auga), ademais de cumha muito cobiçada situaçom geopolítica na fronteira com muitos países de grande interesse, entre eles Egipto, Argelia e Niger.
Comecemos logo a despedir-nos do país africano coa maior esperança de vida, ou o mais alto no índice de desenvolvemento humano do continente da hambruna, a SIDA e as guerras fracticidas e os genocidios.

Um diligente Conselho de Seguridade, ante umha revolta armada, em menos de quinze dias pom a todo um povo baixo a ameaça dumha agressom armada a escala internacional. Esse mesmo conselho de Seguridade que nom é quem de fazer cumprir nem umha soa das muitas resoluçons de condena a Israel. O mesmo artrítico Conselho que se mostrou incapaz de parar o bombardeio à povoaçom de Gaza, ou tanta morte e destruçom em Iraque, Afeganistam, Congo, Somália... O mesmo Conselho que olha para outra parte quando as tropas de Arabia Saudi, estes dias, acude ao chamado da monarquia de Barein para assassinar manifestantes, desta volta desarmados.

Seica a declaraçom de guerra no estado espanhol tinha que tê-la aprovado o Parlamento. Mais aló imos à guerra! sem que se nos consulte, e sem que poidamos valorar o calado desta decissom. Como contrasta a rapidez da intervençom coa lentitude da reacçom internacional ante o desastre de Japom!. Nom teria sido melhor mobilizar todos esses recursos armamentísticos para ajudar á povoaçom japonesa e enfriar o reator que tanto ameaça a vida por aquelas latitudes, e mandar a Libia, como propunham os países do ALBA, umha delegaçom diplomática de “boa vontade” para intermediar entre as partes? Quem será essa oposiçom líbia? Que projeto político terá para Líbia? Que interesses representa que podem mercar o veto de potencias como Rusia ou China e mobilizar a flota da OTAN em quinze dias?

As razons de Cándido e Ignacio

2011-02-03T01:29:00.001+01:00

Levo dias intentando entender as razons do pacto social assinado polos representantes de CCOO e UGT. De seguro que Cándido e Ignacio tiverom serias dúvidas, malas digestons e mesmo pesadelos que nom os deixárom dormir, ainda que fosse só um par de noites antes do 27 de Xaneiro, día no que se anunciou que havia pacto.

Eu levo dias e noites fazendo o mesmo, intentando entender o porque sucede que uns sindicatos que convocarom umha folga geral em Setembro contra a reforma laboral, que asseguravam que nom íam dar nem um passo atrás no tema das pensons... tenhem nos seus representantes umha viragem de opiniom e de acçom tam importante.

Desde logo nom me convencem as razons que dam aludindo aos benefícios do pacto, ou quando dim que poderia ser pior... a cada hora que passa convenço-me mais de que as razons na almofada, ou no banho em horas solitárias de Cándido e Ignacio forom outras.

Avaliar os resultados de nove folgas gerais em Franza e outras tantas em Grecia ajuda a afortalar sem dúbida o seu razonamento. Um razonamento que tem como esqueleto a ideia de que, vista a realidade, só se pode optar entre acomodar-se do melhor xeito possível ante os cámbios que se vam produzindo, ou começar um caminho sem volta atrás de cámbios no modelo. A desconfiança nesse caminho, e nas possíveis alianças para anda-lo lográrom o cámbio de rumbo. Um cambio de rumbo que nos sitúa mais perto do iceberg que pode acabar afundindo o Titanic social no que imos navegando por augas neo-liberais. Lembremos, que o afundimento do Titanic causou numerosas vitimas, e só se puiderom pôr a salvo quem viajava em primeira classe ou conseguiu acomodar-se dentro do reduzido número de barcos salvavidas.

Hoje, olhando a foto das suas vestiduras monocolor e a imagem de equipa triunfadora que transmitem, descobrimos que, como no filme “O show de Truman”, o que era o nosso amigo, com quem tomávamos as cervejas, forma parte do show.
_________

Estado de Alarma

2010-12-07T00:37:00.001+01:00

Os sindicatos CCOO, UGT e USO, anunciárom a convocatoria de folgas nos aeroportos de AENA para estes dias de Natal. Mariano Rajoy e José Luis Rodríguez Zapatero anunciárom que estám em disposiçom de prorrogar o estado de alarme que conlevou a militarizaçom do tránsito aéreo. Se a alguém cum mínimo de consciência tinha algumha dúvida sobre o efeito devastador que, sobre os direitos laborais, tivo e tem o conflito que mantenhem as controladoras (um número moi importante som mulheres), e controladores aéreos, e o Ministério de Fomento, nestas próximas semanas verá a cousa com mais claridade.

O linchamento mediático de todo um colectivo de trabalhadoras e trabalhadores foi possível porque o discurso monocorde nos médios de comunicaçom ia acompassado, sem fissuras. Algo disto nos temíamos quem passeávamos com preocupaçom por umhas cidades desertas que se tingírom em bicolor quando o campeonato do Mundo deu a vitoria à equipa de Espanha. Tanta sincronia nom podia agoirar nada bo.

Se bota-se-mos umha olhada hai um ano, aos comentários que se verquiam nos médios de comunicaçom contra a folga convocada polos trabalhadores e trabalhadoras do metal em Vigo, ou pola convocada no Metro de Madrid este mesmo ano, veríamos que coincidiam letra a letra, ofensa com ofensa, cos verquidos estes dias contra este colectivo. Num medio de comunicaçom como Faro de Vigo, pedia-se que se lhes bota-se a todos ao paro, que nom volvessem trabalhar em Vigo, penas de cárcere por delinquentes... Mas a maior coincidência entre estes três colectivos ( as diferenças salariais, de condiçons de trabalho... já as conhecemos), é a vulneraçom do convenio colectivo nos três casos. É dizer, os maiores conflitos dos que tenho eu consciência nos últimos tempos, nom som por melhorar as condiçons laborais e salariais das trabalhadoras e trabalhadores, senom por manter o que se tinha até o momento, o que se tinha assinado e ganhado por convênio.

No caso das controladoras e controladores, tivérom um recorte salarial do 40% no mês de Fevereiro, e três decretos mais ao longo do ano que violavam direitos laborais básicos do Estatuto dos Trabalhadores, como é a obrigaçom que se lhes impom, via decreto, de recuperar as horas de baixa por enfermidade, por permiso maternal, lactáncia, horas sindicais, ferias... Todos estes decretos, mantinham a este colectivo num alto nível de descontento e impotência, que nom puidérom expressar na folga do 29S ao impor-lhes uns serviços mínimos do 100%. A constataçom na prática de que o direito à folga nom existe para o seu colectivo, levou-nos a um abandono massivo do posto de trabalho aludindo motivos de saúde. Desse jeito tam desesperado é que este colectivo protestava pola privatizaçom de AENA, e por umha volta de torca mais nos seus direitos laborais.

Agora virá a quenda do resto dos trabalhadores e trabalhadoras de AENA. O estado de Alarme com seguridade vai fazer cambiar muitas das vontades que pretendiam defender a titularidade pública dumha empresa que nom dá perdas. A campanha mediatica está feita, criminalizaçom sindical, da resposta obreira e linchamento de quem ouse romper a monotonia do cotidiano. Essa monotonia de quem nom se questiona o que vem de arriba, só o carga sobre o seu lombo, como se dum fenómeno natural se tratase, e a seguir!

A divida contraída coas entidades financeiras, fai que o governo, veja nas privatizaçons um jeito de encher de imediato as arcas públicas, para pagar os interesses que lhe exigem os acreedores. Estes, polo visto, nunca perdem, ainda que botem um pulso co estado. O governo está disposto a dobregar-se à chantagem dos mercados e reserva as respostas ofensivas para aqueles colectivos que ousem desafiar as suas políticas de privatizaçom e recortes sociais.

Na minha cidade os trabalhadores e trabalhadoras do Souto de Leixa levam semanas loitando contra a privatizaçom do seu centro de trabalho. Em mobilizaçom permanente, intentam consciencizar à cidadania de que os serviços públicos som o melhor garante dos nossos direitos assistenciais, sanitários e educacionais. Agora eu engadiria de serviços básicos como o transporte ou a energia. Nom tenhem convênio de grandes salários, nem som elites privilegiadas dentro da empresa pública, mas ainda assim, nom parece que sejamos conscientes de que a sua loita é a nossa, que nos jogamos muito e imos perdendo.
__________

Privatizar o Outono

2010-12-05T12:23:00.002+01:00

Em quanto os dias se fixérom mais curtos, os caminhos do meu bairro começárom a encher-se de cores luminosas. Amarelos, laranjas, ocres, mesmo vermelhos, saiam-me ao passo polas ruas, polos caminhos entre os parques, no passeio à beira do mar. Um mar de gente, sobre todo crianças, apanhavam castanhas nos soutos urbanos que forom consolidando-se ao longo destes anos em distintos pontos de Caranza. Carvalhos, castinheiros, marmeleiros, ameneiros, bidueiros... e mesmo algum albedro e arces japoneses, agasalham as suas melhores cores, para que vejamos nelas a luz e o consolo que um debilitado sol, e um ceo gris, dia sim e dia também, nos negam empurrando-nos cara a tristeza dumha natureza que se apaga.

Só assim, apoiadas e apoiados na contemplaçom das cores luminosas do Outono, podemos sobreviver até a chegada do solstício de inverno onde mais umha vez, a luz volverá a ganhar o dia.

É por isso, que este ano vivim com preocupaçom este Outono que chega a súa recta final. Nesta febre neoliberal com convulsons privatizadoras, suspeito que o Outono vai ser privatizado, de jeito que só um grupo privilegiado vai ter aceso a el. O Outono nas cidades nom é rendível a olhos de quem aspira a recortar gastos e vê na nossa saúde, entendida o mais globalmente possível, algo que, ou se tira negocio de-lo ou é valorado como um lastre, algo que pom freio a um crescimento inevitável, lembremos neste ponto que os cancros, os tumores, som também um crescimento desregulado das nossas células.

O Outono nas cidades precisa de coidados. As folhas tenhem que ser recolhidas para que nom tupam as sumidoiros, e para que nom produzam acidentes sobre todo entre a gente de mais idade que desfruta dos passeios. As árvores tenhem que ser coidadas, junto a todas as zonas verdes, das que o meu bairro, por sorte, conta polo de agora, de abondo. Isso se traduz em gasto para a instituiçom municipal, afogada polos obrigados recortes que nos impom o cancro que padecemos, é dizer, o medre duns mercados desregulamentados, convertidos em tumores malignos moi activos e com grande capacidade de metástase que, ameaçam, entre outras cousas seguramente mais importantes, o desfrute colectivo da maravilha outonal. O Outono significa postos de trabalho para coidar de algo que nom se valora como produtivo, e agora coa máxima de que “quem o queira que o pague”, podemos começar a ver como se substituem por cimento, ou por espécies perenes, que nada tenhem a ver coa paisagem que precisamos para fazer com cordura esta viagem de transiçom ao inverno, os nossos parques e os nossos passeios.

Privatizaram o Outono. Numha comarca onde a invasom do eucalipto nom permite vê-lo nas fragas mais achegadas, onde um monótono e sedento verde grisalho nos acompanha todo o ano. Entom, o Outono ficará nas grandes fincas privadas. E nós iremos busca-lo detrás dos feches dessas fincas, como a grande maravilha que nos será negada. E estaremos com menos saúde, com menos alegria, e nom seremos quem de ser nós, seremos irremediavelmente gente diferente.

__________

No adeus a Martinho

2010-11-14T23:52:00.000+01:00

Assistim ao soterramento das cinzas de José Sanmartim Bouça "Martinho". Compartilhei com ele anos de militáncia na UPG, BNG, CIG... e junto com ele, figem parte dumha geraçom que partindo da experiencia traumática da reconversom industrial, e fruto do discurso político dum nascente nacionalismo que nom assumia o processo de transiçom espanhola, reivindicava o exemplo de Moncho Reboiras, e por cima de tudo tinha o desejo de ver cámbios reais de já, numha sociedade que abraçava os valores burgueses e virava às costas aos sinais de identidade da Galiza.Essa geraçom víamos no EGPGC o nosso refente político em quanto acreditávamos que nos defendia dos ataques do capitalismo e mostrava unha vontade incontestável de ser unha naçom.

Visitei com assiduidade a Martinho ao longo dos anos nos que estivo em prisom, primeiro na Corunha e logo sofrendo a política de dispersom, nos cárceres onde estivo como consequência da sua pertença ao Exercito Guerrilheiro. Para ele, converteu-se numha opçom de vida, o que foi para mim umha aprendizagem dolorosa, umha experiencia política e pessoal traumática, e me mostrou quam errada estávamos essa geraçom de jovens, e nom tam jovens, naquele caminho empreendido. A camaraderia e a amizade cambiou polos enfrontamentos pessoais, que chegarom a ser moi duros. Ele seguiu acreditando numha derrota co uso da violência, do capitalismo e o Império. Eu me afiancei no caminho da via democrática ao socialismo, na convicçom de que as guerras, as armas, a pena de morte..., devem ficar longe da acçom política e nada bo podem aportar na construçom dumha sociedade mais justa. Eis a verdadeira diferença entre os dous caminhos. Porque se poderia pensar na utopia em quanto a correlaçom de forças armadas e estruturas de poder que tem que doblegar, quem escolha o primeiro caminho, mas o caminho democrático ao socialismo, na Galiza, semelha nestes momentos igual de inalcançável. Quem é quem de conseguir aunar vontades, dar por finalizadas antigas alianças, e criar outras novas entre todos os sujeitos políticos, que estariam chamados a protagoniza-lo?

Esses sujeitos políticos, existir existem. Existem forças partidárias que acreditam no modelo socialista; existe um movimento sindical que demostrou a sua fortaleza e a sua vontade de enfrontar o neoliberalismo o passado 29S; existe um movimento labrego organizado e que conta com experiencia e alternativas para dar a batalha pola soberania alimentária; existe o movimento ecologista nas suas distintas expressons organizativas; existe o movimento feminista, plural, introduzido em diferentes sectores sociais e campos de actuaçom, junto ao movimento na defesa da identidade sexual ; hai experiencia de alternativas financieiras populares; existem expressons organizadas de espiritualidade e religiosidade non opressoras; existem plataformas de defessa dos serviços públicos, com organizaçons associadas que luitam em sectores específicos pola melhora da qualidade destes serviços; existe experiencia no papel que cumprem ante os cámbios políticos, os médios de comunicaçom monopolizadores da opiniom, fracassos acumulados no intento de contrarresta-los, e umha diversidade de iniciativas, ainda que de alcance minoritárias, de médios alternativos; existe umha rede moi ampla de organizaçons que tenhem o seu agir na defesa da Língua e a Cultura; organizaçons de defensa dos direitos civis e democráticos, incluindo os das pessoas com diversidade funcional, das pessoas migrantes...; organizaçons que reivindicam e preservam a nossa memória histórica ...

Temos os sujeitos políticos objectivamente interessados em protagonizar a construçom dum modelo socialista por vias democráticas, mas falta o lubricante que faga rodar o processo. Falta o momento da reflexom comúm que resposte a estas duas perguntas:

1ª Que modelo socialista estamos em disposiçom de compartir?

2ª Em que objectivos deixaríamos parado o nosso trem, com as contradiçons e erros que tenhamos que assumir, o tempo necessário, e cos cámbios e reajustes que se precisem, para que ninguém de esses sujeitos se apeie antes de chegar a essa hipotética meta?

Mentres os segundos e as horas deixam atrás o momento em que despedimos a Martinho no cemitério de Fene, quero ficar coa lembrança dum home que amou ao seu Povo e à sua Língua, e loitou por um mundo melhor.

_________

Golpista ecuatoriano na Galiza

2010-11-07T03:22:00.004+01:00

Quero manifestar a minha total repulsa pola presenza na Galiza do ecuatoriano Luis Villacís Maldonado, pertencente ao Movimento Popular Democrático do Ecuador (MPD), convidado pola organizaçom MCB-Capítulo Galiza, vinculada às organizacións independentistas Primeira Linha e Nós-UP, e que vai protagonizar um acto político no Centro Social "A gentalha do Pichel" da cidade de Compostela o próximo dia 11 de Novembro. Luis Villacís Maldonado apoiou o intento de golpe de estado contra o Presidente Rafael Correa do pasado 30 de Setembro. As intençons para vir ao nosso país som claras. Pretende, baixo o paraugas de forças de esquerdas, adoctrinar à gente mais nova, com inquietudes revolucionarias, em contra dos procesos transformadores que estam a levar a cabo os países do ALBA, aos quais pertence Ecuador por decissom do governo de Rafael Correa, que mantem umha posiçom claramente antimperialista e conta co apoio de amplos sectores populares da sociedade ecuatoriana como som o Partido Comunista do Ecuador, a Juventude Comunista do Ecuador, Confederaçom de Trabalhadores do Ecuador, Confederaçom de Povos e Organizaçons Campesinas Indígenas do Ecuador, Frente Unido de Mulheres e Federación Ecuatoriana de Indígenas.

Este adoutrinamento permitirá que novos intentos de derrocar as políticas antiimperialistas dos governos do ALBA, agora via golpes de estado, como o que triunfou em Honduras, nom encontrem a solidariedade internacionalista que se precisa nestes momentos onde as forças do capitalismo concentram os seus esforços em afogar qualquer alternativa que o questione.

É hora de preguntar-se quem apoia a gira europea desta pessoa, quem lhe dá acobilho na Galiza, quais som os poderes e a ideologia que sae reforçada deste agir político; que poderes estám detrás do obxectivo de derrocar ao governo de Rafael Correa?

Nestes enlaces achega-se informaçom.

http://ccb-galiza.org/

http://primeiralinha.org/home/

http://www.kaosenlared.net/noticia/hoxhistas-pcmle-mdp-complices-insurreccion-fascista-sectores-policiale-1

http://www.youtube.com/watch?v=c1sxoEnaW84&feature=related

http://www.youtube.com/watch?v=aOpf82P_j3E

http://www.youtube.com/watch?v=3dsV-jsYlw8&feature=related

Fum ao teu magosto

2010-10-24T23:27:00.002+02:00

Os passos nom me queriam levar. De feito, andei às voltas pola casa, botando mais tempo do habitual nas rutinas de levantar a mesa e recolher a cozinha. Mas sabia que a hora era chegada. Tinha que assistir à minha cita com Anita. A um ano da sua morte, a família e às pessoas mais achegadas a ela, convocavam-nos a um magosto na sua lembrança.

Um dia chuvoso, gris, ajudava a confundir o nosso estado de ánimo. Aguardavam-nos castanhas, vinho e música, mentres a dor pola sua perda, parecia suspendida no ar segundo passavam as horas. Ao entrar no Galicia de Caranza, olhei de esguelho o seu rostro fotografado num grande vinilo que nos sorria desde o ponto mais ao longe, e nom puidem soster-lhe a mirada.

Uns segundos mais tarde a conversa coa sua nai, a calor das castanhas, e tanta criança tomando o espaço, brincando, bailando, participando na música... e tantas pessoas queridas, falando-nos, contando-nos cousas, arroupando-nos... foi enchendo de conforto pouco a pouco os nossos coraçons. Os dedos da pequena Aldara faziam que sentiramos mais perto a magia da vida, e os olhos do Antón, nos lançavam ao futuro ao ir gravando-nos de mesa em mesa, de grupo em grupo, na sua memoria para sempre.

Forom valentes. Nom era doado acertar com o melhor jeito de viver este aniversário. Mas, Anita sabia-o, tinha a melhor gente com ela. Assim foi como nos curarom um pouco mais as nossas feridas; como, mais umha vez, recebemos máis do que demos.

----------

O direito à folga nom existe

2010-09-26T18:22:00.002+02:00

De manhá, de tarde ou de noite, nas ruas e nas casas, nos postos de trabalho... todo o mundo participamos ou escoitamos estes días conversaçons sobre a folga que está convocada para o próximo 29 de Setembro. Nom estou a falar das horas e horas de campanha antisindical e antifolga, desenvolvidas polos medios de comunicaçom, preocupados por umha suposta violaçom do direito a ir a trabalhar, direito que se lhe nega em todo caso a mais de 220.000 na Galiza e catro milhons e médio de pessoas todos os días no estado espanhol, e por uns serviços mínimos, que ocupam o lugar que deveriam protagonizar os agentes convocantes da folga e o debate sobre a reforma laboral e das pensons, que tanto vai marcar as nossas vidas e o nosso futuro. Tampouco me estou a referir a esses tertulianos regurgitadores, na súa maioria, do prefabricado pensamento único, senom às conversas onde se discute se se vai a apoiar à folga, como se vai a organizar o día, que se opina dos sindicatos, e que esperança hai de cambiar as cousas ... porque isso sim, todo o mundo coincidimos de que a cousa pinta mal.

Se bem é certo que o meu pulsómetro de opiniom é bem reduzido, e que só se vê ampliado polas experiencias e comentários sobre outras conversaçons escoitadas pola gente que à sua vez fala comigo, vou dar o meu testemunho sobre o que levo vivido estes dias e que se condensa numha soa frase “O DEREITO À FOLGA NOM EXISTE NA MAIORÍA DOS POSTOS DE TRABALHO”, e só, a valentia e convicçom de muitos trabalhadores e trabalhadoras vai fazer possível que o 29S podam cumprir-se minimamente os objetivos de mobilizaçom.

Os tertulianos e algumhas tertulianas, todos estes días vozeavam que se os sindicatos conseguiam parar o transporte público, a folga estaria ganhada, dando a entender que era doado acadar o seu objetivo, como dicindo “assim qualquera fai umha folga geral” , quando em realidade, o destacável é que só no sector público e tamém, ainda que em menor medida, na grande empresa que concentra um número significativo de empregados e empregadas num só centro de trabalho, com comités de empresa fortes, com anos de experiencia organizativa, os trabalhadores e trabalhadoras podem ir à folga com um mínimo de garantías. No resto de empresas, quitando honrosas excepçons, a chantagem, a coacçom, o medo ao despido e às represálias, estám instaurados no dia a dia da vida dos trabalhadores e trabalhadoras.

Este é o verdadeiro termómetro democrático da sociedade que temos neste momento. A reforma laboral, a reforma das pensons, as medidas económicas... nada disto estava nos programas eleitorais dos partidos, e menos do partido que exerce no governo espanhol. Todas estas medidas forom inspiradas e exigidas por organismos internacionais (FMI, BM, Comissom Europeia...) que nunca fôrom elegidos democraticamente e nunca pugérom baixo a soberania popular a aprovaçom das suas políticas de “reajuste estrutural”.

Se preguntamos à maioria das pessoas em idade de trabalhar se quere que se aumente a idade de jubilaçom, a resposta seria maioritariamente negativa. O mesmo sucederia se se pergunta polo modelo de despedimento, polo tipo de contrato, polo salario mínimo, pola quantia das pensons, …

Outra pergunta que aclararia muito a situaçom seria a consulta sobre a banca pública, ou em que medida tenhem que aportar ao benestar social as grandes fortunas. E como essa, outras muitas que realmente fixeram aumentar a participaçom cidadá na aprovaçom de políticas públicas que tanto influem na vida e saúde das pessoas. Porque estamos falando da diferença entre viver umha vida laboral tranquila, enfrontando só os problemas que vam xurdindo dia a dia, que nom som poucos, derivados da própria atividade laboral, e o viver como se vive agora, por umha importantíssima porcentagem da classe trabalhadora, co medo ao despido, sem esperança pola escassez de emprego e aturando humilhaçons e chantagem, unido a prolongadíssimas jornadas laborais que já está tendo um efeito devastador nesta geraçom em quanto a enfermidades, acidentes e esperança de vida ...

Todo isto se desprende das conversas destes dias “se vou à folga, o xoves me chamam à oficina e dam-me o finiquito”; “agardaremos aos piquetes, fechamos e logo volvemos a abrir, isso é o que nos mandam”; “se perdo o posto de trabalho a onde vou?”; “como aqui tenhem moi difícil que poidamos vir trabalhar, obrigarom-nos moi amavelmente a colher vacacións”... Isso é o que hai, e me ratifico NOM EXISTE O DIREITO À FOLGA.

Dos sindidatos, das suas políticas, do que temos que cambiar em todos eles, nos nossos e nos que nos som alheos... hai que falar depois do 29S, agora unidade, unidade, unidade sindical fronte ao Capital.
----------

Cigana

2010-09-25T12:45:00.001+02:00

Saudei a umha família cigana que aguardava, caída a noite, em urgências, no ambulatório de Ferrol. Chamárom à cigana máis velha, da minha idade, e mentres aguardávamos intercambiamos informaçom familiar para pôr-nos ao dia pois havia tempo que nom conversávamos. Apareceu a mulher, vestida completamente de negro, dizendo que era verdade o que ela suspeitava, tinha a tensom polas nubes. Colocárom-lhe duas pílulas debaixo da língua e mandárom-lhe aguardar. Sabiam-lhe mal, e como puído, convenceu à filha para que leva-se à mais pequena a casa. A nena tinha sono e havia que ir à escola ao día seguinte. Deu, no seu característico castelám dialectal, as indicaçons precisas. Que nom se pelee co irmao, saca-lhe ti a roupa para deitá-la, que nom a molestem ... Logo ficou soa, ao meu lado, totalmente em silenço com os seus pensamentos, apertando a boca com um pano. Pouco a pouco aquele corpo tenso começou a relaxar-se... Estás melhor? Dixem engadindo o seu nome. Ela afirmou, e começou lentamente a relatar o porque estava ali. “Já mo dixo a doutora, que che passou para vir asi? Som as preocupacións polos filhos... Desde os oito anos trabalhando... lavando a roupa que nos metíamos na auga até aqui (sinalando o vam)...logo loitando co home, fiquei viúva aos vintedous... saquei os filhos adiante...e agora querem boa ducha, boa limpeza na casa, comida... e só tenho umha paga de trescentos euros, e o meu filho, ti o conheces, como está com essa merda pom-se moi agressivo e molesta à gente ... e eu me ponho moi mal com todo isso... que já lhes digo que vaiam à marea, porque eu iria, co meu caldeirinho, mas nom podo, tenho vertigos e artrite... e é que o corpo nom aguanta mais...”

Dixérom o meu nome. Quando saim da consulta chegavam de novo a filha e a nora para recolhe-la. Saudei desexando melhoría, mas eu sabía que efectivamente aquel corpo estava rendindo-se, e ademais outra merda muito máis perigosa vai achegando-se pouco a pouco, e acavará enfermando ainda mais à sua família. Viaja desde o leste, e como umha nova peste vai avançando por Europa, mostrou já o seu rostro máis amargo em Alemanha e em Itália, agora está moi perto, na Franza de Sarkozy ... e onte, Antena 3, infectava co vírus maligno do racismo, unha sociedade que, igual que os montes que temos cheios de maleza, sem coidar, com um pequeno lume, arderá violentamente e sem remédio. E nom ponhem médios, nem orçamento, nem políticas que nos livrem del. Só para afrontá-lo, contamos co pouco de consciência, compromiso e valores de esquerda que poidam quedar em nós.
----------

Querem roubar-nos os filh@s outra vez

2010-07-12T21:19:00.006+02:00

A “Lei de apoio á família e á convivência ” que aprovou o parlamento galego, vai subvertir o espírito da “Lei de Reproducçom Sexual e Reprodutiva e da Interrupçom Voluntária do Embaraço”, que regula entre outros o direito ao aborto.

O debate nom fica já só na obxecçom de conciência na sanidade pública, ou os recursos escassos a dia de hoje, em médio do processo privatizador e recortes orçamentários dos serviços públicos. Tampouco chega com falar de se estám ou nom bem protegidos os direitos das adolescentes, mesmo que casos ficariam fora da lei e teriam que seguir buscando noutros países o que aqui se lhes nega. Nem é suficiente já falar da excessiva desconfiança sobre o raciocínio das mulheres, que tantos antecedentes históricos tivo, veja-se para exemplo, os debates sobre o direito ao voto nos distintos parlamentos ou na prensa de época. Mais umha vez se exigem três dias de reflexom, umha vez que as mulheres acodem a solicitar a prestaçom. O nosso sexo é irresponsábel e irreflexivo, é por casualidade que passamos por alí, pola consulta, para solicitar nos seja practicado um aborto.

O debate e a realidade volvem ao tempo preconstitucional, por nom dizer ao franquismo. A maioria que ostenta o PP no governo galego, impom o direito do feto, sobre o direito da mulher, dando-lhe personalidade jurídica independente. Esta lei ademais abre as portas a organizaçons como Red Madre, para receber subsídios públicos e protagonizar o espaço de informaçom e formaçom às mulheres gestantes. Labor para o que estám deslegitimadas se queremos garantir a liberdade de consciência e de eleiçom que promove o marco constitucional, que o partido que governa Galiza di defender. Como pode ser que unha organizaçom que fala de que o aborto é um assassinato, e como consecuencia, as mulheres que abortamos somos assassinas, poda formar parte na elaboraçom e contido desse sobre informativo que vam receber, sei que para favorecer a reflexom que promove a Lei do aborto, as mulheres que solicitem essa prestaçom sanitária? Onde está assegurada a liberdade para eleger das mulheres? Onde está garantida a maternidade livre e responsável?

O feminismo nom nasceu para dizer-lhe às mulheres se tenhem que ser nais ou se tenhem que abortar. O feminismo conformou-se hai dous séculos como movimento social para conseguir que as mulheres recuperaramos o direito a decidir em todos os ámbitos. As organizaçons enmarcadas dentro do que se denomina o movimento Pro-Vida, tenhem um objectivo: obrigar mediante pressom psicológica às mulheres e às nenas, mesmo tenham dez anos como já se deu o caso, a que levem a termo o seu embaraço ainda que nom o desejem, ou como no caso das nenas, ainda que seja algo tam cruel.

Falando de crueldade, a lei galega pom mais de actualidade as desapariçons e raptos de nenos e nenas de famílias republicanas por parte de organizaçons que formavam parte do sistema franquista, como o Auxilio Social ou Falange. Estes casos denunciados ante o juiz Garzon, forom investigados e documentados polo historiador Ricard Vinyes. Nos cárceres, se separava às mulheres republicanas dos seus filh@s dos que nom volviam a ter noticia. As nenas em moitas ocasions eram entregadas e recluídas nos conventos, onde acabavam por renegar da sua família. Sabe-se de casos de rapto quando estas crianças eram acolhidas por famílias republicanas exiladas. O número de crianças separadas das suas famílias ascende a 12.000 segundo um informe da própria Falange Espanhola de 1949.

Os descendentes ideológicos destas organizaçons fascistas, querem apropriar-se mais umha vez das nossas crianças. Som as que agora aprovárom coa lei galega a potenciaçom da adopçom e acolhida dos filhos paridos por aquelas mulheres e nenas, que estas organizaçons vam acompanhar tam amavelmente, até que param. Justificam todo isto argumentando que tomar umha pastilha no teu centro de saúde para interromper um embaraço de poucas semanas de gestaçom, cria mais sequelas psicológicas que gestar durante nove meses, cos seus correspondentes dias e as suas correspondentes noites; passar as horas de trabalho de parto e conseguinte recuperaçom pós-parto e entregar à criança que acava de nascer a pessoas alheas. Tudo isto dim que nom coleva nengumha marca dramática na saúde mental das nenas e mulheres gestantes.

Mais umha vez nom se permite que as mulheres vivamos a maternidade como um proxecto que forma parte da nossa vida, e como outros, deve ser livremente elegido. Converte-se mais umha vez, numha penitencia que nos acompanhe ao longo da nossa existência, onde as pantasmas dos filh@s gestados e paridos, e logo entregad@s, aumentem a caricatura de nós mesmas como malas mulheres e malas nais, vitimas, ponhamo-nos como nos ponhamos, do nosso desejo sexual, que ao fim e ao cabo, assim o patriarcado deixou-no dito nas sagradas escrituras de todas as religions monoteístas e politeistas, foi a origem dos males da Humanidade.

Essas mesmas organizaçons vam ser as encargadas de inxectar no curriculum educativo a necessária formaçom nas conciencias máis jovens para educar nos valores da maternidade, nom como algo livremente elegido, senom como o túnel do medo e terror que acompanhe sempre as relacións sexuais como umha das súas inevitábeis consecuencias, ainda que prometem levar-che ao “mundo feliz” , se te deixas acompanhar de estas santas senhoras e senhores da beneficencia.

Só numha cousa tenhem razom, as mulheres com menos recursos nom podem decidir com liberdade levar a termo a súa maternidade. Tenhem também dificuldades para aceder de jeito gratuito a umha interrupçom voluntaria. Mas nom som estas organizaçons, nem os seus representantes políticos, as que vam a garantir a estas mulheres, e as mulheres em geral, umha maternidade protegida, tampouco está nesta ideia o governo galego. As políticas de recorte dos direitos sociais, a privatizaçom dos serviços públicos, as condiçons de trabalho que se formulam desde a Comissom Europeia e os organismos internacionais como o FMI e o BM, e que alimentam os mercados de especulaçom financeira, vam no caminho contrário ao que precisamos as mulheres para ter garantidos os nossos direitos.

24 de Maio, fagamos outras contas

2010-05-25T01:31:00.006+02:00

Crianças de Gaza assassinadas polos avións de combate israelís

O debate gerado polo plano de recortes aprovado polo governo de Zapatero, e que está no centro de atençom informativa e no debate social, tinge dunha cor especial a celebraçom do Dia Internacional das Mulheres pola Paz e o Desarme. Um dia que o movimento feminista aproveita para denunciar a situaçom das mulheres que vivem baixo conflitos armados. No nosso país a Marcha Mundial das Mulheres organizou projeçons de filmes que visibilizam estas situaçons.

Mas, mais aló das análises e denúncias da situaçom das mulheres vítimas da guerra, a celebraçom deste ano está vinculada à economia. Num momento político onde em toda Europa se estam aplicando recortes sociais e de direitos, ditados polos grandes organismos financeiros, cumpre conhecer e divulgar um outro modelo económico que permita construir outra realidade, e que parta da ideia de que a guerra nom é negócio, a guerra é um crime contra a Humanidade.

Estes dias puidemos analisar como os recortes sociais nos afeitam diretamente às mulheres. Temos no sector público, o sector máis afectado, umha oferta de trabalho em pé de igualdade. Nom temos que passar o filtro dos estereotipos machistas que imperam na empresa privada. Somos umha porcentagem elevada do funcionariado, concretamente somos maioria trabalhando para a Administración General del Estado. Seremos pois afetadas pola reduçom salarial. Mais obio é o efeito que terá nas mulheres a retirada do "cheque bebe". As pensons ou os recortes na lei da dependência som medidas que quando menos, suponhem um freio nos avanços para a incorporaçom laboral das mulheres e um afundamento na feminizaçom da pobreza.

As feministas temos que unir as nossas vozes a aquelas outras que estám reivindicando um novo jeito de gestionar os recursos, o comum, o público. Agora sabemos, porque hai gente que botou as contas, que hai outro jeito de ajustar o gasto público. Um jeito que permitiria ir construindo um novo modelo socioeconómico e afastando o negocio da guerra das nossas vidas, ou dito mais corretamente, conseguindo reduzir as possibilidades de que alguém se lucre co crime da guerra.

Se se retirassem as tropas espanholas de Afganistam, conseguiria-se o mesmo aforro nos orçamentos públicos que congelando as pensons. Se se congelam os 1.400 milhos de euros previstos para investimento em armamento, poderiam ir no lugar dos 500 milhos das pensons, mais os 670 euros da reforma das prestaçons por dependência. Ademais estam as grandes compras de armamento, 10.795 milhos de euros a investir até o 2024 no aviom de combate Eurofighter, e 1.353 milhos para os 24 helicópteros de combate Tigre. Outras quantidades mais pequenas, mas que somam também, som as investidas na guerra por controlar a explotaçom dos recursos pesqueiros nas augas de Somalia. A operação Atalaya contra os "piratas", na sua primeira fase custou 53 milhos de euros, e pensa prorrogar-se até o 2011.

Todos estes recursos para destruir a vida das pessoas e do planeta deveram ser desviados para investi-los em manter a vida e os cuidados que esta precisa. Neste 24 de Maio, o dia das mulheres que queremos a paz e o desarme do planeta, dicemos que se podem fazer outras contas, umha contabilidade que garanta o básico para todas as pessoas e limite a riqueza. Tam singelo de dizer como de fazer. Querer é poder.
----------

A realidade supera a ficçom

2010-05-12T00:48:00.007+02:00

Se alguém nos dixera hai uns meses, que um aviom com motores avariados por umha nuvem de cinza volcánica, poderia precipitar-se sobre a planta regasificadora de Mugardos, tomariamo-lo como tolerias dumha pessoa trastornada ou de muita imaginaçom. Mas a dia de hoje, os aeroportos fechados, voos cancelados e umha vigilancia constante dessa nuvem de cinzas que nom acouga, forma parte da nossa realidade.

Umha das cousas que aprendim desde que me interesso polo funcionamento das plantas regasificadoras, é que a probabilidade de acidentee nunca é cero. Pode ser mais alta ou mais baixa, mas nunca é cero. Eis o porque das leis e normas de seguridade. Eis o porque, essas próprias leis e normas cambiam umha e outra vez, sacando aprendizagens, muitas vezes doorosas e trágicas dos acidentes. Também sei que o primeiro inimigo destas normas é o máximo benefício. As normas de seguridade levam acarreado custes, relentizam cos seus protocolos a produçom... mas salvam vidas.

Nestes dias um incêndio em Forestal do Atlántico puido provocar o temido efeito dominó, pois sucedeu ao tempo que descargava um gaseiro. É umha dessas coincidências que quem promoveu e permitiu que Reganosa seja umha realidade na Ria, nom tivo em conta.

Som muitas sinais em pouco tempo. Estamos jogando a umha roleta rusa, co cálculo de probabilidades, porcentagens e estatísticas. Cada nova incidência, cada novo sinal no triángulo mortal mugardés (Forestal, Imegasa, Reganosa) som oportunidades perdidas para tomar decissons que podam salvar-nos a vida, librar-nos a nós e a nossa gente querida da tragédia.

Loitar em tempos revoltos

2010-05-06T00:37:00.002+02:00

Umha situaçom de confusom geralizada semelha estar consolidando-se nos últimos meses na nossa sociedade. Pouco a pouco o medo e a incerteza sobre todo relacionados coa situaçom laboral, vam atacando a resistência que freava o pessimismo, e vai-se assentando a depressom colectiva e a desconfiança. Unha depressom que hai umhas décadas viveramos já na comarca de Ferrol Terra, depois de que a loita contra a reconversom dos estaleiros, acabara em derrota psico-social. Umha depressom colectiva que nom curou, só se paliou cumha perda de populaçom que converteu à comarca e nomeadamente à cidade de Ferrol, num lugar envelhecido e mesmo condenado ao esgotamento político e social. E assim medrou também a gente nova de Ferrol nestes anos, escoitando e reconhecendo-se numha melodia que dizia que este era um sitio de derrotas, mas que havia que ficar aqui. Desobedecendo o mandato, muitos e muitas acabárom marchando.

Os fenómenos meteorológicos e geológicos, estám ajudando a aprofundar na impressom de que imos cara a um abismo. A informaçom sobre fenómenos naturais, ocupa agora um espaço importante dos informativos, como tem que ser. Mas sempre sem analisar, que parte hai de natural, e que parte poderia ter-se evitado, das desgraças que acompanham estes fenómenos, como em Haiti, Madeira, Chile, Turquia. China, Islándia... A nós já nos tocou algo. Nos últimos tempos, vivemos o dramatismo do Klaus, e paralisou-nos o medo ao Xhintia. Com o Klaus sentimos a incomprensom de quem a poucos quilómetros nom sofriam as suas consequências. Com o Xhintia a incomprensom puxemo-la nós, mas que aprendemos?

A vida chama todos os días à porta e hai que ir trabalhar, ou buscar emprego, estudar, atender as necessidades diárias, estar pendente das pessoas queridas e mesmo acudir a umha que outra actividade social. Mas a vida nom está a fluir com normalidade. A nossa respiraçom colectiva é cortada e agitada. Nom sabemos cara onde vai o mundo, e como nom sucedia desde havia muito tempo, agora nom sabemos o que vai ser de nós a um ou dous anos vista. Case todo o mundo sinte que antes ou depois, a terra que pisa vai começar a se mover, também no senso literal. As vozes da direita aproveitam a incerteza para lembrar-nos o bem que vive o povo sem vontade, sem ter que pensar e decidir, o bem que se vive se te tutelam. Assim declaram as bonanças do passado. Todo, dim, deveria volver ao de antes, ao branco e gris da época onde se marcava até a rúa pola que deverías andar moceando, e o longo da saia, definia a altura moral da mulher que a portava. Nom havia nada que aguardar, nada que pensar, nem um sobressalto ía romper a triste monotonia dos cantos litúrgicos ou da tabla de multiplicar. Cada quem sabia o seu lugar e o que tinha que fazer.

As vozes da esquerda pola sua parte, estám enfeitizadas polos cantos das sereias. O discurso de que a culpa de que nom saiamos da crise é dos sindicatos, porque nom dam entrado na reforma laboral que se precisa, ganha adessons. Puidemos escoitar na Cadena Ser o sábado 1º de Maio, como se defendia a congelaçom dos salários do funcionariado entre os contertulios e ninguém punha o contraponto. O mesmo passou quando se falou da jubilaçom aos 67 ou doutras medidas de recorte de direitos laborais. Umha e outra vez repetiam que os sindicatos tinham a culpa, porque nom sabiam explicar-lhe bem aos trabalhado@s todas estas medidas modernizadoras e preventivas para que o sistema nom creve.

Alguns sindicatos estám na negociaçom dumha reforma laboral. Acudem a essa negociaçom numha posiçpm de debilidade. Nas poucas declaraçons públicas que permitem escuitar os monopólios da informaçom, transmitem o síndrome da vítima de maltrato “vou calar para que nom se enfureça”, assim levam as negociaçons, sem luz nem taquígrafos, dando vantagem aos especuladores, que pretendem sacar o máximo beneficio desta crise.

É verdade, os sindicatos nom estám explicando bem as cousas. Nos discursos deste 1º de Maio, nom se explicou o que está a passar em Grécia, ou as consequências negativas dos informes das agencias de rating, como Standard & Poor's. Por certo, interei-me ainda estes días que só hai tres no mundo, duas norte-americanas e umha inglesa, mas que tenhem o poder de baixar ou elevar, segundo os seus informes, os juros da débida pública dos estados. Os sindicatos nom mobilizarom para que se acabe com esse oligopólio e se criem agencias públicas, como também deveria criar-se banca pública, e emprego público. E mentres nom chegamos a estes objectivos, os sindicatos deveriam marcar no dia a dia da classe trabalhadora que realidade alternativa podemos construir desde já. Tendo em conta a frase que iluminou o reagir do Feminismo na década dos setenta “O Privado é Político”, os sindicatos, como movimento social transformador, deveriam dar alternativas para o cotidiano, por exemplo, que fazer coas hipotecas ou os alugueres, onde meter os aforros, como mercar para debilitar o poder das multinacionais, que cultura consumir para fortalecer a ideologia de classe e cargar-nos de argumentos fronte ao capitalismo que ameaça com deglutir-nos a nós e ao planeta, que como bem ensinam em Bolivia, todo é a mesma cousa.

Mas, a gente que conformamos os sindicatos, que estamos nos centros de trabalho, que ponhemos dirigentes ou os sacamos, ou todo o contrário, estamos em disposiçom transformadora ou simplesmente aprendimos um discurso e apoiamos um modelo social, que nos permite seguir agarrando umha parte do pastel mentres milhos tenhem só as faragulhas? Em Grécia, a unidade sindical convoca a folga geral. Só estamos em disposiçom de aparcar o que nos separa quando vemos o tsunami arrasando-nos? Nom podemos tecer redes de uniom que nos amparem antes?

Mentres, os donos da tarta, querem aproveitar-se de que imos subindo a escaleira coa luz apagada, às apalpadas. A confusom das palavras nos discursos que explicam a crise económica, que falam dos problemas sociais, que alarmam sobre os cámbios no clima, som como guedelhos que se liam nos nossos pés e convertem em mais torpes aqueles passos que imos dando para superar cada escano. Imos virando às costas a quem nos representou no seu día e hoje, nos traspasa co seu discurso, sem provocar em nós nem umha pequena emoçom. Tampouco somos quem de pôr nomes e apelidos a quem montou este barulho. Deveríamos pechar-lhes as nossas casas, os nossos coraçons e as nossas vidas. Rechaçar o seu mercado, os seus empréstimos, o cacho de paraíso que nos querem vender. Fazê-los avergonhar nos seus despachos, nos seus clubes privados, nas portas dos seus templos. Queremos e devemos conhecer e sinalar aos seus representantes nos assentos dos seus escanos, nas redacçons dos seus diários ou nos tribunais onde ditam sentência.

Som os usurpadores de direitos. Som os sanguesugas do trabalho alheo. Som os ludópatas do casino-planeta. Intentarám apertar para que trabalhemos mais, descansemos menos, para que morramos antes, para que nom haja ninguém que nos coide quando o precisemos, para que sobrevivamos entre o lixo que vam produzindo e estrando. E sobre todo, faram o impossível para que nom saibamos, que nom comprendamos o que estám a fazer, e nom saibamos que hai outro jeito de viver sem eles. Por que Grécia tem que vender as súas ilhas? Quem pode mercalas? Para que? Por que se limita o salário mínimo, as penssons, a idade de jubilaçom, o tempo de subsídio e nom se limita a riqueza? Nom é esta umha pergunta sinxela? Pois logo, terá doada resposta.
----------

A guerra dos corpos

2010-04-27T22:16:00.004+02:00

Artigo publicado na revista "Atenea" do mes de Março, editada polo Ateneo Ferrolán.
Escoitamos falar da guerra que se livra polo controlo dos recursos energéticos, a mais descarnadamente directa, que bombardeia, assassina, destrue países inteiros. Escoitamos também a diário, falar da guerra contra o terrorismo, que é a bandeira que se ondeia como escusa para desatar essas guerras de destrucçom. Mas também sabemos da que se livra polo controlo do espaço. Os satélites amoream-se porque também formam parte da guerra polo controlo da informaçom. A guerra tecnológica tem na espionagem e sabotagens, as suas melhores armas, fronte aos primeiros brotes de tecnologia conseguida baixo sistemas de criaçom livre e colectiva. Mas a guerra que se livra no corpo das mulheres, só se visibiliza nalgumha das suas expressons, e nom se analisa como um todo global que persegue, o mesmo que no caso da energia, e os recursos naturais, o controlo da potencialidade do corpo e a mente das mulheres, e o poder simbólico que ao longo dos tempos jogou para manter os poderes religiosos, políticos ou de supremacia dumhas culturas sobre outras.

A guerra nos corpos das mulheres tem umha das batalhas mais virulentas no controlo da sua capacidade reprodutora. O aborto voluntário é o cabalo de batalha dos poderes religiosos das distintas confessons, e tem no conservadorismo político o seu maior aliado. Vai associado a outros objectivos como som a capacidade de controlo por parte das mulheres da maternidade, e a potencialidade sexual e em geral, de autodeterminaçom das mulheres, extendida a todos os aspectos e momentos da sua vida. Atinge a todas as mulheres e todas som vítimas ou de criminalizaçom e repúdio social, ou de condenar-se de por vida a umha existência ajustada a normas morais que sacralizam a desigualdade, a dor e a abnegaçom de obrigado cumprimento, nom de livre eleiçom.

Esta batalha, que tivo umha primeira parte, exitosa para as mulheres em quanto abriu novos espaços de direito, na década dos setenta do século passado, revive agora em todo o planeta, também na Europa do século XXI. As mulheres que temos abortado voluntariamente, somos acusadas de assassinato desde os púlpitos, e desde os médios de comunicaçom que, faltando ao código deontológico mais básico, fam de altifalantes da Conferencia Episcopal sem, salvo contadas excepçons, colocar quando menos, ao mesmo nível a argumentaçom e a presença das defensoras dum direito fundamental como é a soberania do próprio corpo. E todo isso sem que essas acusaçons diárias de assassinato, tenham nengumha conseqüência. Só umha conjuntura política que mantém em certas estruturas do poder político a feministas, novas e velhas, falo da Ministra de Igualdade, mas também das suas assessoras, fam possível que se avance nos direitos das mulheres e das moças. Umha conjuntura que pode virar em qualquer momento.

Ainda desde sectores progressistas, como se dumha purgaçom de culpa se trata-se, dramatiza-se o aborto, falando dumha decissom difícil, de um trago amargo ao que as mulheres se tenhem que agarrar como última opçom, quando um aborto, nas primeiras semanas de gestaçom, que é no que se realizam a imensa maioria, poderia ser umha intervençom de ambulatório, sem mais trascendência. O que é um trago amargo é passar por abortos clandestinos onde as mulheres que nom perdem a vida, podem ficar com lessons para sempre. É um direito traer umha criança desejada a este mundo, e também é um direito vir a este mundo como um ser desejado, porque alguém quere dar-che a vida e comprometer-se contigo para sempre.

A ofensiva nom é exclusiva da hierarquia católica espanhola, nem sequer da hierarquia católica assentada no Estado do Vaticano. O integrismo religioso, evangelista, islámico, budista, judeu, batalha polo poder no útero das mulheres. Somos expulsadas do nosso próprio corpo, para viver para sempre baixo um poder alheo. Em EEUU mesmo se assassina a médicos que praticam abortos. Em Polónia, onde o aborto é ilegal e só se permite nuns supostos moi restritivos, umha campanha associa nestes dias, nas vaias publicitárias, o aborto com Hitler, pretendendo concienciar à povoaçom da necessidade da ilegalizaçom total. Em Nicarágua, depois de ter conseguido a lei mais avançada em América latina, no século passado, baixo o governo Sandinista, fortemente tutelado pola hierarquia católica, aprovou-se a proibiçom total. E assim em todo o planeta, alzan-se vozes em defessa dum “código genético que pode chegar a ser pessoa”, presente já no momento da fecundaçom do óvulo, mentres a Injustiça e a Desigualdade, seguem devorando seres vivos, arrincando do colo das suas nais a seres indefensos ante a guerra, a fame e a pobreza.

Outra fronte de batalha é a que condena às mulheres a ser as portadoras do símbolo cultural dos povos. As mulheres portamos a esência da cultura ou da religiom, seja nos costumes associados a momentos importantes da nossa existência, nascimento, morte, emparelhamento ... ou no nosso jeito de mostrar-nos ao mundo, bem na vestimenta ou no espaço que ocupamos, ou na nossa linguagem corporal. Muitos países que tinham esquecido o uso do velo nas mulheres, recuperam assim este costume para marcar umha diferença cultural e religiosa, em oposiçom aos símbolos ocidentais de permissividade na vestimenta das mulheres. A resistência ao Império, que invade e usurpa os seus territórios e recursos, com cruentas guerras, é expulsado do corpo das mulheres , onde se instala a esência do islamismo cultural e político, e também da identidade diferenciada das mulheres fronte a identidade das mulheres que vivem baixo os desígnios das normas imperiais.

Também, o Império, baixo a desculpa de liberar o território do corpo das mulheres, dos seus velos de opressom, justifica guerras como a de Afganistam, com extensons nom tam directas, mas sim igualmente devastadoras em Paquistam, Bangladês, Iemem, ou o mesmo Iram. Cada medida repressora ou limitadora em ocidente do uso da vestimenta simbólica, nom vai conseguir o efeito libertador que presumivelmente se persegue. Antes bem, cargara-se mais de simbolismo na medida que seja foco de atençom nas sociedades dominantes. Sociedades que, co seu poder político, militar e económico fixérom emerger, fronte a movimentos laicos e democráticos, um forte sentimento identitário que vê nos integrismos religiosos, umha resposta às agressons que padecem constantemente.

As mulheres em ocidente sofremos os nossos bombardeios mediáticos para que nos esforcemos para dar a medida do corsé que estigmatiça as enrugas, as canas, passar dos centímetros e quilos estipulados, ou ficar curta. O êxito das operaçons estéticas, a todas as idades e em todos os sectores sociais, com algumha diferencia marcada sobre todo polo poder aquisitivo, visibiliza esses outros velos, nom impostos por hierarquias religiosas ou políticas, mas sim por um patriarcado que segue a ter a vara de medir o corpo das mulheres, e a maneja, neste caso, ao ritmo que precise o mercado. Operaçons de peitos, de lábios, de nariz, liposuçons, reconstruçom de himens e na última fornada, operaçons de reducçom dos lábios da vulva.

Neste ambiente belicista, a prostituçom é a nai de todas as batalhas no corpo das mulheres. O importante nesta batalha nom é se as mulheres optam voluntariamente ou nom, a vender uns serviços sexuais, poderíamos entóm pôr fim a esta guerra simplesmente perseguindo um delito de rapto e escravitude laboral. Tampouco se trata de se com essa actividade se lucram proxenetas, ou as conexons destas redes co tráfico de armas ou estupefacientes. Sabemos de delitos contra a Humanidade de grandes Coorporaçons Económicas, ou mesmo o que supom a fabricaçom e venda de armamento. A prostituiçom, forçada ou nom, simboliza o domínio, mediante compra, dos corpos das mulheres, o afianzamento dumha sexualidade, que deita no mesmo leito a satisfacçom e livre decissom das partes (suponhendo que estas existam), coas leis do mercado, e um modelo sexual alienado coa opresom. Eis a iniciaçom sexual de miles de moços no nosso tempo. Analfabetos nas relaçons afectivo-sexuais que afiançam estereótipos machistas nos prostíbulos, onde triunfa a sua masculinidade no espelhismo do cerco e conquista facilitado polos euros.

Este ano lembramos o centenário da celebraçom do 8 de Março, como umha data de reivindicaçom dos direitos das mulheres. Volvíamos umha vez mais a vista atrás, para admirar ainda mais as loitas das mulheres sufragistas. A sua batalha foi polo direito ao voto. Por conseguir o que os nossos companheiros revolucionários franceses nos negárom na constituiçom da Primeira Repúbica de 1792. Se pensamos na batalha desatada no corpo das mulheres, temos que respirar profundamente e ser conscientes dos retos que temos por diante para conseguir a soberania sobre os nossos corpos. O feminismo que pretende transformaçons sociais de tanto calado, longe de ter conseguido avanços importantíssimos, semelha que como umha criança, só começou a dar os primeiros passos.

Contra o fascismo sem fisuras

2010-04-25T02:05:00.003+02:00

Acudim hoje à concentraçom convocada por umha dúzia de organizaçons baixo o lema "Pola Xustiza Universal, contra a impunidade do franquismo". Umhas mil pessoas acudírom a esta convocatória, mas eu sabia, e me doíam, as muitas ausências. O meu sindicato, CIG, e outras pessoas situadas ideologicamente à esquerda, nom acudirom, mesmo se desligárom publicamente da mesma. A figura do juíz Baltasar Garzón, prevalecia sobre outros argumentos à hora de fazê-lo. Pesou-lhes mais a imagem que da convocatória faziam os médios de comunicaçom, que repetiam e repetem que foi umha mobilizaçom em apoio ao juiz Garzón, que os comunicados emitidos polas organizaçons convocantes, antes, ou lidos nas distintas concentraçons. Pesou mais essa figura trajeada entrando e saíndo da Audiência Nacional, que os lemas das faixas que encabeçavam as distintas manifestaçons organizadas nesta jornada, dentro e fora do Estado Espanhol. A cegueira política e ética, confundiu-nos. O pulso nom se dá por saber si Garzón é condenado ou nom a avandoar a magistratura, se é culpável de prevaricaçom ou nom. Aqui do que se trata é de se os crimes do fascismo podem ser julgados ou nom.

"VERDADE, XUSTIZA E REPARACIÓN", esse foi o lema da faixa que em Ferrol, encabeçou a concentraçom da Praça de Armas. Umha faixa que as pessoas que trabalham a prol da recuperaçom da Memória Histórica, cederom para que protagonizaram o acto a familiares das vítimas da ditadura franquista em Ferrol. Alí estavam para lembrar-nos o longo caminho andado em soidade durante todos estes anos. Alí estavam para lembrar-nos que ainda hoje é um caminho proibido, silenciado, penalizado... Alí estavam para demostrar-nos que o monstruo se levanta cada vez que escoita os seus passos, as suas vozes, que sente a sua sede de justiça. Por isso, hoje, nom se lhes podia deixar sós. Porque pese ao que representa para muitos e muitas de nós a figura do juiz Garzón, ante o fascismo nom pode haver fissuras.

Quando vim o filme "El laberinto del Fauno", reconhecim as cores de muitas das passagens da minha infáncia. De nena nom entendia muitas cousas, mas havia pessoas como o avó dos meus curmáns, ou o padrinho dumha das minhas irmás, que sabia que tinham algo que os diferenciava dos demais. Andando o tempo da minha vida, enterei-me que á avoa da minha curmá, na casa onde celebráramos muitos anos o seu aniversário, no bairro de Canido, vinheram-lhe buscar ao home para matá-lo e deixaram-na soa com seis filh@s. Ela me mira ainda agora, desde as fotografias que conservo desses anos cumha imensa tristeza. Como se esse fosse o único xeito que se poidera permitir de rebeldia. Alí aparece, entre os rostros sorrintes pola festa, a sua abrumadora e interrogante tristeza. Logo conhecim à família de Amada García, e hai moi poucos anos descubrim que à nena que compartilhava comigo muitas horas de instituto, fuzilaram-lhe o avó, Mendiguchía Real. Escoitei-na reivindicar firme e afectuosamente a sua memória, num acto no peirao de Ferrol na visita do barco Idra. Comprendim que quando representávamos no instituto a obra "O Pequeno Príncipe" de Antoine de Saint-Exupéry, ela já conhecia que significava a palavra Liberdade.
__________

Em Ferrol, como em Vigo, manifestaremo-nos em defensa da nossa saúde.

2010-04-08T23:08:00.004+02:00

O próximo domingo dia 11, às 12 do meio-dia, desde o ambulatório do centro de Ferrol, sairemos em manifestaçom defendendo a sanidade pública, proclamando a saúde como um direito, mostrando a nossa oposiçom a convertê-la num negócio. Todo isto diremos-lho a Feijóo e ao seu governo, responsáveis diretos destas políticas que perseguem tirar negócio dos serviços públicos, criados para garantir ao conjunto da populaçom os seus direitos básicos.

Imos colher o relevo da cidadania que o 25 de Março, encheu coa mesma vontade as ruas da cidade de Vigo. Desde alí venhem informaçons que falam de actuaçons dos actuais responsáveis políticos para apropriar-se de conquistas sociais que garantem a cobertura universal da atençom sanitária, para entregar-lhas aos seus amigos mercaderes das grandes corporacións. A saúde, as pensons, a educaçom, os serviços sociais ... som vistos como grandes ocassons de negócio, umha ingente quantidade de recursos económicos, que hai que retirar do controlo público para ser colocados nas ambiciosas mans dos seus negócios. Só assim se explica, como um hospital projetado para Vigo por valor de 300 milhos de euros, pasará a custar 1000 milhos ao privatizar a sua construçom e gestom. Setecentos milhos que sairám das arcas públicas para engordar benefícios privados e precarizar o trabalho do pessoal sanitário e diminuir a qualidade da assistência.

Por desgraça nom é o único. A ameaça do sistema de copago, a reduçom de pessoal, o pago de medicamentos ... está presente nos projetos da Conselharia de Sanidade, onde a secta Opus Dei ocupa importantes postos de decissom. Esta secta actua coerentemente, pois tem a crença de que as nossas enfermidades e sofrimentos, nom som algo a combater e erradicar, senom que som provas que Deus nos pom para ser merecentes da sua eternidade. Esta secta anima a oferecer os sofrimentos das pessoas enfermas a um deus, que as aceita como demostraçom de amor incondicional, de despreço pola vida na Terra e desejo de estar com ele no Ceu. Toda esta perversom e utilizaçom ao redor do sofrimento humano derivado da falta de saúde, junta-se a umha búsqueda enfermiça do poder político e económico por médios nada transparentes nem democráticos.

O domingo 11 sairemos polas ruas de Ferrol para dizer que a saúde nom é um negócio, é um direito.
Umha grande mobilizaçom cidadá pode fazer de freio a esta loucura privatizadora e concienciar à cidadania na necessidade de afastar dos centros de poder a quem nom esté em disposiçom de garantir coas suas políticas os nossos direitos fundamentais.

Lei de Estrangeria para a nossa Língua

2010-03-14T23:24:00.006+01:00

Já está aí. Chegou o que temíamos. Por decreto, o Galego vai ter a categoria de Língua Estrangeira no ensino. O ódio ao galego está instalado em Sam Caetano. Mas quem inspira todos estes ataques? Por quem estamos governados? Hai uns dias nas tertúlias da manha da Radio galega, escoitavamos dizer ao jornalista Roberto Blanco Valdés que já lhe diziam a Feijoo que o tempo corria contra del, que tinham que governar e levar adiante o decreto, e a quem nom lhe gostasse que roera, que para isso ganharam as eleiçons. E já vemos que lhe fixo caso, mas em que foro, em que estrutura se reúnem estes senhores? Noutra ocasom, no antigo programa "Hai debate", o mesmo no que outro jornalista, Carlos Luis Rodríguez, afirmava que "o galego já nom é a Língua própria da Galiza", Roberto Blanco Valdés também fazia referência a algum tipo de reuniom com frases como "nós já o dixemos" ou "nós já o temos falado", sem que ninguém dos presentes no plató tivesse o reflexo de perguntar-lhe por quem som "nós". Assim, seguimos sem saber quem nos governa. Por um lado sabemos que a seita Opus Dei tem colocados vários numerários e numerárias nas Conselharias. Mas, Roberto nom semelha tal, e Feijoo tampouco, polo que temos que pensar que hai outro governo paralelo noutra parte. Se tivessem o sentido democrático da transparência nolo diriam. O que estou certa, é que esta decissom, de igualar no ensino o Galego a umha língua estrangeira, nom sae dum proceso democrático de debate nas filas do PP.

Manha concentraçons em toda Galiza, e aguarda-nos um ano movido. Que triste história a destes senhores! Som os malos na superproduçom que se fará sobre a história dumha maldiçom que cae sobre esta Terra, e entre intrigas e loitas cainistas, logram desactiva-la dous rapazes fazendo um vinho misterioso que converte a quem o bebe em boa pessoa.

Agora deixemos a fantasia, descansemos esta noite, que manha toca loitar coa realidade, por seguir sendo galegas e galegos.
__________

Livros

2009-12-25T21:17:00.002+01:00

Depois dumha longa travessia polo oceano dos ensaios, onde a leitura era para mim umha ferramenta de trabalho para aplicar a diário, a dor, a tristeza e a saudade destes últimos meses figérom que atracara nas mansas aguas dos relatos, famenta como estava de histórias cálidas, de passar de actora a espectadora da vida. E como quem busca heroína na rua devecendo por acalmar a sua ánsia, entrei numha livraria e pilhei a minha dose sem ver o momento de botar o cobertor na cama e coa luz dumha lámpada nova que merquei para completar a homenagem, lancei-me ávida sobre os livros que seriam o meu passaporte a outros mundos.

A primeira viagem fixem-na da mam de Antonio Yañez. Escolhim o livro porque o autor tem vínculos familiares comigo e a curiosidade algo morvosa de esquadrinhar por dentro a pessoas que conhecemos noutras facetas da vida, tentou-me e nom me arrepinto. Surpreendeu-me a capacidade descritiva dumhas paisagens que estám aqui, acompanhando-me na Terra de Trasancos. As palavras, muitas esquecidas ou mesmo desconhecidas, eram evocadas em mim e se me apresentavam singelas, familiares, como se pertenceram à minha infáncia, e aí estavam para acompanhar na sua "Viaxe a Libunca" ao protagonista. Tenho que dizer que aguardava com espectaçom o passo pola minha parróquia, Caranza. Fiquei algo incómoda pola brevidade do relato e as qualidades outorgadas às mulheres que encontrou ao seu passo. Lembrei quanto deixa quem escreve de autobiográfico nos seus escritos. Ainda nom tivem ocasiom de felicita-lo polo livro e comentar-lhe que o prémio era merecido.

Iniciei a minha segunda viagem da mam de Marilar Aleixandre, entre adolescentes, cumha linguagem ágil e moderna que vai desenvolvendo umha historia de instituto que pode situar-se em qualquer ponto do país. As citas utilizadas pola autora para iniciar cada capítulo podem ser lidas todas seguidas, assim, como enchente, e para contrasta-las coa actualidade do relato e sacar as nossas próprias conclusons. Alegrei-me de ter superado esta etapa da vida tam confusa como é a adolescência e nadar nas tranquilas aguas dos cinquenta. Ainda assim, matinei que, sem ser adolescente, às vezes ter "A cabeza de Medusa" pode ser a explicaçom dalgumha reacçom da gente que se cruza nas nossas vidas.

Agradeço por último que Agustín Fernández Paz, recolhesse no seu livro "O único que queda é o amor" este ácio de relatos curtos. Assim, como se umha dose de xarope se trata-se, fum noite trás noite medicando-me coas suas histórias, que ainda que muitas enleam às pessoas que as protagonizam coas trampas do amor romántico, estám tam bem contadas que o jogo de palavras vai tecendo umha ananás onde adormecer transitando por ruas de névoa, festas de cámara lenta ou livrarias tiradas do filme "Ameli".

Agora estou coa protagonista do relato de Rosa Aneiros, "Sol de Inverno". Gosto muito desta história, mas devo estar sanando da minha enfermidade que nom puxo del como nestas semanas. Porém, anda olhando-me Amalia Valcárcel, cada dia que me deito, desde o andel onde tenho pousado o seu livro " Feminismo en el mundo global", como dizendo, "venha que urge". E no móvel do banho, Pascual Serrano me aguarda para que remate o seu "Desinformación: Como los medios ocultan el mundo". Ainda assim, pensando numha recaída, ando recompilando livros de poesia para meter-me umha dose de quando em vez, como prevençom, no vaia ser que as sombras e o infortúnio queiram aninhar para sempre no meu coraçom.
_________________________

Bom Natal

2009-12-24T20:51:00.001+01:00

Nestes dias é impossível resistir-se a reflexionar sobre qual é o sentido destas festas. Os porta-vozes católicos, assomam aos médios de comunicaçom directa ou indirectamente para reivindicar a propriedade intelectual destas datas, concretada em belens, panxolinhas e necessidade de fazer o bem, ainda que no fundo nom seja mais que o plano maquiavélico dum deus que fai nascer o seu filho para mata-lo, como único jeito de arrincar-lhe o perdom. Fora disso, dim que só queda consumo desenfreado e mercadotécnia.

O feito de que o discurso dominante no Natal, associasse religiom e harmonia familiar ao longo de várias geraçons, fixo que para muitas pessoas a celebraçom destas festas seja, quando nom umha tortura, um compromisso social difícil de levar.

O substrato que conforma a nossa cultura, fai que os costumes ligados à celebraçom do Yule da tradiçom atlántica e germana, ou a festa em honor ao nascimento de Saturno estendida polo império romano,entre outros, perdurem ao longo dos séculos, e os vejamos reviver com força em forma de árvores enfeitiçados e luzes, muitas luzes, que iluminam os curtos dias do começo do inverno.

Os cámbios estacionais, a relaçom destes coa estrela que nos permite a vida, afectam a pessoas de fé católica, cristiana, ateas ou agnósticas, mesmo a quem nom dedicou muitos segundos da sua vida a reflexionar sobre crenças ou cosmovisons. É o que muitas pessoas se negam a assumir em quanto aos efeitos do cámbio climático. É o que intentam negar apegando-se desesperadamente às suas riquezas e ao seu modelo de vida às pessoas mais poderosas do planeta.

Por isso, porque as noites som mais longas, o frio impom-se e o fim do calendário convida-nos a fazer bons propósitos e a agasalhar a quem mais queremos, ou a quem temos que mostrar agradecimento, as festas de Natal seguem presentes e ainda sem compreender as suas origens a celebraçom vai passando de geraçom a geraçom, com cámbios isso sim, porque ademais, abrange nom só ao mundo familiar, senom à convivência no mundo do trabalho, marca o calendário laboral, a economia...

Por se vos serve de algo, direi-vos que intento que cada ano estas festas sejam ligeiras, que nom me presionem. Que agasalhar, me faga feliz. Que me agasalhem, me adoce o dia. Que a participaçom em reunions familiares ou de trabalho sejam tranquilas. E rir-nos um pouco, ainda que muitas das pessoas que acudimos a elas, vaiamos carregando cada quem cos seus problemas, e cos nossos mortos e mortas, que nestas datas, vesti-mo-los como abrigos para acompanhar-nos ali a onde imos, como si a sua lembrança precisara também de achegar-se às luzes, muitas luzes, para fugir da escuridade destas curtas noites de solstício. Bom Natal, isso sim, menos machista, mais solidário e ecológico.
________________

Avoinha, avoinha… que dentes tam longos tês!

2009-11-25T19:13:00.004+01:00

No mitim onde se apresentou a futura Lei de Economia Sostível, Zapatero reiterava mais umha vez, que o PP “nom tem projecto para Espanha”. Quem convenceu à cúpula do PSOE de que esse lema era necessário e útil para criticar à oposiçom conservadora, equivocou-se de pleno. O PP tem um projecto perfeitamente definido, e está articulado co poder financeiro e a hierarquia católica. Na Galiza, o seu projecto é tam claro, que só o medo a tensar demasiado a corda e ter que enfrentar-se a um reagir social como o do Prestige, fai que os motores vaiam a meio gás polo de agora, mas o rumbo do barco deixe umha estela inconfundível. É por isso que todos os esforços deveriam estar orientados a desenmascar esse projecto diante da opiniom pública, e nom a negar a sua existência como um defecto ou carência. Ogalhá esta direita nom tivesse claro o que tem que fazer!

A ONU afirma que o benestar dumha sociedade mide-se polo nivel de igualdade e direitos das mulheres nela. Da mesma forma poderiamos avaliar a acçom política do Partido Popular. É em datas como a do 25 de Novembro, onde mais oportunidades hai para pôr o termómetro social e indicar como está a temperatura da sociedade galega em quanto a direitos e liberdades das mulleres. O diagnóstico é reservado. Existe ademais umha complicaçom engadida que está sendo muito difícil de atalhar. É coma no conto da Carapuchinha, o lobo que a quere comer pom-se as roupas da avoa para engana-la, é dizer, fazer umha cousa coa intençom e a resoluçom de conseguir precisamente o contrário.

Marta González, directora do SGAI desde o 2003 ao 2005, coa Conselheira de Familia, Muller e Xuventude, Manuela López Besteiro, e actual Secretaria Xeral de Igualdade co governo de Feijoo, anunciava diante dos medios de comunicaçom, que a prioridade para rematar coa violência contra as mulheres estava na educaçom, e de feito, sobre este ponto gira a campanha institucional deste ano. Avoinha, avoinha… que olhos tam grandes tês! Som para ver-te melhor minha filha. A loucura privatizadora, o recorte do professorado, o apoio e defensa dos centros que segregam por sexos ao alumnado, as críticas à asignatura de educaçom para a cidadania, a ausência da educaçom afectivo sexual… som as realidades que vam socavando a escola como um serviço público e o rol que deveria jogar na eliminaçom da violência de género.

Na declaraçom institucional deste ano, a Xunta de Galicia incide que neste 25 de Novembro deve-se reflexionar sobre as medidas a tomar para “garantir a atención inmediata e especializada ás vítimas”. Avoinha, avoinha… que nariz tam longo tês! É para cheirar-te melhor minha filha.

O abandono do desenvolvemento da Lei galega contra a violência machista, o futuro incerto dos Centros de Recuperación Integral, o despido das 61 pessoas e feche das oficinas, a maioria no rural, de I+B (Igualdade e Benestar),… convertem a declaraçom institucional em papel molhado pola baba do lobo relambendo-se ante a Carapuchinha.

Avoinha, avoinha… que dentes tam grandes tês! O final deste conto está por escrever.

Poderá Carapuchinha enfrentar o desmantelamento dos serviços públicos que garantem o exerciço de muitos dos seus direitos? Será quem Carapuchinha de conseguir os recursos necessários para deconstruir os mitos e crenças que alimentam a violência machista? Poderá Carapuchinha evitar que muitos desses recursos sejam absorvidos umha e outra vez pola actividade financieira regida pola especulaçom e o enriquecemento sem límites?

Nas últimas oposiçons organizadas polo SERGAS em Silheda, ao redor de 15.000 pessoas deambulavam entre as naves agardando o começo das provas. Um grupo importante de pessoas, na súa maioria gente nova, adicava-se a recolher sinaturas para pedir cadea perpetua para os condenados por assassinatos machistas. Hai pouco apresentava-se umha iniciativa legislativa popular avalada com 30.000 sinaturas para que o governo galego ponha os medios para que as mulheres, nomeadamente as adolescentes, acavem aceptando levar a termo o seu embaraço. Nas misas reparte-se propaganda e desde os medios de comunicaçom ameaça-se coa condenaçom eterna. O activismo de direitas toma as ruas e inxecta ideologia, apresentando ante a sociedade as soluçons mais populistas e feroces, aos problemas sociais. O activismo de esquerdas vai ter que atopar o atalho no bosque para buscar esse final feliz no que nos vai a vida e a esperança.

Mércores 25 de Novembro, 2009
Lupe Ces

Publicado em Tempos Dixital
Revista de Informaçom, opiniom e debate na rede.
__________

Anita

2009-10-24T12:43:00.006+02:00

Apartando a intensa dor que me impede quase respirar, achego-me a este teclado. Tento pensar que nom é a mim a quem corresponde paralisar-me e deixar-me afogar no poço da sem-razom que é a sua morte. Enquanto esse tornado de dor e desesperaçom estará engolindo agora a todos o seus seres queridos, sinto que eu tenho que transmitir ao mundo quem era Anita, para que vos compadeçais de nós por tê-la perdido, e para que saibais o que perdechedes, as pessoas que nom a puidechedes conhecer.

Anita era umha sustentadora do mundo. Assim aparece nesta foto que se veio asinha à cabeça em quanto soubem da sua trágica morte. Assim, sustendo a Colcha da Solidariedade que muitas mulheres do mundo tecerom no ano 2005, com o anaco aportado por nós em Vigo, e que tam bem simbolizava a solidariedade.

Sustentadora do mundo, porque por onde quer que passava, ainda que o tempo a alonjara dum contacto diário, a sua pegada quedava indelével. Por isso, no dia de hoje, onde um maldito segundo roubouno-la para sempre, soa um eco por toda a comarca Ártabra "que imos fazer sem ela?"

Trabalhei com Anita muitos anos na MMM. Nada seria igual sem ela, sem a sua habilidade construtora de optimismo e esperança. Sei que foi o mesmo na sua actividade de mais nova no colectivo juvenil "Ar Ceibe". A Secretaria da Mulher da CIG, teve também o privilégio da sua participaçom, assim como outros colectivos políticos e sociais.

Mais queria sublinhar o seu bom fazer profissional. Como educadora social puidem ver os seus logros no curto espaço que o Concelho de Valdovinho a tivo contratada. O trabalho e a coordenaçom com o meu centro, o CPI de Atios, dérom tantos benefícios para o estudantado com problemas, que desde o Conselho Escolar tentamos sem sucesso, umha e outra vez, que voltara a ser contratada. Assim passou também na sua curta estáncia nos serviços sociais do concelho de Ferrol, onde levou adiante muitas iniciativas, todas elas sanadoras e criadoras de vida.

Porque Anita era umha sanadora. Chamavas para consultar-lhe um problema porque sabias que ela abria as maos e ali te oferecia um recurso, umha ideia. Sempre lembrarei especialmente o que me ajudou nos últimos anos da vida de meu pai. Foi ela a que abriu a mau para que aparecesse Ana, que o acompanhou a el, e sobretudo à minha mai, nos últimos meses.

Agora tinha um cargo muito importante no CAMF de Ferrol, como se correspondia à sua professionalidade. Imagino a todas e a todos unindo-se ao nosso eco "que imos fazer sem ela?"

Nunca, nunca , nunca pensei que teria que escrever isto, tam injusta é a tua morte para ti e para os teus. Por isso só posso dizer-te entre lágrimas, que viverás nos nossos pensamentos enquanto dure o nosso tempo, e que tentaremos ser cada dia um pouco coma ti. Anita, Anita...
__________

Propriedade e empréstimo som questom de valores

2009-09-18T01:13:00.008+02:00

Nom som partidária dos livros de texto. As editoriais nom deveriam marcar nem as programaçons, nem o dia-a-dia das aulas. Mas, mentres o sistema escolar nom se libera de velhas ataduras e nom rompe esquemas que o mantenhem case na sua totalidade, em quanto à metodologia, imutável desde mediados do século XX, temos que aceptar que a utilizaçom do livro de texto, como eixo vertebrador dos processos de aprendizagem, é hoje o enfoque metodológico mais extendido nas aulas. Polo tanto, todo o que gira ao redor do livro de texto, desde os contidos até o jeito de adquiri-los e utiliza-los, influe enormemente no sistema educativo, polo que o debate actual sobre a gratuidade ou nom dos livros, nom pode limitar-se, sendo importante, só a um problema de dinheiro.

O sistema de empréstimos que se véu desenvolvendo tardiamente na Galiza co governo bipartito, fomentava umha série de valores que cumpre publicitar. Porque ali onde podamos, as pessoas que acreditamos na urgência dumha sociedade mais justa, temos que contrarrestar a agitaçom social promovida desde a Consellería de Educación, baseada em sentimentos de inveja e ressentimento, fronte à solidariedade pretendida. Assim, temos às famílias do alumnado mais pendentes de quem recebe a ajuda e quem nom, de ver se "lhe pagamos" ou nom os livros ao filho do vizinho, que tem salário fixo, ou um coche "que já nos gostaria na porta”, que dumha séria reflexom, junto co resto da comunidade educativa, sobre que é o que verdadeiramente perdemos ou ganhamos com este cámbio.

Nom chega com argumentar que volver ao antigo sistema de livros em propiedade é muito mais caro para os orçamentos públicos, e polo tanto muito mais caro para toda a sociedade, dado que mentres o sistema de empréstimo mantinha os mesmos livros ao longo de quatro anos, o sistema em propiedade obriga a dar ajudas continuas cada curso.

Nom chega com argumentar que vam ser moi poucas as famílias que recebam a ajuda e que essa ajuda nom vai cobrir o 100%. Hai que explicar que o sistema em propiedade gera desde o princípio de curso grandes desigualdades. Só teríamos que passear-nos polas aulas para ver quantos nenos e nenas levam desde o dia dez sem livros, porque na sua família nom cobrárom ainda o paro ou o finiquito para poder mercar-lhos e posteriormente pedir a ajuda. Co sistema de empréstimos todo o alumnado começava, quando menos nesse aspecto, em igualdade de condiçons. Agora volveremos a ver os livros todos sublinhados ou desgastados polo mal uso, aproveitados polo familiar ou vizinha menos favorecida. Sempre sairám de balde, mentres que a ajuda obriga a um desembolso total primeiro, e só a recuperar umha porcentagem, seja grande ou pequena, depois.

Nom chega com argumentar que a gestons das ajudas supom umha sobrecarga para as escolas, ou que as equipas informáticas habilitadas nos centros som insuficientes e precisam de muitos apoios porque o analfabetismo informático é moi maioritário no nosso país. Hai que explicar que é um cámbio no sentido contrário ao do aproveitamento e optimizaçom dos recursos. Ingentes cantidades de papel serám empregadas cada curso em repetir praticamente as mesmas ediçons duns livros que acabarám a sua funçom, na maioria dos casos, a finais de Junho.

Hai que exigir que fagam públicos os estudos aos que se chama a Conselharia, que demostram os melhores resultados académicos entre escolares com livros em propiedade e os que tenhem sistema de empréstimo. Que fagam saber que mostra tomarom, em que estrato social e ámbito geográfico, e como vinculam propriedade do livro e êxito escolar.

O que demostrou o sistema de empréstimo é que ao final de curso, nom saíam, como era habitual, as folhas e as capas, cada umha co seu próprio plano de vóo, polas janelas. Os livros passárom a ser espaço compartido, território em mancomum, que se respeita e se coida. Assim, a igualdade entre o alumnado conseguia-se nom polas ajudas ou subsídios, senom polo dever que tinham em coidar o que era de todos e de todas.

Perdemos em valores de igualdade e responsabilidade, perdemos em actitudes de respeito e colaboraçom, perdemos na educaçom de cidadáns e cidadás conscientes em direitos e deveres. Mais penso que todo isto já se sabia e mesmo se perseguia, polos novos dirigentes da Consellería de Educación.
___

Radio Galega, a rádio roubada

2009-09-13T13:52:00.008+02:00

Roubárom-nos a rádio pública galega. Asaltárom-na e ferida de morte, dérom-lhe o tiro de graça coa nova grelha. Som @s de sempre. Os mentiráns e censuradores que ao longo dos governos presididos por Fraga Iribarne, ocultárom e restringírom informaçom, escorados ao lado do poder, esquecendo a vocaçom de serviço público e objectividade e pluralidade informativa e formativa que compete a umha rádio pública. Som os mesmos nomes, encabezados polo inesquecível Xusto López Carril, condutor durante a era Fraga dos informativos da manhá; María Xosé Rodríguez, sempiterna protagonista dos magassines, ou Tino Santiago, malabarista da mentira e a subxectividade informativa ao serviço do poder. Som os mesmos nomes, as mesmas idéias, o mesmo provincianismo, a mesma radio de segunda que nom merecemos.

Nom poderiam ser outros nomes, porque as xefas volvem ser as mesmas. Rosa Vilas Nuñez, desde o ano 1989 na RTVG, já foi subdiretora de informativos cos governos do PP até o 2005, agora ascendida a diretora da TVG. E Rosa Martínez Rivada nova diretora da Radio Galega, ainda que velha servidora dos interesses do PP nos médios públicos. Leva na Radio Galega desde 1986, foi subdiretora cos anteriores governos do PP.

Como é que estas pessoas nom tenhem que responder pola censura coa que forom cúmplices durante tantos anos? Como é que estas pessoas volvem colher o espaço público como se os três anos e medio no que respiramos nas ondas um pouco de liberdade, fossem só um espelhismo, um sonho. A realidade volve a ser a sombra da caverna.

Doe como volvem a usurpar a Radio Galega, e como mendicantes buscamos aqueles dias e minutos contados onde aparece na programaçom algo que motive, solprenda, entretenha ou mova à reflexom. Sim, esses minutos existem. Ainda a nova direcçom nom se deu conta dessas bolsas de oxigeno que nos permitem respirar e seguir existindo como ouvintes da radio pública. Mas a mim pessoalmente, doe-me que eliminaram da parrilha o programa Extrarrádio, conduzido por Belén Regueira. Os sábados e domingos pola manhá, na casa ou viajando, escoitavamos a Belén e a sua equipa e sentiamo-nos a gosto. Nom porque as idéias, os comentários, a informaçom ou os temas tratados fossem os que eligiríamos no caso de poder participar na elaboraçom do guiom, incluídas, numha mostra de pluralidade inexistente até o 2006, muitíssimas entrevistas a dirigentes do PP. Mesmo levamos umha decepçom quando se eliminou a secçom dos comentários de Carlos Taibo. Senom porque era um espaço de respecto, posta em valor dos sinais de identidade galegos, um abraço entre as distintas realidades de Galiza, onde confluía o rural e o urbano, o moderno e o antigo, o tradicional co inovador. Todo isto desde umha rádio de calidade, onde a formaçom das profissionais que o conduzíam, marcava a diferença. Divertia, ensinava, movia à reflexom. Em fim, o que tem que ser a rádio. Agora lembro com morrinha o espaço dedicado ao concelho de A Veiga no último programa, foi excepcional.

Caiu-nos a condena dumha longa singladura polo deserto. Quando ganhou as eleiçons o PP, Belén Regueira dizia num artigo n'A Nosa Terra que nom havia que cair no vitimismo, que o que havia que fazer era viver. Quitam-nos o ar para respirar, a terra debaixo dos pés e ademais de todo isto, andamos encerelhando entre nós botando-nos areia aos olhos, penso que só podemos centrar todos os esforços em sobreviver. Eu tampouco dou para moito, só se me ocorreu enviar um correio de protesta ao programa "somosquen@crtvg.es", outro à diretora da radio "dir.rg@crtvg.es" e outro à xefa de programas "radiogalega@crtvg.es".

Como garantir a independencia d@s profissionais da RTVG? Como evitar a sua privatizaçom? Como protege-la dos cambios politicos que a apartam do serviço a sociedade galega? Como garantir esse controlo social?

__________

Que che fixemos Laura?

2009-09-10T01:40:00.009+02:00

Tenho preocupaçom pola reacçom social que envolveu o assassinato de Laura Alonso Pérez no concelho de Toén. A medida que passavam os dias depois da sua desapariçom, as vozes que pediam endurecimento das penas, cadeia perpetua ou mesmo pena de morte íam in crescendo, coa ajuda inestimável dos meios de comunicaçom que abriam foros e votaçons para a reforma do Código Penal, como si a existência ou nom da violência machista tivesse relaçom co número de anos, meses e dias das sentenças que se ditam. Só hai que mirar, como me apontava umha amiga, que muitos agressores actuam como terroristas suicidas, sem dar opçom à justiça a actuar contra eles.

Mentres a sociedade siga alimentando sentimentos de vingança e ensanhamento, e nom esté disposta a acometer os cámbios necessários para arrincar as raízes que alimentam a violência machista, seguiremos enterrando a muitas Lauras.

Já som muitos os sinais que nos indicam que a sociedade galega deu um golpe de timom no rumo que a levava cara a umha sociedade inspirada nos valores da igualdade. Coa morte de Laura, apontam as contradiçons entre o que significa chorar diante do seu cadaleito e apoiar políticas que preparem o escenário do novo crime. Sem dúvida estamos diante dumha involuçom do que pareciam ser avanços consolidados em quanto a liberdade e direitos das mulheres.

Essa reacçom visceral ante o assassinato de Laura convertida num feito mediático, espida absolutamente de análise e reflexom, indica-nos até que ponto a sociedade galega está impossibilitada para rematar coa violência machista e evitar mais assassinatos de mulheres. Nom se pode deconstruir ou desactivar o que se desconhece, e segue havendo umha grande ignoráncia social a respeito da violência machista, por quê se dá?, quais som os efeitos que produz nas vítimas?, que tipo de masculinidade a exerce?, e sobre todo... como prevé-la?.

Exercer umha responsabilidade política, aumenta em muitos graos o efeito dessa ignoráncia. É também muito perigoso, desconhecer ou minimizar o efeito que sobre o repunte ou o retrocesso da violência machista, tenhem as políticas que se aplicam desde os poderes públicos ou a influência que neste fenómeno tem, a ideologia que extendem as instituiçons mais poderosas na nossa sociedade, nomeadamente a cúpula católica.

Essa ignoráncia demostrou-na o Presidente da Xunta, Alberto Nuñez Feijóo, na declaraçom institucional realizada a raiz do assassinato de Laura Alonso, comentando que na Galiza o assassinato de mulheres era algo "excepcional". Palavras pouco adequadas para referir-se a um fenómeno social no que a morte de cinco mulheres no que vai de ano, é só a ponta dum iceberg que arrastra miles de denúncias nos julgados, e que agocham muitas mais agressons todos os anos no nosso País.

Seriam só palavras, que se poderiam desculpar, se nom agachassem umha ideologia e umhas políticas que vam na direcçom contrária dos valores da igualdade. O Partido Popular ao que pertence, deu sobradas monstras delo, opondo-se à Lei de Igualdade, á reforma da Lei do Aborto, á inclussom nas escolas da asignatura "Educación para a Cidadanía", a igualdade de direitos das pessoas homosexuais, apostando pola guerra ... e abandeirando umha política económica de privatizaçom dos serviços públicos, baixada de impostos e aforro do gasto público em serviços e prestaçons sociais, que é um ataque directo à igualdade das mulheres.

Seriam só palavras, as de Feijóo, ante a morte de Laura Alonso, que poderíamos disculpar se nom tivessem detrás umha vontade política de colocar ao frente das instituiçons galegas pessoas de conhecida ideologia integrista e misógena, que, como no caso do Conselleiro de Educación -Xesús Vázquez Abad-, aceita como bom, a segregaçom por sexos nas escolas, ameaçando o presente do sistema público de ensino, onde umha parte muito importante da comunidade escolar esforça-se, na formaçom em valores da igualdade, do ecologismo e a paz. El conhece esse passado recente e esse presente. Sabe como reaccionou o ensino público ante a catástrofe do Prestige ou ante a guerra de Irak. Sabe-o el, e o Opus Dei, a organizaçom que parece inspirá-lo. Polo que o ensino público, vai ser umha das instituiçons galegas mais atacadas nesta legislatura. Umha instituiçom chamada a ajudar a formar pessoas cumha nova masculinidade, novos roles nom esteriotipados, novas relaçons afectivo-sexuais baseadas no respecto e a igualdade.

As de Feijóo, forom só palavras, que seríam anécdota, se o governo que dirige, nom estivera abrindo umha fenda nos direitos e liberdades das mulheres. A Conselleira de Sanidade -Mª Pilar Farjas Abadía- vai à frente dessa actuaçom, nom só pola sua carreira privatizadora dum serviço público básico para as mulheres, senom que nela se arroupa o mais reseso dos integrismos que qualificam o aborto como um assassinato. Assim pretendem aplicar na Galiza o terrível modelo de apoio às mulheres com embaraços nom desejados, que já está em vigor em Valencia. O objectivo é, em primeira instáncia, convencê-las de que o melhor para elas é levar a termo o embaraço, que já haverá a quem entregar ao seu filh@ umha vez parid@, sem ter em conta os sentimentos ou a afectaçom que para a saúde mental das mulheres comporta esta terrível decissom. Essas mulheres vam poder ser acolhidas por outras familias, que por suposto lhes transmitiram os valores dumha maternidade adnegada na que a sua vontade e desejo conta bem pouco. Um modelo que ignora a responsabilidade masculina, e que vai dirigido fundamentalmente às mulheres mais vulnerábeis (adolescentes ou mulheres pobres), nom para empodera-las e dar-lhes a suficiente autonomia para que tomem com liberdade às suas própias decissons, senom para encorsetá-las num modelo feminino herdado dos manuais da "Sección Feminina" e das ordes religiosas, tradicionalmente dedicadas a redimir "vidas descarriadas". É que a Conselheira di que o aborto é a monstra palpável do fracasso da educaçom sexual. Teria-nos que explicar de que educaçom sexual fala Pilar Farjas e onde se imparte.

O alcalde de Toén, aparecia nos meios de comunicaçom primeiro abatido, logo, ante a detençom do agressor, com cuja família mantinha umha forte vinculaçom política e de amizade, o abatimento convertiu-se em desorientaçom. A vítima e o verdugo dentro do seu círculo de confiança. O discurso oficial de condea nom servia. Era como se se dera conta por um momento que algo tinham feito mal em Toén. Como se puido chegar até aí? Como é que nom pararom a tempo as cousas quando havia que para-las? Por que um rapaz de boa família chega a fazer o que fixo? Por que a umha rapaça como Laura, as idas e voltas dumha relaçom lhe custam a vida? Nom lhes virom nunca nada na escola? Que lhes diziam na misa? E no centro de saúde, nunca lhe notarom nada? E na casa, que lhes diziam na casa? Que se fai nestes casos? Que haveria que fazer antes?... Mas entóm, Alberto Nuñez Feijóo, o seu presidente, o seu máximo dirigente, chegou a Toén para reprogramar umha única resposta correcta a todas estas perguntas. Umha resposta que ademais apresentou, como umha reivindicaçom das organizaçons de mulheres: hai que aumentar as penas para os maltratadores. Assim, o que era algo "excepcional", converte-se em razom para cambiar o Código Penal. Todo para seguir dando às costas ao problema da violência contra as mulheres. Todo para que siga intacto o sacrosanto sistema patriarcal que contamina todas as expressons sociais. Todo para que os titulares da prensa recolham a pergunta Que che fixérom pequecha? no canto de: Que che fixemos Laura?

06-09-2009
__________

Prezado Roque, meu netinho

2009-08-12T17:38:00.005+02:00

Passam os dias e nom chegas. Primeiro pensei que quererias coincidir co aniversário do teu avô Andrés. Logo que chegarias quando a marcha contra o golpe de estado em Honduras pisara as ruas de Tegucigalpa. Hoje até pensei que agardavas a que se reconhecesse a figura de Moncho Reboiras como vítima da ditadura franquista. Em fim, que aproveitarias neste mês de Agosto qualquer boa nova que nos curasse um pouco as feridas abertas pola ofensiva conservadora que padecemos desde hai cinco meses. Assim, asseguravas-te de encontrar-nos alegres e sobre todo com esperança.

Mas tês que saber que o teu nascimento vai ser umha grande alegria para nós, para toda a gente que te queremos e te imos querer. Por isso quero escrever esta carta para ti, para que te decidas a começar essa longa marcha que vai ser a tua vida. Só a tua nai e mais ti podeis fazê-lo possível. Esse primeiro caminho ides recorrê-lo ti e mais ela sós, ainda que o teu pai estará também ali acompanhando o momento no que abras os olhos, por ver se che rouba a primeira olhada. Eu confio em que o fareis bem, porque sabes?, a túa, é umha vida desejada. Terás tempo logo de saber que entre outras muitas penalidades neste mundo, hai gente com poder que fai que cheguem a este castigado planeta, vidas nom desejadas. Ti pola contra vês ligeiro de cargas, ainda que em quanto nasças, sem saber onde as traias agachadas, vás começar a dar ao teu redor alegria, tenrura, esperança, força... Ti, tam pequeninho e tam generoso.

À vida nom lhe tenhas medo. Tem sempre presente que é algo que tem principio e final, e terá momentos maravilhosos para ti. Aprenderás a querer à Humanidade nos seus muitos acertos e a corresponsabilizar-te dos seus terríveis erros. Assim, começarás também a viver para ajudar a que nom se repitam.

Pido-che que te decidas a abraçar a vida. Tês umha nai e um pai que devecem por dar-te alouminhos, cuidar de ti e volver a surpreender-se nos teus olhos coas cousas que vaias descobrindo. Vem quanto antes, agardamos-te.
__________

Dentro do tanque

2009-07-29T10:45:00.006+02:00

Aquela mulher nova, ainda enroibava explicando aquela história no asteleiro. Nom por vergonha, senom pola raiba que ainda estava empousada nela desde aquela.

"Fixerom-me baixar dentro do tanque do barco eu sóa, tinha que o limpar e pintar". Para explicar o perímetro do furado de entrada, unia as maos fazendo umha brazada, que componhia um pequeno círculo, do tamanho por onde ela tivera o acesso ao interior. Com certo alívio, sinalava que se tratava dum tanque que contivera água, e que tinha o autocolante de segurança no exterior conforme tinha passadas as leituras de gases.

"Eu sabia que era ilegal, que nom pode baixar umha pessoa sóa. A de segurança nom dixo nada, o de Navantia, que agora estam mirando o que fazemos nas auxiliares, também nom dixo nada, e baixei".

A mulher ia descrevendo o interior do tanque cheio de ferros, e cada um dos perigos que lhe forom passando pola cabeça aquela comprida jornada de trabalho. "Chorei, chorei muito dentro do tanque, porque sábia que se me passava algo, nom haveria ninguém para ajudar-me. Pensava no meu filho. Hai mala gente, porque nom é normal que os companheiros nom digam nada. Logo para rematar de pintar a escada ao tempo que saía do tanque, nom sábia como fazê-lo, colguei-me cabeça abaixo e fixem como puidem. Nom fum perguntar porque se vem que nom me atrevo a baixar ou que nom sei fazer algo me botam".

Describia, como se dum livro de Carlos Robira se trata-se, todas as estratégias que utilizou para carregar a sua mente de pensamentos positivos, que lhe ajudarom a superar aqueles dois primeiros meses de trabalho, que contados assim, coa intensidade e afectaçom com que o fazia, nom dava lugar a pensar que o tempo separava já com dous anos, os feitos da narraçom.

Sentados cos seus elegantes trajes aparecerom entom no Telexornal, os representantes da CEOE para explicar que siguem interessados no diálogo social, sem concretizar o que pidem. Umha tímida ráfaga do ministro de trabalho que vem dizer que a vida segue ainda que nom haja acordos, e umha implacável Maria Dolores de Cospedal, junto a umhas ameazantes siglas do PP, acusando a Zapatero de autoritarismo. Eis toda a explicaçom da televisom pública de Galiza. As cámaras nom entram polo diámetro do tanque. Só podem filmar ao metal polas ruas de Vigo, disque paralisando a vida cidadá. Sei que ali, em Vigo, nom hai mala gente. Nom miram cada quem para o seu. Assim era também nos asteleiros desta ria até que alguém os enfeitiçou.
_________

Morte em Toledo

2009-07-26T11:08:00.011+02:00

Ainda cansa dum 25 de Julho que me deixou a cabeça cheia de informaçom e imagens sem processar, a Rádio Galega oferece a sua habitual ráfaga informativa horária, a morte dumha mulher em Toledo, a maos do homem que tinha dela umha ordem de alonjamento, abre os cinco minutos de informaçom.

Ao apertom de vísceras que me acompanha neste tipo de novas, une-se umha irradiante ira que tento acalmar aporreando este teclado. A Rádio Galega, a rádio pública de Galiza, prefere, nos segundos que pode adicar a esta morte, informar-nos da nacionalidade do agressor, português, e de que a vítima tinha duas crianças dumha relaçom anterior, desperdiciando esses maravilhosos segundos dumha audiência de miles de pessoas, para incluir detalhes da vida pessoal da vítima que difuminam a nova principal, desenhando um modelo de mulher vítima, no quanto de contextualizar o novo assassinato, como um novo ataque machista à liberdade e à vida das mulheres.

Nos meus ouvidos nom soarom, mais sim polo meu pensamento, passavam as linhas que ficarom fora do papel da redacçom da notícia.

"Segundo a organizaçom Red de Mujeres Contra la Violência Machista, com este novo caso som já 43 mulheres as que perderom a vida no que vai de ano, a maus dos seus agressores. Na Galiza som três, a última vítima, Maria Luz Tapia, morria assassinada na Corunha a passada semana. A violência machista, cobra assim umha nova vida sem que as medidas legislativas e judiciais que se aplicam nestes casos, parezam ser capazes de paralisar esta sangria constante de vidas truncadas de mulheres que nesta ocassom, ademais, deixam menores marcados para sempre pola tragedia".

Tudo isto é o que cumpria escuitar hoje, mais na rádio nom sou.

Para Manola com gratitude

2009-07-14T14:23:00.004+02:00

Foi agora, quando lim o jornal, que me enterei da morte de Manola, Manuela Pérez Sequeiros, concelheira em Narom. A súa morte foi inesperada, accidental. Eu queria dar-lhe um espaço neste dia ventoso e gris de verám, aqui, no meu blog e no meu coraçom. Lembro todo o que ela desde o seu posto de concelheira, favoreceu a labor da Marcha Mundial das Mulheres. A mobilizaçom euroipeia do 2004 e a sua incidencia na comarca, nom teriam sido igual sem o seu compromiso.
Agora que nos jornais aparecem loubanzas do seu trabalho municipal, eu quero lembra-la como feminista. Quando nos entrevistavamos com ela sempre parecia converter-se na nossa mensageira, umha mais de nós para conseguir um obxectivo colectivo. Muitos beijos Manola, e graças por todo.

Os Comedores de Macdonals

2009-07-12T23:39:00.006+02:00

Visitam o paseio frente a minha casa, mais estam em todas partes, som os comedores de Macdonals.

Sementam por onde passam pequenos pacotinhos de onde sacarom o tomate ou a maionesa, e grandes sacos de papel com restos de gorduras e às vezes também de pequenos anacos sem consumir. Os comedores de Macdonals chegam com os seus carros, algúns de músicas altisoantes, e começam a sementar desde as janelas, primeiro cada saquinho, logo os vasos, as bolsas grandes e as latas do omnipresente refresco de cola.

Tento compreende-los e justifica-los, de seguro podo encontrar algúmha razom para o que fam. De seguro nom sabem nada sobre a devastaçom da Amazonia. Desconhezem, de seguro, as consequencias dos agrotóxicos e os monocultivos de agricultura intensiva. Nom teram informaçom, sobre as consequencias na agricultura local ou mesmo na actividade dos pequenos establecimentos de restauraçom da zona, dumha multinacional de comida rápida, que importa absolutamente todos os alimentos que pom à venda. Nom sabem, nom tenhem informaçom ou a que lhes chega nom a entendem... Também imagino , num exercicio de enfermiza empatia, que quando estiverom na escola, os comedores de Macdonals nom tiverom a ninguém que lhes explicara a necessidade de cuidar o médio ambiente e portanto a urgência dumha boa gestom do lixo. Ou simplesmente o seu pai ou a sua nai nunca lhes berrarom "Nom tires o lixo ao cham porco!!! Por isso, com paciência, recolho sempre que podo, os restos espalhados frente à minha casa, para manter o meu espaço mais próximo, limpo do seu logo coorporativo e portanto do seu domínio.

O que me abate é ver à gente de esquerdas acudir a esses estabelecimentos.

Hai pais e nais, que ainda sendo críticos com Macdonals e conhecendo o comprido historial da multinacional e o seu simbolismo, acudem ali com as suas crianças, quando lho pidem, ou quando as convidam à celebraçom do aniversário de outras crianças. Baixo a ameaça de converter à sua filha ou ao seu filho num bichinho raro ou excluido das celebraçons sociais, entram no mundo Macdonals enchendo as compridas listas de consumi cúmplice, entre outras coisas, com a devastaçom da Amazonía. Mais tudo é por umha boa causa. Sería moi triste romper essa image feliz dumha infância reunida por volta dumha tarta, ainda que esta seja de productos trangénicos cultivados em terras expropiadas a povos indigenas.

Deixamos assim, que as nossas crianças, as crianças da esquerda, sejam educadas polo palhasso de Macdonals ou os valores de Disney Channel, do mesmo jeito que nom lhes dizemos nada quando dum jeito natural falam-nos em castelám, porque a nossa consciência nom soportaria impor-lhes nada mais que os horários escolares ou a tomada de medicamentos. Polo demáis, deixamos que vaiam medrando em liberdade, a liberdade de consumir em Macdonals e converter-se, se assim o decidem, nos futuros comedores de Macdonals, sem que nos poidam deitar à cara que lhes impujemos as nossas ideias, os nosso valores.

Os valores que tenhem os comedores de Macdonals, nom som impostos, venhem voando polo ar, formam parte da paisagem.
_____________

Doutor George Tiller, in memorian

2009-06-01T00:49:00.009+02:00

Na Praça da Quintana um arrebato de sino recibia às feministas que nos concentravamos hoje ali para reivindicar o direito ao aborto. Convocadas pola Marcha Mundial das Mulheres, confeccionamos umha tapete floral e um maio, para somar-nos à celebraçom da primavera, e portanto à celebraçom da fecundidade, justo para dizer que essa fecundidade tinha que ser vivida em liberdade. Com o lema "eu decido", reivindicamos o direito ao aborto livre e gratuito na sanidade pública.

Foi na Praça da Quintana, nom, como me sugeria um jornalista, como resposta à campanha antiaborto da Conferência Episcopal, senom porque a Quintana é umha praça que pertence à cidadania, e como tal foi testemunha histórica de reivindicaçons de direitos cívicos, e nós, as mulheres convocadas ali pola Marcha Mundial, queremos que o aborto seja um direito reconhecido pola cidadania e garantido polas instituiçons que a representam.

O dia nom rematou como começou. No canal de Euronews sentenciavam cum tremendo titular a um médico de Wichita -Kansas- "Este homem nom voltará fazer abortos". Trata-se dum médico estadounidense que acava de ser assassinado quando acudia a um oficio religioso numha igreja luterana. O seu delito, praticar abortos depois da semana 21. A sua clínica fora atacada em várias ocassons com anterioridade. El mesmo recebera anteriormente disparos. Assim deste jeito quitarom-lhe a vida os integristas machistas.

Quero escrever e pronunciar o seu nome, doutor George Tiller, doutor George Tiller... Na rede podemos encontrar algumha das suas declaraçons, "o aborto é um tema tam controversial como a escravatura, ou a época da proibiçom do consumo de alcool em Estados Unidos", "tráta-se de dar opçons a umha mulher quando se lidia com tecnologia que pode diagnosticar anormalidades num feto","as provas prenatais sem opçons prenatais som um fraude médico".

Estou convencida que esta orda antiabortista som como o nazismo. Vam filtrando pouco a pouco o seu ódio às mulheres que nom se somentem à sua moral e aos homens que as apoiam. O mesmo que os nazistas culpavam de assassinatos atrozes e de todos os males a judeus, ciganos, homossexuais, militantes de esquerda, ... para converter-se no grande monstruo que acavou com a vida de mais de 40 milhons de pessoas em Europa.

A dor polo assassinato do doutor George Tiller, vem somar-se agora à dor pola morte de milheiros de mulheres no planeta por aborto praticado em condiçons de risco.
__________

Falta dinheiro no meu sindicato

2009-05-22T01:53:00.008+02:00

Hoje os meios de comunicaçom informarám à opinom pública de que faltam muitos miles de euros das contas da CIG em Ferrol. Muitas pessoas conheciamos esta situaçom desde hai uns meses, causada por umha ludopatia do responsável de finanças.

Em todas as organizaçons polas que passei ou nas que participo na actualidade, as finanças som o morto co que ninguém quer carregar. Um trabalho ingrato que precisa de muita dedicaçom e constáncia.

Entre companheiras e companheiros a confiança é fundamental, mas esta nom é a primeira experiência deste tipo. Por isso o controlo democrático das finanças fai-se fundamental nas organizaçons sociais, e a ninguém lhe deve sentar mal que assim se lhe controle. E por suposto, esse momento em todas as reunions onde se passa a informaçom sobre o estado das contas da organizaçom, deve ocupar o lugar que lhe corresponde, fazendo um esforço, de transparência e responsabilidade. É o mesmo que o dinheiro público. Som cartos das organizaçons, som cartos do povo organizado. No caso do meu sindicato, som cartos da classe obreira organizada. Som intocáveis!

Haverá que mudar muitas coisas, pedir responsabilidades e mudar jeitos de trabalho ou modelos organizativos, mas o que me inquieta do que vai ocorrer quando a notícia saia na imprensa, é desconhezer o interesse que persegue esse grupo de pessoas com bastante representatividade na CIG, que brinda às empresas mediáticas, informaçom fazilmente manipulável, dumha situaçom interna que só compete à CIG e à justiça.Porque os congresos se ganham nas asembleias e na acçom sindical, nom coa tinta envelenada dalgúns jornais.

E que tudo isto suceda justo no momento no que os companheiros e companheiras do metal em Vigo, estám recebendo, também por parte dessas empresas mediáticas, um dos mais virulentos ataques contra o sindicalismo, e em concreto contra da CIG, dos últimos tempos. Estám botando mais lenha ao lume. Para que arda quem?
_________________

Como no Prestige

2009-05-18T00:50:00.007+02:00

Foi como umha grande maré de chapapote batendo contra as costas. Foi outra vez ver a vida ameaçada pola dominaçom, a incompetência e o ódio. Coma no Prestige.

Sabiam as gentes que querem arredar a nossa Língua de nós, que como dizia Ramón Piñeiro, a Língua é a alma dum povo?

Sabiam estas gentes quando começaram umha nova cruzada contra o galego, que a nossa poeta nacional ensinou-nos a reagir "qual loba doente e ferida"?

Sabiam estes infelizes que Celso Emilio ensinou-nos que a nossa Língua nom "pode apartar-se de todos os que sofrem neste mundo"?

Por isso as mentiras, as aldrages, as ameaças, as reservas onde nos querem meter, forom como as marés do Prestige, petarom na alma do nosso povo e botou-se à rua. Como no Prestige, baixo a chuvia, baixo umha imensa maré de guarda-chuvas.

Alí estavamos, tam diferentes, tam cada quem da sua casa, mas co mesmo pulso, co mesmo alento para sentirmo-nos dum povo, o nosso, que hoje saiu a defender-se.

E eu estivem alí, e fum umha das privilegiadas que escoitou o alalá de Mercedes Peón, saindo atávico, para petar-nos na alma e na consciência e viver uns dos momentos mais emotivos da jornada. Sempre em Galiza, sempre em galego.
___________________

A minha neta di “to”

2009-04-10T11:30:00.008+02:00

Às vezes a realidade explica-se muito melhor coas anedotas. Entendemo-la com pequenos exemplos, que nos chegam mais, que as profundas análises e os sesudos estudos e investigaçons, que sendo totalmente imprescindíveis, em ocasons tornam-se inúteis para entender e transmitir as sensaçons e sentimentos que emanam dessa mesma realidade. Como explicar senom a profunda soidade, a exclusom, a sensaçom de desterro, que as pessoas galego falantes sentimos na nossa cidade? Pois, velai vai um chisco desta magoante realidade.

Hai uns dias um dos meus filhos baixou a um dos parques do bairro coa minha neta de dous anos. Tem-lhe que ajudar a subir aos jogos que para ela, som gigantes a conquistar com muito esforço. Outro neno tinha também dificuldade e o meu filho ofereceu-lhe ajuda. Ao pouco o neno correu junto à sua nai para contar-lhe a sua grande descoberta “mamá , mamá, um señor galego!”.

Ao dia seguinte, a minha neta acompanhada polo seu avó, jogava num parque do centro da cidade. Ocorreu do mesmo jeito, mas, podede-lo crer porque sucedeu de certo, nesta ocassom, este outro neno dixo “ mamá, mamá, un señor rural!”.

É por isso que som como a vida as palavras “cham”, “lume”, “cam”.. que a minha neta, no seu ensaio continuo coa fala, vai pronunciando nesse maravilhoso jeito de abrir-se ao mundo. Vai botando-as ao ar, como frágiles bolhas de sabom. Essas palavras vam molhando esta terra malferida da nossa identidade, e som vida, e som alento, e nos reconhecemos nelas.

Nom, nom remata aqui o conto. Porque também sentimos laiar a ferida aberta, cada vez que ela di “to”. “Como dis?” “ Eu”. “Moi bem!” E haverá quem pense que é imposiçom.
___________

Umha campanha na rede com olhada violeta para os linces e os bebes

2009-03-18T19:27:00.016+01:00

Muitas vezes um pequeno cámbio na linguagem provoca um enfoque diferente ou radicalmente oposto. Isso é o que sucede ao feminizar os linces da Conferencia Episcopal ou quando cambiamos a palavra sacerdote por sacerdotisa.

As linces responden aos bispos

SUMATE À CAMPANHA E ENGADE O LOGO D'AS LINCES AO TEU BLOG, A TUA WEB, AO TEU PERFIL NA REDE SOCIAL, ...

Esta é umha convocatória para que hoje Quarta-Feira [Mércores] 18 DE MARÇO, nos nossos blogs, perfís de facebook, twitter, ... sumemo-nos e de-mos umha resposta contundente aos bispos.

Se tés um blogue ou umha web coloca o logo, escreve umha nota de resposta à campanha da igrexa junto ao logo dos Linces que hai junto a este texto ... se tés algúm perfil dalgumha rede social, substitúe a tua foto manhá quarta-feira co logo d'As Linces.

Eles podem pagar valos publicitarios, pero nós temos a rede.

Se te sumas à campanha, envia umha mensagem coa direcçom da tua blogue, ou da tua web a laslinces@gmail.com

Temos moito que dizer, na defensa dos direitos de cidadania, e faremo-nos escoitar. ;-)

Quen som "As Linces"?

As Linces somos Todas e Todos !!

Deixa um comentário com ligaçom à tua nota en blog, o teu perfil de twitter, o teu perfil de facebook ...

Podes somar-te à Causa aberta en Facebook

Enlace co Blogue d'As Linces
______________

Aborto, questom de igualdade

2009-03-18T18:18:00.006+01:00

Hai quem nos quere fazer retroceder ao pior do século XIX. Hai poucos meses luitando contra a Lei de Igualdade, ou contra umha asignatura que intenta explicar direitos fundamentais e funcionamento social; hai poucos anos luitando contra o direito ao divórcio, séculos luitando contra os direitos das pessoas homossexuais, e desde a origem dos tempos luitando contra os direitos das mulheres. Agora volvem mostrar toda a sua força para paralisar umha lei que só pretende sacar o direito ao aborto do código penal. Fam-no agora, aproveitando que muita gente esqueceu que hai pouco mais dum ano havia mulheres que tinham que comparecer diante dum julgado por ter abortado (Março 2008). Fam-no, porque aproveitam que muita gente nom é capaz de ver a contradiçom que supom que nom permitas que umha moça de 16 anos decida se quere ser nai ou nom, sem que a sua família decida por ela, à vez que aplaudes que nenas de 10, 11, 12, 13, 14 ou 15 anos param.

No fundo é todo umha questom de igualdade. Aí, começando polo Papa, os arcebispos, bispos e umha imensa quantidade de clérigos, tenhem um suspenso secular. Suspenso em Igualdade e Democracia. Todos eles pensam e aceptam que as mulheres nom somos iguais aos homens, pensam que gais e lesbianas nom som iguais a heterosexuais ... que tem que existir por força a desigualdade. Confundem o diferente co desigual, e assim seguem mantendo a sua estrutura religiosa passe o que passe, sofra quem sofra, e se fai falha, morra quem morra, a lume ou a golpe de VIH.

A verdade é que entendo que tenham que reagir com força... Cada dia hai mais gente que nom lhes reconhece autoridade política, cada dia hai mais gente que questiona a sua autoridade moral e mesmo, cada dia hai mais gente que vive a sua espiritualidade longe das suas imposiçons. Sabem que um passo atrás nom tem caminho de volta, e eles necessitam seguir explicando nas escolas que umha nena de 12 anos aceptou a vontade dum ser superior para que parira ao seu filho, sem ter conhecido varom, assim o dim as sagradas escrituras.
____________

Arroutada conservadorista

2009-03-02T01:17:00.005+01:00

Podo escrever os versos mais tristes esta noite... Volvem as malas pessoas ao governo da Xunta. Volvem os de sempre. Os que sempre estiverom e nom nos deixam nem um respiro. Cruzei muitas mensagens sms esta noite, para compartilhar as lágrimas que nom deixavam de brotar. Volviam as mensagens de volta trazendo mais lágrimas. As da nai preocupada pola bolsa de estudos da sua filha. A da moça lesbiana que nom só chorava, senom que tremava polo tsunami que votou contra os seu direitos fundamentais. O das nais com filhos adoptados, preocupadas por umha sociedade racista... e eu pensando nas mulheres ciganas que nos acompanhárom no Foro Social Galego. Pensando em como nos vai governar esse partido marcado pola ética do enriquecemento e polo ódio à igualdade. Por isso nom os felicito. Por isso nom compartilho a idéia de que umhas vezes se ganha e outras se perde. Porque mentres uns o fam como se nom passa-se nada, ou como que o único que passa-se é que perderam eles a nível pessoal, outras e outros choramos as conseqüencias desta arroutada conservadorista da sociedade galega. Umhas conseqüencias que vam fazer mais complicada a nossa vida, que marcam um escuro futuro. Um futuro que vai quadrar coa imagem que tínhamos do passado recente, o da guerra, o da censura, o da corrupçom, o do caciquismo e a ignorância. Forom três anos, com muitos erros e muitas frustraçons, mas eles levam toda a vida! Som os vencedores da guerra, os que viverom felizes o franquismo e os que agora enchem a boca coa palavra democracia e Galiza, para vomitar as suas políticas de destruçom e marginaçom de quem nom som como eles. Por isso, digo-lhe à metade do povo galego que graças por nada, ou mais bem fixechede-la boa!
Quero dizer-lhes a todas as mulheres que apóiam ao PP, que a sua vissom do mundo alimenta a violência machista. Quero dizer-lhes que as vejo cúmplices do maltrato e dos assassinatos de mulheres. Que o seu apoio aos modelos tradicionais da família, ao modelo afectivo-sexual do Vaticano é o culpável de muito sofrimento. Quero dizer-lhes que o que estam fazendo nom vai libralas a elas, nem às suas irmans, nem às suas filhas da gadoupa do machismo. Quero dizer-lhes que som malas pessoas. E como dizia um admirado diretor dos museus científicos de A Corunha, “ no mundo só vencem as forças do mal quando as boas pessoas deixam de fazer algo”. Recolhamos os anacos de todas e todos nós e vejamos de fazer algo melhor, para seguir caminhando ainda que nos doa.

Hoje vou votar polo BNG

2009-03-01T13:13:00.003+01:00

É dia de eleiçons. Miles de pessoas do nosso país acudiram a votar. Outras miles nom o faram. Levo muitos dias pensando que fazer porque tenho muitas contradiçons que resolver, muitas frustaçons que digerir, mas nom quero que sejam esses sentimentos os que dirijam a minha eleiçom este dia. Sempre prefiro guiar-me pola pergunta, e que podo fazer eu?. Penso que o meu voto, e o de muitas pessoas coma mim, de nom emitir-se, pode significar o regresso do Partido Popular ao governo da Xunta, e a pergunta é singela, de verdade é o mesmo?, nom houvo nengumha diferencia entre a realidade que vivemos co PP, a direita governando desde sempre, e estes quatro anos?. Que vai passar se o PP volve à Xunta?. Que repercussom tem isto na atual conjuntura de crise?.

Puxem numha lista as cousas que me parecerom bem feitas polo governo bipartito, ainda que sempre melhoráveis, e noutra o que julguei mal feito ou que se deixou de fazer e eu cria importante.Melhorou-se e muito, o ensino público e a sanidade, freando em muitos aspectos a sua privatizaçom e recorte de serviços como comedores escolares e condiçons de transporte.Representou para mim um avanço importantíssimo a criaçom das Galescolas, e a do organismo público Consorcio de Servicios Sociais e de Igualdade.A promulgaçom da Lei galega contra a violência machista, e a posta em marcha dum programa, ainda nom rematado, de transformaçom dos serviços de atençom e informaçom às vítimas, assim como em geral as políticas de Igualdade aplicadas. A "Lei de Prevención de Incendios Forestais". O Banco de Terras e a revalorizaçom dos valores do rural. A criaçom das UXFOR. A defensa desde as instituiçons do direito ao aborto. Vimos avances na liberdade de expressom e na presença da nossa cultura na TVG e sobre todo na Radio Galega. A Lei de Costas, que paralisou moitas urbanizaçons planificadas a pé de praia. Medidas de apoio ao aluguer de vivendas. O Plano de construçom de vivendas sociais. O enfrontamento coa multinacional PESCANOVA. O discurso em geral da Conselharia de Vivenda que meteu ar fresco contra os valores neoliberais e o jeito de atuar de especuladores e corruptos. O posicionamento da Conselharia de Ensino contra a subvençom a centros concertados que segregam por sexo, umha pequena medida que criou um intenso debate social.

Mas fronte a isso existiu também a claudicaçom ante a corrupçom e sem razom que significa REGANOSA. Continuou-se co projecto da Cidade da Cultura. Apoiou-se a criaçom de piscifactorias, nom só pola sua ubicaçom senom polo que representam de modelo alimentário. Nom se intentou a insubmissom ante as leis que proíbem marcar um prezo mínimo para o leite. Nom se intentou a insubmissom ante as leis que proíbem que ASTANO recupere a produçom. Participou-se na oferenda ao apostolo pedindo-lhe que remate coa violência machista. Nom se intentou a insubmissom ante as leis que proíbem a criaçom dum grupo energético público e outro de telecomunicaçons. Promocionou-se e favoreceu-se a implantaçom no nosso país de fábricas de agrocombustíveis. Nom se enfrentou o cultivo e consumo de trangénicos, quedando-se só numha declaraçom do parlamento. Nom se intentou a insubmissom ante as leis que proíbem aplicar medidas protecionistas para os alimentos produzidos aqui. Nom se intentou a intervençom das caixas de aforro, para iniciar a sua transformaçom num banco público galego. Nom se desmantelou ENCE e se apoiou soterradamente a proposta do seu traslado às Pontes, onde se chegou, no seu tempo, a promover umha manifestaçom pedindo mais quota de CO2, o mesmo se fixo co maldito AVE. Nom se puxo freio às grandes empresas abusadoras do nosso entorno e parasitas da nossa economia como ENDESA, FENOSA, MEGASA, INDITEX, e o bezerro de ouro CITROËN, que representa um modelo de transporte nocivo e obsoleto.Nom se estivo à altura das circunstancias no último temporal de Janeiro, aproveitando para meter nos tribunais a FENOSA. Mantivo-se um discurso baseado na economia produtiva e o desenvolvimento, na vez da economia necessária ou social e o decrecemento.

Som sobre todo medidas de caractere estrutural, medidas que vam orientadas à deconstruçom do sistema econômico atual para abrir passo a outro modelo. Hai que somar a isto um escasso diálogo e apoio nos movimentos sociais, salvando algumhas excepçons, à hora de elaborar e aplicar as políticas. É paradógica esta situaçom sabendo que som sobre todo militantes do BNG e do PSOE quem conforma em boa parte o activismo social, sobre todo no movimento feminista, no ecologista, no vizinhal e sindical.

Mas a realidade di-nos, que a sociedade galega segue a ser umha sociedade dividida, onde som moi numerosas as pessoas que apóiam o projecto da direita, unida e moi activa, representada, principalmente, polas siglas do PP, e apoiada desde os espaços e instituiçons do integrismo católico no nosso país. Um sector da nossa sociedade que fai umha forte oposiçom ás poucas medidas de esquerdas que se estám aplicar. Ponhamos por exemplo a resistência a talar muitos dos eucaliptos que incumprem a lei de prevençom de incêndios e que tantos destragos causárom nestes últimos temporais. Ponhamos por exemplo a decissom do jurado popular de absolver a quem assassinou a dous moços em Vigo, numha das maiores mostras de homofobia ocorridas no nosso país nos últimos tempos. Ponhamos por exemplo a folga convocada polos médicos que querem cobrar a exclusividade na pública quando se adicam, e muitas vezes com maior devoçom à prática privada. Seria um longo relatório de exemplos de valores, actitudes e crenças que sustentam umha parte ainda moi maioritária da sociedade galega que nom quere cámbios, que nom quere igualdade, que nom quere que se respeite o médio ambiente e nom lhe importa tampouco muito os métodos que se utilizem para conseguir isto. A guerra de Iraque, o Prestige, os escándalos de corrupçom ou mesmo o anacronismo na organizaçom da hierarquia católica e os valores afectivo-sexuais e modelo familiar, nom parecem ter feito melha neste sector povoacional que se mantem mais ou menos inmóvil nos seus posicionamentos.

Hoje, tenhem posta a esperança de volver recuperar esse espaço de poder que nom controlam os seus, porque sim o fam em muitos concelhos, sim o fam em duas deputaçons e sim o fam no poder econômico. Eu vou ponher o meu voto na furna pensando nisso. Em que nom quero que volvam e em que os movimentos sociais, nestes próximos quatro anos, vam ser capazes de acumular mais força e mais organizaçom, para poder conseguir cambiar as políticas e sobre todo porque todas, absolutamente todas as pessoas que queremos umha sociedade mais justa e em igualdade, temos a responsabilidade de conseguir que esta situaçom de crise mundial nom se converta num avanço dos valores racistas, xenófobos, homofóbicos e machistas, que embruteçam a nossa sociedade mediante propostas de cadeia perpetua ou pena de morte, soluçons militaristas e repressom policial. E penso que esse objectivo vai ser muito mais difícil de conseguir cum governo de direitas.

Por quê vou votar o BNG e nom outra força política? Porque miro o mundo cos olhos de galega, e porque é a força com possibilidades que tem mais capital político e humano. Pode ser mirado como excesso de pragmatismo, mas nom penso que o sofrimento que acarrearia umha volta do PP, mereça ser o pago por um voto de castigo ou um voto de aleizoamento.
____________

Palestina no cotidiano

2009-01-17T13:00:00.010+01:00

Estes dias, a enfermidade visitou a minha casa e a muitas pessoas queridas. Som dias onde a companhia, as chamadas de alento e os cuidados som como o ar que respiramos. A cinco minutos da casa todo um sistema de saúde pública funcionando para nós, sem perguntar quanto dinheiro temos no banco, sem presentar nomina nem póliza de companhia aseguradora. Só hai que preocupar-se de escuitar a respiraçom da pessoa enferma, saber ler nos seus olhos se hai melhoria e alegrar-se quando assim é. Na cozinha nos esmeramos por preparar alimentos com mais cuidado, que sentem bem, que transmitam a necessidade que temos de que permaneçam na vida com nós o maior tempo possível e compartilhar muitos momentos felizes.

Mas a enfermidade nom véu soa, junto a ela entrou na minha casa todo o horror que se ia acumulando em Gaza. Intentar sentir por um momento toda a dor reflectida nesses olhos fazia-se insuportável, e as palavras agarravam-se no peito negando-se a subir até a boca, ao saber-se impotentes para explicar tanta desgraza. Cada objecto nas mans convertia-se num milagre, um analgésico, umha toalha limpa, um cueiro, um café quente...Cada parte da casa mostrava-se como refugio e como ameaça, um sofá onde sentar-se, as bilhas coa auga quente, a cama recém mudada...

E para curar a nossa impotência começamos a sair à rua, a encender velas, a cantar consignas, a escrever Palestina, a escuitar na rádio, na TV e ler nos jornais as vozes amigas, que conseguiam sacar do peito as palavras que nós nom arrancávamos, e leva-las à boca, à tinta das imprensas, às ondas. E amanhá domingo 18 de Janeiro, iremos à velha cidade de Compostela para seguir curando a nossa impotência e purgar a nossa culpa, por ter umha casa em pé, pola auga quente, pola luz que fai mais curtas estas noites de inverno debaixo de lenços limpos. E na manifestaçom berraremos contra o estado de Israel..., mas todo o ódio acumulado detrás da ferida sangrante, do corpo sem vida, da cama murchada entre os cascalhos, das mesas baleiras... vai seguir sinalando com dedo acusador a nossa cumplicidade, as nossas prioridades e o nosso jeito de ver o mundo.
___________

Que pode aguardar Europa de Obama

2008-11-24T14:46:00.002+01:00

Nom podemos ignorar, a intensidade simbólica que tem o feito de que um home negro ocupe a Casa Branca. Como se lembrava estes dias nalgúns sectores de EEUU, é umha vitoria que um edifício construído por escravos, vaia estar ao fim ocupado por umha família descendente de escravos. Michelle Obama é-o, e as suas filhas polo tanto também. Todo isto, junto à grande corrente de participaçom e ganhas de cámbio que percorreu a sociedade norteamericana nestes meses, fai que o triunfo do candidato demócrata tenha um efeito positivo em si mesmo.

O que nom podemos é aguardar grandes cámbios na sua política interior nem exterior. A administraçom Obama nom tem pensado someter-se às instituiçons internacionais para a resoluçom dos muitos contenciosos que mantém com distintos povos do planeta. Seguirá mantendo o seu direito a veto no Conselho de Seguridade da ONU. Tampouco tem pensado propôr a disoluçom do BM, o FMI ou a OMC, instituiçons que controla para que sirvam aos interesses da sua oligarquia militarista. É por isso que os sectores socias da Europa que temos interesses comúns na luita contra o neoliberalismo e na construçom dumha sociedade mais justa, nom podemos depositar as nossas esperanças na presidencia de Obama. Começando a sentir, dum jeito mais agudo, as conseqüências da crise financeira (paro, congelaçom salarial, suba de preços nos produtos básicos e na energia de consumo doméstico); aumentando as agressons racistas e xenófobas, sobre todo contra o povo cigano; com vários governos de ultradireita participando nas instituiçons europeias; com constantes ataques aos direitos fundamentais das mulheres por parte dos fundamentalismos religiossos, é mais realista virar a olhada para outros países americanos, onde os seus governos estám pondo freio com políticas económicas e sociais, ao domínio das grandes coorporaçons ou aos designios do FMI, o BM e a OMC. A esperança imo-la pôr entóm, nas nossas próprias forças, e junto ao resto do planeta, nesses proxectos que estám intentando acabar coa pobreza limitando a riqueza.

Lupe Ces
24-11-2008

Publicado na revista "Tempos Novos"
_____________________

25 de Novembro, umha cita em Ferrol

2008-11-23T22:56:00.007+01:00

Este martes 25 de Novembro temos umha cita coa Marcha Mundial das Mulheres numha praça algo desconhecida para a cidadanía desta comarca. É a praça 8 de Março de Ferrol.

Inaugurada por Luisa Sabio, esta praça que leva o nome da data mais significativa para o movimento feminista, encontra-se entre as ruas Rubalcava e Almendra, perto do bairro de Canido.

A Marcha Mundial das Mulheres convoca neste lugar, umha concentraçom às 8 da tarde baixo o lema "Sementando um futuro sêm violência machista", onde ademais da leitura do comunicado, fara-se um desenterramento simbólico dos valores do patriarcado que som as raíces da violencia machista, para sementar no seu lugar os valores da Paz, da Xustiza, da Liberdade, da Solidariedade e da Igualdade, valores cos que se tem que construir umha sociedade livre de violência machista. Neste acto repartiram-se sementes simbolicamente relacionadas com estes valores.
----------

Com passo imparável

2008-10-01T20:40:00.003+02:00

Mulheres urbanas e mulheres das organizaçons agrárias incorporam ao discurso e à prática feminista o diretio à soberania alimentária

Aquelas e aqueles que andámos polas ruas de Vigo o 23 de Maio de 2004, na mobilizaçom européia, nom podemos deixar de emocionar-nos ao pensar na possibilidade de participar numha nova convocatória da Marcha Mundial das Mulheres. Como naquela ocassom, imos ter a oportunidade de marchar, esta vez, junto a mulheres vindas dos cinco continentes, e participar da energia transformadora que aportam tantas vontades e tam diferentes, unidas para construir um mundo onde a pobreza e a violência sejam erradicadas .

As delegadas que provenhem dos setenta países nos que está organizada a Marcha Mundial das Mulheres, vam estar reunidas na Residência de Panxón, concentrando no nosso país toda a energia e sabedoria que se poda desprender destes debates. Som convidadas da cidadania galega, pois som os recursos públicos, gestionados pola Secretaria de Igualdade, o que vam fazer possível que ao longo dumha semana, mulheres de distintas condiçons culturais e econômicas podam ter alojamento e lugar para o debate, num país onde exercer de anfitrionas conleva um alto nível de auto-exigência. Vam ser convidadas dumha cidadania que está convocada a compartilhar com elas a manifestaçom do domingo pola manhá, o Foro e a Feira de Soberania Alimentária, onde as delegadas da MMM vam abrir os seus debates para todas e todos os que nos acheguemos a Vigo o 18 e o 19 de Outubro.

Mentres altofalantes patriarcais, desde o coraçom do Império, anunciam a chegada dum novo feminismo coa figura de Sarah Palin, candidata polo Partido Republicano, arroupada nos valores do militarismo, o racismo, a repressom e exclussom sexual, o enriquecimento sem límites ou a depredaçom da Natureza; o velho feminismo, o múltiplo e variado feminismo, o das pensadoras, o das ativistas, o das artistas, o das velhas e o das novas... o feminismo que bebe e re-escreve os valores da democracia, da justiça, da liberdade, da igualdade e da paz, tece redes no mundo para sustentar umha nova realidade onde melhorem as condiçons de vida e de direitos das mulheres do planeta.

Nessa rede também trabalha, e desde os cinco continentes, a Marcha Mundial das Mulheres, que traz a este velho país, novos ingredientes para engadir ao discurso feminista europeio. Um discurso que tem muito desenvolvido em quanto à loita contra a violência machista, os direitos sexuais e reprodutivos, a representaçom política ou o reparto do trabalho, mas que nesta ocassom tem que deslocar-se do medio urbano, onde construiu a súa palavra e acçom, para incorporar as realidades das mulheres que em âmbitos rurais ou pesqueiros tenhem definida a sua identidade como produtoras de alimentos. Este convite para ampliar a olhada do feminismo europeio, vem feito polas feministas das Américas, da Índia e de África, que participam das luitas pola terra, polos alimentos, pola áuga..., para defender-se das políticas desenhadas pola Organizaçom Mundial do Comércio, o Banco Mundial ou o Fundo Monetário Internacional, que favorecem os monocultivos intensivos, o agronegocio e os agrotóxicos. Estes organismos e estas práticas agrícolas, gandeiras e pesqueiras, definem a produçom e o mercado da alimentaçom em Europa, com conseqüências, ainda nom bem analisadas nem quantificadas, no modo de vida e na saúde das mulheres. Da aliança entre as feministas urbanas e as mulheres das organizaçons agrárias, nasce a necessidade de incorporar ao discurso e à prática feminista, o direito à Soberania Alimentária. Este debate, que vai centrar as atividades do 18 e 19 de Outubro em Vigo, vai permitir também o encontro com todas aquelas iniciativas e proxectos coleitivos, que no nosso país levam tempo dando passos a prol deste direito dos povos, definido pola rede internacional "Via Campesina" em 1996, na Cumbre Mundial da Alimentaçom.

No ano 2000 as mulheres organizadas na Marcha Mundial diziamos que havia "mil razóns para marchar juntas". Neste outono recém estreado, onde a terra, se nom lhe viramos as costas, nos oferece alimentos para superar os rigores da invernía, temos mil razóns para acudir a Vigo e arroupar coa nossa presença e solidariedade, a estas mulheres convidadas da cidadanía galega para fortalecer o seu passo imparável. Com elas expressaremos o nosso desejo de "Cambiar a vida das mulheres para cambiar o mundo, cambiar o mundo para cambiar a vida das mulheres".

Ferrol, 1 de Outubro do 2008
Lupe Ces

Publicado no portal altermundo.org
_______________

A mantenta da celebraçom na Galiza do VII Encontro Internacional da Marcha Mundial das Mulheres

2008-09-25T01:23:00.009+02:00

"O direito ao aborto é o refugio ideológico onde o máis ráncio do patriarcado pretende dar a súa batalha final"

Lupe Ces Rioboo,
docente e integrante Marcha Mundial das Mulleres

O vindeiro Outubro, Galiza converterase no lugar de acollida do VII Encontro Internacional da Marcha das Mulleres, que supón este feito para o feminismo galego?

Por um lado que Galiza seja anfitriona de tantas mulheres, activistas feministas dos cinco continentes, é um reflexo do caminho andado desde o ano 2000, no que constituimos a Coordenadora Nacional Galega da Marcha Mundial das Mulheres. O feminismo galego tem umha história organizativa, de pensamento e discurso, que está na base da vida da Marcha Mundial das Mulheres na Galiza, e também nas distintas expressons feministas que hoje convivem na nossa sociedade, no ámbito cultural, artístico, académico e institucional. Todo o que temos agora debémos-lho a aquelas que na década dos setenta e em plena ditadura reivindicárom-se feministas.

Que se espera deste VII Encontro?

Agardamos que , como passou coa mobilizaçom europeia convocada pola MMM em Vigo no ano 2004, e que reuniu a miles de mulheres na primeira Feira feminista, em tres Foros de debate e numha grande manifestaçom popular, este VII Encontro Internacional seja um passo mais na melhora das vida das mulheres, e polo tanto um passo mais na democratizaçom e na construçom dumha sociedade mais justa. Dentro desta valoraçom, cumpre fazer especial mençom de que com este VII Encontro e as actividades que o vam acompanhar durante a fim de semana do 18 e 19 de Outubro na cidade de Vigo (Foro e Feira de Soberania Alimentaria, Manifestaçom e Milhadoiro, Encontro de Xovenes Feministas ) queremos conseguir tecer redes entre as mulheres do rural galego( o feminismo foi tradicionalmente um movimento de mulheres urbanas), e as mulheres das cidades. Também estamos trabalhando com colectivos e movimentos sociais que até agora semelhavamos ser compartimentos estancos, e este VII Encontro descubriu-nos que temos muitos obxectivos em comúm e podemos aportar distintas perspectivas que se complementam e enriquecem, como é nesta ocassom co direito à soberania Alimentaria.

Cales son as principais reivindicación e obxectivos a acadar durante os próximos anos?

Precisamente as delegadas que tenhem pensado comezar os seus debates o próximo día 14 de outubro na Residencia de Panxón, vam avaliar o Plano estratégico aprovado no Encontro de Perú de hai dous anos, e aprovar a mobilizaçom mundial do ano 2010. Reforzar a organizaçom e o discurso da MMM nos blocos de acçom que nos temos marcado ( Aceso aos recursos e Bem Comúm, Violência, Trabalho e paz e Desmilitarizaçom) nos permitirá chegar ao 2010 preparadas para cumplir cos obxectivos dessa grande mobilizaçom mundial que vimos preparando.

"Aos velhos estereotipos somam-se agora os novos, que falam da ambiçom das feministas, dado que parece que o temos todo acadado"

Cre que os vellos estereotipos sobre o feminismo e as feministas aínda continúan vivos?

Claro que sim, ainda que máis debilitados e cada vez com menos defensores na sociedade galega, falar doutros ámbitos geográficos ou culturais seria mais complicado. O problema é que aos velhos estereotipos somam-se agora os novos, que falam da ambiçom das feministas, dado que parece que o temos todo acadado, ou mesmo da facilidade cos que se consiguem postos de responsabilidade e o subsidiadas e favorecidas que estamos as mulheres neste momento. Som novos estereotipos cos que temos que loitar moi duramente.

O Encontro celebrarase no medio da polémica xurdida trala creación da comisión de estudio da reforma da Lei do Aborto e logo do caso da Clínica Isadora. Que opinión lle merece a decisión do goberno e que principios sería necesario que se recollese para garantir unha lei eficaz?

O direito ao aborto é neste momento o refugio ideolóxico onde o mais rancio do patriarcado pretende dar a súa batalha final. A súa batalha final, para ganha-la e desencadear um proceso de cambio ideolóxico na sociedade e volver a meter no oscurantismo e na dor, a sexualidade das mulheres e a maternidade. Polo tanto a reacçom social, nom só das feministas, senom das mulheres em geral e dos grupos políticos, que apoiarom coa mobilizaçom, as autoinculpaçons e os pronunciamentos públicos e no parlamento, às mulheres e às clínicas acosadas desde algúm julgado e desde algumha organizaçom ultracatólica, foi importantíssima. A polémica vem agora dada pola Comissom de Espertos elegida pola Ministra de Igualdade, onde o movimento feminista ou as clínicas nom estám representadas, e pola eleiçom dentro do Conselho do Poder Judicial, de magistrados que seguem a pensar que as mulheres que decidimos abortar somos umhas assassinas.

Considera que medidas como a paridade das listas favorecen a plena igualdade entre mulleres e homes ou son medidas populistas destinadas a desviar a atención de problemas máis importantes?

Som medidas importantíssimas, que tiverom um efecto inmediato em muitos aspectos. De súpeto passamos de ter listas onde as mulheres nom queriam participar em política, ou nom existiam, a que os partidos tivessem que buscar e deixar sitio para as mulheres, e claro que aparecerom!! Tam válidas ou tam inútiles como os seus companheiros varóns. Que umha mulher perda a vida a maos do seu companheiro é grave, mas isso nom pode ser excusa para deixar de aprovar ou defender medidas que som direitos democráticos como o é asegurar a participaçom política do 50% da sociedade tradicionalmente excluida.

Algunhas mulleres consideran que se está a producir unha rebaixa do ideal feminista. Comparte esta opinión?

Por suposto que nom. O que está a suceder baixo o meu ponto de vista e atendendo à minha experiencia é que o feminismo está em expanssom em todo o mundo e está chegando a todos os ámbitos humanos, mesmo está toleando-lhe a cabeça aos homes das hierarquias religiosas mais misógenas. Um feminismo mais cercano, mais achegado aos problemas reais das mulheres e das sociedades, e um feminismo em coaligaçom co resto dos movimentos de transformaçom social, eis o feminismo que vejo eu no século XXI.

Que futuro lle agarda ao feminismo como movemento político, de militancia e crítico nun mundo globalizado e en plena crise do social?

Ainda que penso quedou um pouco definido na resposta à pergunta anterior, todas desejamos que o futuro do feminismo esteja cargado de éxitos como o está este curto percorrido de dous séculos. Ainda assim somos conscientes das ameazas e dos perigos e atrancos que no presente e no futuro máis inmediato, já nos estám ensombrecendo o caminho, a re-organizaçom e presença mundial dos integrismos religiossos e da extrema direita; a hegemonia do modelo económico capitalista que gera pobreza e destrucçom do planeta. Mas hai que falar de que nos próximos días mais de 150 mulheres reunidas num pequeno país chamado Galiza, vam tecer sonhos dum futuro de Paz, Justiça, Liberdade, Democracia e Solidariedade para toda a Humanidade.

Entrevista realizada polo Movemento polos Dereitos Civís
Publicada no xornal "Gz Nación / En Movemento"
Setembro de 2008
_________

Todas e todos temos um convite para ir a Vigo o 18 e 19 de Outubro

2008-08-26T10:01:00.003+02:00

O mercado de Caranza fecha

2008-07-20T19:57:00.005+02:00

Coa frase "O privado é político" aprendimos que o que sucede na casa e sobre todo o que sucede na cama tem muito que ver coa construçom social e moral. A crença de que cada quem faz o que quere na sua casa, é isso, só umha crença, porque as normas tecidas socialmente que levárom, e seguem levando em muita medida, discriminaçom e desigualdade entre os seus nos, marcam o dia a dia dos nossos afectos, da nossa sexualidade e a organizaçom do nosso espaço e do nosso tempo no privado. Eis o trabalho de desfazer esses nos, alguns deles muito resistentes.

Agora estamos aprendendo que nas nossas cozinhas, ademais de compartir o trabalho, temos a enorme tarefa de construir umha relaçom diferente cos alimentos, porque "o que comemos é político", e as mulheres, que somos maioria na produçom e elaboraçom dos alimentos, temos nas nossas mans a ferramenta para expulsar a enfermiça ambiçom capitalista das nossas cozinhas e das nossas mesas.

A derrota do proxecto de lei da equipa de Cristina Fernández, Presidenta de Argentina, mais corretamente expressado, a derrota dos movimentos populares e de esquerdas para pôr um freio à exportaçom de grao por parte das multinacionais, num país deficitário em alimentos, é umha mala nova. É umha mostra mais do aviso continuado da presença do capital financeiro na alimentaçom. Por extensom, da presença dos especuladores, da gente sem escrúpulos e sem ética, com essa compulsom enfermiza de ganhar dinheiro, ainda que seja a conta da desgraça alhea, e que hoje representam a maioria da actividade económica mundial. Os alimentos estam-se convertendo cada vez mais no refúgio da inversom financeira, e sabemos que sem crise sem que se desequilibre a oferta e a demanda, sem picos nos preços e desestabilizaçom dos mercados, os tiburons nom comem, nom hai benefício financeiro. Aninharom no petróleo, logo na vivenda e agora na comida e na auga.

A Via Campesina, que reúne movimentos agrários de todo o mundo, fala da Soberania Alimentaria como soluçom ao desequilíbrio existente no planeta entre a produçom e a demanda de alimentos. As mulheres de Via Campesina falam de aceso à propriedade da terra, e melhora das condiçons de trabalho e de vida. Falam de agricultura que nom as intoxique nem a elas nem às suas famílias, nem à gente que consuma os seus produtos. Falam de ter presença nos organismos de decisom, que se tire das maus da Organizaçom Mundial do Comércio o poder de decidir sobre as políticas agrárias. Falam de priorizar a produçom e a distribuçom em mercados locais e um mercado mundial com relaçons de igualdade, afastado da especulaçom. Falam dum processo de empoderamento das mulheres do campo e um processo de respeito e cooperaçom mútua na relaçom coa terra da que vivemos.

Imos avançando na participaçom na vida pública, avançando em direitos sexuais e reprodutivos, sendo reconhecidas como cidadás de pleno direito, esta-se a escrever a nossa história e abriu-se o campo da investigaçom científica para nós. É hora de democratizar a economia, porque só numha atividade económica democratizada, longe da ditadura do capital, poderemos ter igualdade.

Em quanto todas estas forças se debatem no mundo, e também na Galiza, no meu bairro de Caranza vai fechar o mercado para abrir um centro comercial. O mercado no meu bairro, foi esmorecendo na medida que iam medrando os grandes Hipermercados internacionais e iam esmorecendo as pequenas explotaçons agrárias em Ferrol Terra, onde a gente, consciente ou nom, meteu eucalipto até a mesma porta da casa, e nom houvo quem recolhesse os conhecimentos agrários imprescindíveis para seguir alimentando a umha comarca que agora come kiwi de Nova Zelanda ou Chile no mês de Julho, ou amorodos argentinos no mês de Dezembro; umha comarca que está afeita, e nom passa nada, a que de súpeto todo o azeite de girassol se retire dos supermercados por estar contaminado e outro dia faltem produtos básicos pola folga do transporte; umha comarca que já está afeita a que os ovos som de cor pálida e os pólos tenhem a auga e a textura das sardinhas. Sim, sardinhas ainda hai, mas competem e muito cos peixes importados e os medicalizados das piscifactorias.

A política do Mercado e do Imperio está nas nossas cozinhas e nas nossas mesas. Precisamos umha resposta política. Precisamos Soberania Alimentaria.
_____________

Conservadorismo

2008-06-30T15:36:00.002+02:00

Ai estivérom, nos cartazes, nos dípticos, nos mitins... muitas, muitas mulheres. Postas por lei, por decreto. Pois sim, foi o jeito de que aparecessem por fim, de que as fossem buscar, de que as tivessem em conta, ainda que quedaramos a fim de contas com poucas alcaldesas, boas e malas, preparadas ou incapaces, honradas ou corruptas, como os alcaldes, mas é umha questom de democracia. Esta vez o conservadorismo ficou mais calado. "É que elas nom querem" repetiam campanha trás campanha. Esse conservadorismo baseado na aceptaçom das cousas como estám, do pessimismo dos feitos consumados. Esse conservadorismo vital na direita e carcinoma letal na esquerda. Esse conservadorismo que vem de falar pola boca de Sarkozy convertendo a "liberté, igualité e fraternité" em "esforço, trabalho e mérito", valores todos eles imprescindíveis, mas que na boca da direita ou do conservadorismo, traduzem-se em privilégios para os que desde sempre tivérom "méritos" sem "esforço" a conta do "trabalho" dos demais. De verdade alguém cre que as desigualdades som um problema de falta de trabalho, esforço ou méritos?

Comentava que o conservadorismo na esquerda é letal. Estas palavras, andam muito da mam por Ferrolterra desde que se permitiu umha prova com gaseiro na planta de REGANOSA . "Agora já está feita!" "Umha vez que se puxo ai hai que apandar com ela!" "Nom morre a gente em acidentes de tráfico?" Tudo isto funcionando como pás de areia que intentam tapar umha das maiores tramas de corrupçom político-empresarial dos últimos anos. Umha trama (documentada em Muros de silencio, trabalho editado pola asociación Fuco Buxán) que vai desde verquidos contaminantes e recheios ilegais na Ria de Ferrol, negócios de carburantes que já estám nos julgados, até documentos oficiais manipulados e pactos secretos entre representantes públicos e empresariais sem escrúpulos. Umha trama que tem a sua origem no Grupo Tojeiro, que se fixo possível pola total identificaçom e cumplicidade do governo de Fraga Iribarne, mas que abrangue cos seus longos tentáculos a sectores que defendem visons produtivistas, antiecológicas e perigosas para a populaçom, com presença na Conselharia de Indústria, nas organizaçons políticas que sustentam o actual Governo da Xunta e mesmo no sindicalismo nacionalista. Nom podemos descuidar tanto a nossa casa! Esse conservadorismo letal polo que campeam sem problemas as políticas neoliberais e contra o que se levanta com muito "esforço" um movimento de resistência civil que soma o "trabalho" de mais de 50 organizaçons e que tem o "mérito" de conseguir romper nos últimos dias os muros de silêncio.

Lupe Ces
Xuño de 2007

Publicado na revista "Tempos Novos" - nº 121, xuño de 2007

Hoje fum ao sindicato

2008-05-16T00:30:00.004+02:00

Estivem nos locais comarcais da CIG da Avda de Esteiro de Ferrol. Fum até ali ao conhecer que a empresa ESHOR, ia intentar outra vez entrar nos locais do sindicato, para arrincar umha retificaçom das declaraçons realizadas numha rolda de imprensa, presidida polo Secretario Comarcal Xosé Manuel Pintos, onde se denunciava um trato escravista para com as trabalhadoras e trabalhadores imigrantes.

Cheguei a ver dous autocarros que transportárom até Ferrol a umhas 100 pessoas, a maioria, polo seu aspecto, peruanos, equatorianos... Diziam que vinham de Madrid, aproveitando o festivo de Sam Isidro. Comezárom a rodear os locais, os de diante com muita força berrando "Pintos mentiroso" termando dumha faixa em galego onde solicitavam à CIG que nom os defendera. Atrás, silencio e passividade. Havia umhas sete mulheres, a mais activa a Chefa de Pessoal, que agarrava também umha faixa. A consigna máis coreada Viva ESHOR! Viva ESHOR! Os ovos que traiam para lançar quedárom esmagados entre os A3 que ficárom no cham. Algumha discussom, berros...

Umha barreira de homens e mulheres da afiliaçom da CIG, aguardavam, junto a duas dotaçons policiais, nas portas do sindicato mostrando algumhas das diferentes fazes que componhem a actividade sindical na comarca.

Dentro da sede comarcal, os comentários iam e vinham. A Direçom estivo reunida no salom de atos, e a normalidade mantinha-se como se podia.

Alguns trabalhadores de ESHOR argumentavam no meio do rebumbio, que eles estavam ali porque por culpa da CIG a empresa estava perdendo contratos. Aqui do que se trata é que empresas como ESHOR desapareçam do sector da costruçom. Empresas que competem deslealmente conseguindo ofertar uns custes mais baixos, mantendo condiçons laborais de escravitude.

Som case 500 as baixas voluntárias na empresa desde hai ano e medio. Parece ser que já as assinam junto co contrato, coa data em branco. Mas tudo isso e muito mais, sairá no juiço que a empresa tem que enfrontar o próximo dia 10 de Junho.De todo isto , para mim nom é nada especialmente salientável. Ao fim, centos de trabalhadores e trabalhadoras que passarom por ESHOR, as suas famílias, amistades... conhecem a verdade e assim se clarificará no julgado, ainda que isso nom seja exatamente fazer justiça.

Mas o verdadeiramente salientável é a agressom e violentaçom da liberdade sindical. O feito sem precedentes da mobilizaçom dumha empresa, que acarretando a uns trabalhadores e a algumha trabalhadora às portas do sindicato, pretende pôr atrancos à acçom sindical, porque esse é o papel que lhe corresponde aos sindicatos, denunciar as irregularidades, denunciar os abusos, denunciar a explotaçom, às empresas piratas e escravistas que fam o seu lucro a base do tráfico de seres humanos.Os julgados, as inspeçons de trabalho, SMAC, o Conselho Galego de Relaçons Laborais... atúam para resolver os conflitos e as denúncias apresentadas e mediar ante a acçom sindical. Assim se vai avançando, ou retrocedendo, em direitos e seguridade no trabalho.

A CIG é um sindicato formado, na comarca, por mais de 8000 pessoas. Dentro da CIG confluem muitas correntes sindicais, e também distintos interesses partidários ou de grupos de poder. À hora de elaborar estratégias de acçom sindical, pode haver diferencias, mesmo choques ou reinos de taifas entre federaçons ou organismos. O que nom sabe quem pretende amordaçar à CIG, que existe a solidariedade obreira, que existe a consciência sindical, que essa consciência e essa história do movimento sindical na nossa comarca, é quem de romper sectarismos e interesses pessoais para criar a barreira que defenda a organizaçom imprescindível da classe trabalhadora. Todo isto seja qual sejam as siglas, seja qual seja o nome das pessoas que num momento determinado a dirijam. É o sindicato, aquilo que temos para defender os nossos direitos, e que está aberto também para a defesa dos direitos daqueles companheiros e companheiras, que traem a pel mais escura, os rasgos dos olhos também diferentes, que sentem mais frio que nós quando chove dous dias seguidos, e a quem a morrinha fai-lhes de companhia porque nom vem muito o sol por aqui.

Gostaria-me que desde a direçom da CIG, e desde as direçons de todos os sindicatos, se propusera umha mobilizaçom do movimento obreiro em Ferrol, para reafirmar a inviolabilidade dos direitos sindicais, e a necessidade dos sindicatos como garantes dumha sociedade democrática.

_______________

Rendistas

2008-05-14T23:41:00.002+02:00

A minha irmá enviou-me esta foto num correio. O cartaz resume, num tom irónico, seguramente sem vontade de faze-lo, qual é a situaçom dos locais que albergam pequenos negócios na cidade de Ferrol. Os rendistas desta cidade som os que fam o agosto. Sabem que onde se aluga, ao pouco se fecha. Neste tempo é difícil competir coas grandes superfícies. Mas nom é problema, onde se fecha ao pouco se aluga, sempre hai alguém que o vai intentar, ainda que desista aos poucos meses. Mentres, os alugueres de escândalo vam enchendo as suas bolsas. Nom podemos esquecer o pequeno detalhe de que em muitas ocassons estes locais nom estam dados de alta ou carecem do estudo de seguridade, ou proxecto técnico correspondente, é dizer, pouca inversom, todo ganho. Concluindo, algum dia alguém escribirá a história dos rendistas de Ferrol, esses ferroláns de pro, e também algumha ferrolá, que coa sua avaricia asfixiarom muito do futuro desta cidade envelhecida.

A fantasma do patriarcado

2008-05-14T23:02:00.002+02:00

Hoje umha nena de 4 anos informou a toda a aula que a sua madrinha dixera que era a moda das pulseiras. A mestra perguntou-lhe que era isso da moda. Muitas fôrom as vozes que voluntariamente explicavam ao grupo que a moda era levar pulseiras, até se dixo que a moda era desfilar coas pulseiras. Entom, no meio das explicaçons, um neno de cinco anos afirmou " a moda é levar as pulseiras para estar guapas e casar". Quando a mestra lhe perguntou se também se levavam pulseiras para estar guapo e casar, o neno dixo que nom, que isso era só cousa de rapazas.

Abriu-se todo um coro de apoio a essa crença tam rotundamente afirmada. Só quando a mestra começou a perguntar se conheciam a algum homem ou rapaz que levase pulseira, comezou a nomear-se a algúm pai, tio ou curmám. Deixo aqui o relato. Deixo neste ponto esta assembléia de pequenos e pequenas. Agora perguntemo-nos como é possível, que estas crenças que mantenhem desigualdades, podam estar tam presentes nestas idades tam temperas. Queria trazer a estas linhas um pequeno exemplo da presença do patriarcado no pensamento das crianças. Um patriarcado que para muita gente nom existe. É certo que pode ser invisível, ou aparecer em pequenas cousas como as que vos acabamos de relatar, mas é o mesmo patriarcado que levou a vida estes dias,de duas mulheres assassinadas em menos de 12 horas polas suas parelhas. Som partes dum todo. Por isso existe e trabalha o feminismo, por isso o esforço em associaçons, movimentos... Levamos dous séculos fazendo reunions, mobilizaçons, escrevendo livros... para destruir a fantasma do patriarcado. Umha fantasma que pode acabar coa vida dumha mulher ou filtrar-se na mente dumha criança.

Quê fai o poder na tua mesa?

2008-05-12T00:16:00.001+02:00

Na década dos 80, Josep Vicent Marques publicava um livro titulado "Quê fai o poder na tua cama?", a onda feminista que arrancou na década dos 70, falava de que o privado era público, e começou a bucear na sexualidade feminina para, em primeiro lugar denunciar a sua existência, negada tanto por científicos como por filósofos e teólogos; em segundo lugar anunciar aos quatro ventos a potência da sexualidade feminina, umha sexualidade nom dependente nem passiva, e em terceiro lugar para separa-la definitivamente da maternidade.

Vicent Marques perguntava Quê fai o poder na tua cama?. Agora queremos perguntar-nos "Quê fai o poder na tua mesa?" e quem di na mesa di na cozinha, di na cesta da compra. As feministas sabíamos que as mulheres no planeta desenvolvemos o 70% do trabalho mas só possuirmos o 1% da propriedade da terra. Somos maioria na produçom de alimentos agrícolas e gandeiros, e somos maioria na elaboraçom desses alimentos, segundo a agencia para a alimentaçom das Naçons Unidas essa porcentagem chega ao 70% nos países empobrecidos.

Desde há uns anos as organizaçons campesinas do mundo estam organizando-se em redes trabalhando por um direito que asseguram é fundamental para a sobrevivência dos povos e do planeta: a soberania alimentaria.

As labregas feministas estam aportando novas reflexons e campos de acçom ao feminismo, nesta ocassom nom só reivindicando o espaço rural e a agricultura como um modo de vida das mulheres onde devem ter assegurados os seus direitos como trabalhadoras e como mulheres, senom empoderando a todas as mulheres como elaboradoras de alimentos para cambiar modelos patriarcais e capitalistas que afetam à saúde das pessoas e do planeta.planeta.Pruduzir alimentos, para consumilos tendo em conta a cultura das comunidades, e nom aceitar pasivamente novos hábitos de alimentaçom mediatizados pola publicidade e as decisons econômicas da Organizaçom Mundial do Comércio e as multinacionais; consumir os alimentos locais, apoiando as agriculturas de proximidade, aforrando a energia do transporte e conservaçom dos alimentos que vam dum continente a outro; nom aceitar alimentos produzidos em monocultivos de grandes terratenentes que nom duvidam em utilizar a repressom contra as comunidades que desenvolvem agriculturas locais nesses países; desbotar o usos de pesticidas e demais produtos que ameaçam a nossa saúde e à da terra; dar-lhe as costas aos alimentos transgênicos... som muitos os princípios que construem o direito à soberania alimentaria. A urgência da crise humanitária que está cruzando o planeta, concretada na subida dos prezos dos alimentos básicos, nos está exigindo olhar às labregas feministas e às suas organizaçons, para poder levar adiante um cambio tam profundo como necessário e urgente: o jeito de produzir e consumir os alimentos, garantindo os direitos das mulheres campesinas e assumindo e pondo em prática as suas alternativas.

Maio de Romeo e Julieta

2008-05-11T23:59:00.001+02:00

Susana Barrul Salazar, tirou-se a noite do 25 de Abril à Ria de Ferrol, desde a ponte das Pias. Tinha 17 anos e ninguém poido salvar-lhe a vida, sucedia na nossa cidade, em Ferrol. A rapaza vivia em Caranza coa sua nai. Nem os medios de salvamento despregados imediatamente na zona, e que despertárom ou mantiverom em alerta a todo o vecindário de Caranza, fórom quem de atopa-la até o dia seguinte, quando recuperárom o seu cadáver. Os meios de comunicaçom refletírom a noticia, todos os jornais, televissons, rádios... reflectiam a nova. O que nom transcendeu foi a morte, uns dias depois do seu mozo, de 18 anos, por sobre dose de barbitúricos. Esta nova só circulou polo bairro, nas conversas mais íntimas, apareceu também nas sempre bem informadas esquelas. As conversas iam acompanhadas da explicaçom do inexplicável, a rapaza discutia coa sua nai porque nom a deixava relacionarse co seu mozo. O mozo quitou-se a vida ao enteirar-se da morte de Susana. Romeo e Julieta em Caranza, numha nova representaçom do assassino chamado "amor romântico", e da intransigência social ante o comportamento afetivo-sexual das e dos adolescentes.

Nunca! nunca perdoaremos o sofrimento e a dor causada polas ideologias políticas, religiosas ou culturais, que mantenhem o amor e o sexo mutilado das alas da liberdade que lhe som próprias. Para Susana, e para o seu moço, as nossas disculpas, por nom chegar a tempo às suas vidas, polas vezes que calamos ante actitudes machistas e sexistas, que negam a necesidade da educaçom afectivo-sexual no curriculum escolar e seguem a manter, dentro das escolas umha formaçom religiosa onde contam que Adam e Eva fórom expulsados do paraíso por comer da fruta proibida.

A liberdade para eleger

2008-04-14T00:31:00.001+02:00

Na prensa de hoje, que incluía os seus suplementos dominicais, aparecia anunciado um novo produto que permite, sem passar polo quirófano, aumentar o volume dos peitos. Trata-se dum gel de ácido hialurónico que se inxecta e precisa de manutençom cada seis meses. O seu preço oscila entre 3.000 e 4.000 euros. Porém, noutra das publicaçons que acompanhavam hoje os diários, dentro dumha entrevista à cantante Rosario Flores, aparecem as seguintes declaraçons:

"Ainda hai quem me sugere que me opere, que me ponha umhas tetas algo visíveis. Custa-lhes entender que eu estou feita para o meu, para pegar saltos derriba do escenario. Ademais, o público nom deve distraerse coas minhas mamas. Tem que fijar-se na minha arte, que é o que importa".

Sei que muitas pessoas mantenhem que a liberdade de eleger é o mais prezado dos bens, e que estas duas respostas ante a possibilidade de modificar o tamanho dos peitos, manifesta a diversidade e riqueza da nossa sociedade. Sei que hai quem pensa que a liberdade para eleger, a liberdade pessoal, está por riba de critérios morais, éticos ou políticos. Mas num mundo, onde se nos demonstra cada dia a necessidade de reduzir o consumo e a produçom, que os recursos som limitados, e as consequências som trágicas par milhons de pessoas, hai quem elege investigar, produzir e vender para o superfluo, para centrar a atençom, no que verdadeiramente importa, um centímetro mais o menos de teta. Eu, desde a minha liberdade pessoal, mostro-lhes o meu mais sentido desprezo.
________________

Resaca de debate

2008-04-13T00:47:00.002+02:00

Sentimos um sabor agridoce polos debates que se dérom no Parlamento espanhol estes dias para eleger ao Presidente do Governo. É um sentimento contraditório. Por umha banda lembramos aquel 8 de Março de 1999, quando as organizaçons feministas e sindicais, percorríamos as ruas de Compostela baixo o lema "Queremos ser um problema de estado", denunciando as agressons machistas e o número de mulheres mortas a maus dos seus agressores. Zapatero acaba de anunciar que vai reunir aos presidentes das Comunidades Autônomas para falar de violência de gênero como um problema de estado. Passárom 10 anos, e moitas mulheres mortas, mas parece que imos conseguindo arrincar pequenas vitórias ao patriarcado. Mas as raízes da violência na organizaçom social, religiosa, militar, na educaçom afetivo sexual e mesmo na organizaçom do trabalho e a economia seguem case intactas, mesmo algumhas, como no caso das estruturas religiosas, parecem apontar um rebrote da misoginia.

Por outra banda, quedárom sem nomear no debate reivindicaçons feministas moi presentes na última fase da legislatura, como é o caso da Lei do aborto. Sorprendentemente só mencionada polo portavoz do BNG, e totalmente esquecida polo candidato a governar.

Estaremos diante dumha legislatura onde se dê um frenazo às políticas de igualdade e de defensa dos direitos das mulheres? Estaremos ante umha política de manter o que se tem sem avançar?

As feministas sabemos, que no caso do direito ao aborto, esta postura política nos deixa na total indefensom. Bota-nos diretamente nas garras dos inimigos das mulheres, os integrismos religiosos disfarçados de defensores da vida. Os mesmos que vem com malos olhos os coidados paliativos. Preparemo-nos pois para estes anos borrascosos.
___________

O seu peso em ouro

2008-04-01T01:06:00.002+02:00

Soraya Saez de Santamaría, vim-na na televisom, radiante, recém nomeada portavoz do PP no Congresso. Beijos, abraços.. dos seus colegas e dalgumha colega também da direçom do partido. Nunca me passou desapercebida desde que começou a aparecer em pantalha. Vim-na em vários debates e atentamente seguim as suas declaraçons sobre diferentes temas, sobre todo saía no verám, quando outros andavam de férias. Nom me passava desapercebida pola sua presença física ou o seu jeito de expressar-se,senom polo que defendia e como o defendia. É o que se chama umha mulher de partido. Defendendo sempre a linha oficial, fosse antes a que marcava a liderança de Aznar, ou agora Mariano Rajoi.

Soraya sabe argumentar ainda quando a sua linguagem corporal nom poda ocultar que nom está convencida do que dí. Mas hoje estava feliz,mesmo descuidadamente peiteada ante as câmaras. Estes anos de esforço pagavam a pena. Uma mulher relativamente nova, trinta e sete anos, num posto destacado da política espanhola representando a um partido com mais de dez milhons de votos.

Nom passou hoje pola cabeça de Soraya que a súa eleiçom poido estar moi mediatizada polo feito de ser mulher, e nova, dado que no outro partido, ao que pretendem vencer nas eleiçons de 2012, a paridade é umha prática cada vez mais afiançada polas reivindicaçons feministas e posta em lei desde o ano passado, ainda coa abstençom do PP. Umha Lei, tímida, mas que o partido de Soraya tem recurrido, primeiro ao Tribunal Constitucional e depois ao de Estrasburgo. Porque pensa Soraya, como a maioria da militância e votantes do PP, que para chegar a um posto importante em política, hai que trabalhar duramente e valer, nom ser um número dumha quota. Pensa Soraya que ela trabalhou e vale, e seguramente será assim. O que resulta insultante para o resto das mulheres é que o Partido Popular pense, ela incluída, que a representaçom minoritária que temos as mulheres na vida pública, incluindo partidos políticos, é conseqüência de que nom trabalhamos o suficiente e nom valemos.Pola contra, todos e cada um dos homes que participam em política som moi trabalhadores e valem o seu peso em ouro.
_______________

O meu tempo, machistas e misógenos

2008-03-30T22:33:00.003+02:00

Umha companheira da Marcha, mandou-me estes dias três artigos de opiniom assinados por José Luis Alvite publicadas no Faro de Vigo. Esta companheira estava ofendida polo conteúdo altamente misógeno dos artigos dete jornalista. Ainda mais ofendida porque o jornal Faro de Vigo os publicasse. A verdade é que os três tenhem umha profunda carga de ódio contra as mulheres e concretamente contra as feministas. Nom vou repetir agora o conteúdo dos artigos. A quem lhe pique a curiosidade que os leia, é moi doado encontra-los na rede ou nas hemerotecas. Um correio moi parecido enviou-me um amigo sobre um artigo dum jornal de Zaragoza, e outra amiga a semana passada, pediu-me que lhe buscasse o artigo de Pérez Reverte, onde pedia poder matar às mulheres que vaiam com roupa nom adequada ao seu físico, segundo os seus critérios estéticos, argumentava este escritor que se se podem matar aos cavalos deveria ter licença para poder fazer o mesmo coas mulheres.

Às vezes penso que quando a alguns escritores se lhes vam acabando as idéias, cada vez mais recorrem ao anti feminismo. Sabem que vam ter resposta, das organizaçons feministas, das feministas e de mulheres que sem reconhecer-se feministas, sentem-se agredidas polos envites destes persoeiros. Nas páginas web, nos blogs, nos folhetos ... vam ter assegurada umha publicidade que elevará o seu índice de popularidade. Como di o refram "que falem de mim ainda que seja mal". Por isso eu nem leio, nem escrevo para rebater aos misógenos. Nem comento as suas frases nem envio emails ao jornal que lhes publica porque nom quero dar-lhes o meu tempo nem a minha energia. Ademais, como a liberdade de expressom acho que é um direito fundamental que quero para mim, como para as demais pessoas, nom pedirei censura destas idéias. Nom leio as suas colunas nem merco os seus livros e ponto! Outro cantar é que com meus cartos, e o dinheiro da cidadania, se sustentem, coa publicidade institucional, medios de comunicaçom que se fam eco do machismo e a misogínia. Mas isso é umha luita muito mais difícil que a decissom pessoal de nom dar nem um dos teus euros, nem um só minuto da tua vida, para aumentar a audiência e a fama destes cultos pregoeiros do patriarcado. É umha loita mais difícil porque ainda com leis de igualdade, com leis contra a violência machista e com mais de trinta canles de televisom das que diferenciar-se, as televisons públicas, incluída a TVG, seguem utilizando tópicos machistas, sexismo e misogínia, para vender séries, e concursos vários. Como se nom fosse possível fazer arte, humor, entretenimento... sem que as mulheres tenhamos que passar pola alfândega e pagar o imposto de peagem. Falta criatividade, que nos permita prescindir do machismo sem cair na "ñoñeria" e os tópicos do políticamente correto. Pode ser que suceda algo tam simples como a história do ovo e a galinha. Que foi primeiro?, umha sociedade machista consumidora duns meios de comunicaçom machistas, ou uns meios de comunicaçom que ajudam a reproduzir o machismo na sociedade? Mentres a pescadinha traba-se na cola, mentres a roda gira, as feministas seguimos a elo, intentando baixar as agulhas para que o trem cambie de caminho de ferro.
____________________

Neste inverno reseso

2008-03-26T23:13:00.002+01:00

Estes últimos dias frios de Março som como umha volta atrás. Como se a vida nom quisera continuar para diante. Como se mostrasse resistência a entrar numha nova porta que significa a chegada da primavera. As eleiçons, a data do 8 de Março, Dia Internacional das Mulheres, a chamada Semana Santa... pusérom-nos diante dos olhos das feministas, um filme demasiado rápido, ademais de intenso e cumprido, por nom dizer espesso. É por isso que esta volta atrás, este inverno reseso, nos convida à reflexom, a observar todo o que está ao nosso redor, o que aconteceu, o que acontece e o que vai acontecer. Para aprender, e começar a primavera de verdade, sentindo que agroma de novo a vida, que sai a luz outra vez intensa também para nós, para as feministas e para os homens amigos das feministas.

É necessário serenar-se para nom cair no desânimo e sobre todo ser conscientes de que o que vemos, pode ser a primeira vista umha imagem distorsionada da realidade. Muitas vezes olhamos só o que nos deixam, e pode parecer que nada muda. Nas escolas, quando se apresenta umha pintura ao alumnado de idades moi temperás, cobre-se a obra de arte cumha cartolina de jeito que se vam abrindo pequenas janelas que mostram um anaquinho de quadro para ir construindo desde os detalhes o que vai ser a descoberta total da obra. Trata-se de ir fomentando a imaginaçom, fazendo hipóteses do que pode haver debaixo da cartolina.
Na olhada que se nos permite desde a maioria dos informativos nom há essa intencionalidade, nem se pretende a reflexom para chegar á percepçom global. Simplesmente observamos a janelinha que se nos oferece. Isto é o que acontece estes dias coas novas relacionadas com o Tibet, o governo chinés e as olimpiadas. Abrirom essa janelinha para que observemos a repressom chinesa sobre os habitantes do Tibet e os seus representantes políticos. Pensaram que cinco minutos de informaçom tras anos e anos de silêncio, nos dem a conhecer a realidade de mais de 1200 milhós de pessoas. Esses minutos sim que nos dam para observar que os sacerdotes representantes dumha outra religiom, também som homes e comprovar a presenza teimudamente masculina em todos os àmbitos de poder do imperio chinés. Abrem-nos a janela para que semelhe que nestes días no mundo nom há defensores dos direitos humanos como o Dalai Lama e os seus seguidores, ou que nom há violadores dos direitos humanos como o governo chinés.

Já mais achegado, abrirom-nos outra janelinha para contar-nos como foi a chamada Semana Santa. Alí onde as feministas vemos integrismo religioso, clasismo, exaltaçom do sofrimento e a construcçom da figura dum Deus tam machista que só lhe valeu umha virge de 13 anos para ser a nai do seu filho, querem que vejamos a importáncia da arte figurativa e o ganho económico polo turismo.

Também abrirom a janelinha da romaria de Chamorro, a primeira do ano que pola chuvia nom foi o lucida que se agardava. Volvimos ver pernas de cera, braços e gente oferecida a umha virge que tampouco dá nada por nada. Dis que exige sacrifício e sofrimento, trapicheando coa gente com cousas tam sentidas como a saúde e mesmo a vida dos seres queridos.

Por isso venhem bem estes dias frios, para saber que som só pequenas partes da realidade, janelas que se abrem para mostrar-nos o que outros olhos querem ver por nós. A realidade, a visom global do quadro que é a vida, toca-nos faze-la a nós, mesmo como no caso das feministas, fazendo os nossos próprios traços, pincelada a pincelada por um mundo mais justo e em igualdade.
____________

Entre luzes e sombras

2008-03-12T17:17:00.004+01:00

Este 8 de Março nom se mezclará na nossa memória com tantos outros vividos. O especial desta data, tivo as suas sombras e as suas luzes. Sombras na proibiçom das manifestaçons feministas. Sombras nos siléncios cómplices. Sombras nos abandonos, nom só polas proibiçons, porque é certo que o convencimento de que se deve fazer o correcto, se juntou ao medo e à incertidume sobre o que está bem ou está mal fazer. Mas também forom abandonos polo conteudo que as feministas da Marcha démos a este 8 de Março. Um conteudo que tocava um tema ainda tabú na sociedade. Um tabú que se junta a muitos outros, todos rodeando os nossos úteros. O feminismo leva décadas intentando que a razom, a ilustraçom e a ciencia liberem os nossos úteros da carga de misticismo, esencialismo e tabú que levam soportando tantos anos.O feminismo vive o aborto como um direito, mentres que ainda umha maioria social ve-o como o inomeavel. Também sombras polos abandonos ocasionados pola claridade da mensagem ao culpar, sinalar e combater as forças reaccionárias que ameazam conquistas arrincadas co esforço de várias geraçons de feministas. Ponhiamos-lhes nomes e apelidos: Conferencia Episcopal e Partido Popular. Este último saiu mesmo na prensa denunciando as mobilizaçons feministas e ameazando com invalidar o proceso electoral. Sombras também polas críticas desde o próprio movimento feminista que aproveitárom um momento de dificuldade para sinala-lo como um momento de debilidade e claudicaçom.Forom muitas sombras.. Mas também houvo luzes. Luzes de solidariedade feminista, luzes dos amigos das feministas que somarom esforços. Luzes de algumhas cumplicidades desde as profesionais e os profesionais dos medios, e é que somos miles as mulheres que tivemos nalgúm momento da nossa vida que exercer o direito ao aborto, ainda que nom nas condiçons mais adecuadas. Foi um 8 de Março onde estivemos moi pendentes de nós. Só na canle Euronews alcancei a ver a manifestaçom de Filipinas, miles de mulheres por umha ampla avenida pedindo direitos e liberdades, denunciando a violencia machista, o tráfico sexual...Elas coma nós coas suas faixas, coas suas cançons...Ali estavam como as de Iram, Turquia, Brasil...Havia eleiçons, havia atentados terroristas, havia manifestaçons de miles de profesoras e profesores, como foi o caso de Portugal, mas nós sabiamos que também era o 8 de Março, Dia Internacional das Mulheres, Dia Internacional de Luita Feminista e em todo o planeta saimos às ruas.
_________________

O preço da liberdade

2008-02-27T08:41:00.005+01:00

Valladolid, Valencia, Cádiz e Madrid, lugar de morte onte mesmo para quatro mulheres, a mais nova, de 22 anos, a que caiu em Madrid, boliviana, apunhalada pola sua parelha. A mais velha 54 anos morria dum tiro numha cafetaria de Valencia. A de Cádiz também morreu apunhalada, tinha 49 anos. A de Valladolid também morreu dum disparo, nom sei a sua idade. Som desconhecidas para mim. Som quatro mulheres que morrérom assassinadas o dia do meu aniversário, o mesmo dia no que cumpria cinqüenta anos, em lugares conhecidos, em cidades polas que eu caminhei. Som mulheres desconhecidas..., ainda que sim compartilhava muito com elas. Como elas, a mim me chegou o tempo de namorar. Comparto com elas a altura do mesado da cozinha presionando lenemente o ventre mentres se agarda polas patacas dourando-se no azeite burbulheante. Na face enrugada amosamos preocupaçom por ter botado leixívia de mais, na água de passar o banho pois nos rasca na gorxa. Som estas e mais ousas... A elas aquelas mans que se foram convertendo em estranhas, arrincarom-lhes a vida, tanto era o ódio acumulado por ser elas! Algumhas estavam coas amigas... como estivem eu onte, dia do meu aniversário, compartindo risas e problemas. Quero pensar que nom vam ser mais, que todo vai a melhor, que nom é reaçom contra a liberdade, que nom é terror aplicado por quem se resiste a perder o domínio... Mas todo me di que sim, que as mulheres imos pagar cada vez mais com medo, com amargura, com sangue e coa vida a nossa liberdade.
_________________

Carlos Aymerich maneja pouca informaçom ...

2007-06-12T01:06:00.003+02:00

Comentando un artigo do parlamentario do BNG Carlos Aymerich, publicado en varios medios de comunicaçom ... "Catro verdades sobre Reganosa"

Carlos Aymerich maneja pouca informaçom porque também poderia botar enriba das pessoas que nos oponhemos a Reganosa mais merda política. Um sector significativo de EU em Ponte Vedra está pola continuidade de ENCE; o BNG n'As Pontes convocou umha manifestaçom para pedir poder contaminar mais, mais cuota de CO2; o PSOE das Pontes quere levar a ENCE para alí ... em fim, os tempos estám tam revoltos que as referências políticas muitas vezes nom se podem buscar nos partidos. Por isso a cidadania de Ferrol temos que unir-nos ao redor do Comité Cidadán de Emerxencia e apartar diferências políticas para luitar contra o perigo que supom Reganosa, para as nossas vidas e para a vida da Ria. Todas as pessoas que nomea Aymerich do Comité Cidadán, do PSOE e IU, e todas as demais que nom nomea, militantes do BNG e votantes, ainda estamos reagindo porque nom damos crédito a que este governo, que por suposto nom estivo na orige de Reganosa, nom só nom revisara todas as actuaçons feitas até agora polo governo Fraga, senom que numha linha continuista recurreu umha das sentencias do TSXG que anulam a tramitación ambiental de Reganosa. Essas sentencias paralisariam a construcçom da planta, porque é assim, ainda nom está em funcionamento, está em construcçom e ilegalmente fazendo provas. Que parte do BNG é o perseguido polas forças espanholistas? O que se move na Conselharia de Industria, que ficou no concelho e vem de levar o nosso voto de castigo ou o que tivo que dimitir do concelho por coerência e está no Comité de Emerxencia, nos barcos cos mariscadores e mariscadoras e na rua agredidos pola policia? Este governo tem feito em pouco tempo cousas moi boas: a lei do solo para proteger o nosso litoral; o banco de terras e a ley de montes que é como umha pequena reforma agrária; as leis de igualdade e de dependência; o consórcio de serviços sociais e as galescolas...mas mentres se construe por um lado, hai quem desfai polo outro virando para políticas neoliberais. Em Ferrol conhecemo-nos bastante. Somos duas cidades numha. Umha cidade vinculada à dereita e outra vinculada à esquerda onde o nacionalismo tem umha presencia moi importante, que nom se puido expresar esta vez em votos. Pois bem, cada quem deve saber de que lado da cidade está, porque o conflicto de Reganosa arrastra tam profundas eivas democráticas, som tantas as ilegalidades cometidas para conseguir ubica-la em Mugardos, que pode seguir tendo efecto dominó em partidos políticos e instituiçons. Ademais, quem está pedindo mao dura neste conflito nom conhece a historia desta cidade, nom se lembra de que nos chamavam a universidade obreira, nom sabe da capacidade política e organizativa que pode chegar a desenvolver cando se amarra à defesa dumha causa que considera justa. Outra cousa é que nom lhes importe que nos deam lenha, que nos queimen, e nom me estou a referir ao gas, porque agora semelha que som mais importantes e estratégicos para o país FENOSA, ENDESA, BANCO PASTOR, CAIXA GALICIA, e um habitual na Conselharia de Industria o GRUPO TOJEIRO...

12-06-2007
Lupe Ces
_________

Por quê umha feminista vai ir manhá pedir a liberdade do Patrom Maior

2007-06-10T02:10:00.001+02:00

Som várias as vozes que, ao longo destes dias, criticam às feministas que participamos nas mobilizaçons que solicitam a liberdade de Bernardo Bastida. Eu som umha dessas feministas e vou ir manhá a unir-me à marcha que estám realizando os mariscadores e mariscadoras desta comarca, junto a pessoas vinculadas ao Comité Cidadán de Emerxencia e organizaçons ecologistas, para achegar-se até o cárcere de Teixeiro. Essas vozes acusam-nos de esquecemento dos graves feitos acaecidos há algúns anos, quando o já daquela Patrom Maior, foi julgado e condenado por agressom sexual a umha trabalhadora da Cofradia. Nom, nom esquecemos. Mas nesta ocassom, Bernardo Bastida nom é detido por cometer um delito, nem como conseqüência dumha outra condena. É detido por participar numha mobilizaçom que tinha como objectivo paralisar a entrada ilegal dum gaseiro na nossa Ria. É detido por ser o Patrom da Cofradia, por ser o representante dos mariscadores e mariscadoras. O Patrom Maior convirte-se assim num prisioneiro de Reganosa, para o que outros poderes prestárom os grilhetes e as celas, dizendo que mantê-lo em liberdade criava alarma social, ou como reza no auto "para evitar um possível delito". E como algumhas feministas estavamos alí, umhas nos barcos fazendo fronte ao gaseiro, e outras no porto agardando e alentando a acçom das mariscadoras e mariscadores, puideramos ser nós mesmas as represaliadas, e assim lhe-lo figemos constar à juíza assinando umha autoinculpaçom polos mesmos feitos polos que o Patrom Maior da Cofradia de Ferrol era detido e levado ao cárcere. E ainda sem esquecer, o que nom se pode é virar os olhos ante a injustiça e deixar que umha luita colectiva entre polos tam desiguais, se julgue polo historial delictivo dumha pessoa. Porque a luita por sacar a Reganosa fora da Ria de Ferrol, é umha luita moi desigual. Dum lado a cidadania da comarca de Ferrolterra, com desinformaçom e mesmo abandoada por algumhas forças políticas e sindicais nas que se sentiu de sempre representada; ameazada e agredida polas autoridades que deveriam defendê-la. Doutro lado ENDESA, FENOSA, BANCO PASTOR, CAIXA GALICIA... os de sempre, com medios de comunicaçom moi fortes como LA VOZ DE GALICIA, e agora também cos contertúlios da Rádio Galega; co governo da Xunta do señor Fraga Iribarne para poder asentar sem problema os começos deste fraudulento negócio; e agora, mercando nom se sabe bem a cámbio de qué, novas vontades numhas administraçons governadas por forças políticas de esquerdas que estaríam chamadas a preservar a vida, o meio ambiente e mesmo a legalidade.

Algumhas vozes se escuitam recitando o historial de Bernardo Bastida... Detrás disto saem outras dizendo que as mariscadoras e mariscadores só querem dinheiro, que nom lhes importou ter a Ria contaminada todos estes anos... e ao melhor é verdade, pois o principal para estas pessoas é defender os 500 postos de trabalho que dá esta Ria e que sabemos que poderíam ser muitos mais. Mas o que passa agora, é que a injustiça de Reganosa resulta já um feito palpável, como resulta já evidente que a planta de gás nom vai ser paralisada de momento polo novo governo, como agardavamos muitas pessoas de boa fê. O que passa agora é que vemos entrar os gaseiros, e ver passar a poucos metros da tua casa um gaseiro arrastrado por vários remolcadores é moi didáctico. O que passa agora é que trescentos milhons de litros de auga da nossa Ria, vam ser cloradas todos os dias do ano e expulsadas de novo a mais baixa temperatura, e isto resulta moi doado de entender, salvo para alguns biólogos e técnicos ao serviço da empresa. O que passa é que, como dixo alguém o outro dia na assembleia cidadá "a gente movemo-nos por evidências". Falta saber que move a outras pessoas a desprestigiar este movimento cidadá. Manhá estarei fronte ao cárcere de Teixeiro, junto às trabalhadoras e trabalhadores do mar. Manhá domingo, estarei, porque outras luitas ao melhor nom compartimos, mas esta é a nossa luita, a de toda a cidadania de Ferrolterra. Tenho boa memória mas A RIA É NOSSA E NOM DE REGANOSA.
______________________

Hoje foi um dia moi duro

2007-05-31T00:55:00.001+02:00

Venho de escoitar na Radio Galega a voz de Ramiro Arca Pichel, director económico administrativo de Reganosa. Decia que as mobilizaçons contra a Planta de Gas, estám danando seriamente a image da comarca, convertindo-a numha zona de difícil desenvolvemento de actividades económicas. Engadia que esta image negativa, tem mais custes que o retraso na entrada da ria dos gaseiros pola acçom das pequenas embarcaçons no mar. Hoje foi um dia moi duro. Duro para todas as pessoas que nos mobilizamos no porto de Ferrol pola convocatória do Comité Cidadá de Emerxencia. Duro para a gente do mar que nom puido aceder às súas embarcaçons e veu como conduziam a prisom ao seu patrom maior. Duro foi estar baixo a pressom de forzas uniformadas e armadas que até diante do próprio julgado demostrarom-nos a determinaçom dos que nos governam, de defender os interesses de Endesa, Unión Fenosa, Grupo Tojeiro, Sonatrach, Xunta, Caixa Galicia, Caixanova e Banco Pastor, todos eles confabulados para fazer da nossa Ria um lugar moi perigosso para viver. Mas somos cada día mais as pessoas que queremos e temos umha outra image da Ria. Queremos umha Ria saneada e viva. Queremos umha Ria que nom mantenha só 500 postos de trabalho do marisqueo, a curto prazo ameazados pola actividade de Reganosa, senom que sabemos que podem ser até 1500, o que daria um pulo muito importante a esta comarca, e sem dana-la, sem ponhe-la em perigo. Dis que o gas é estratégico para Galiza. Mas a verdade é que de Reganosa vai para Meirama (Fenosa) e para As Pontes (Endesa). Duas empresas que levam expoliando Galiza, tanto tempo e com tantos custes ambientais e humanos, que forom e som vergonha para qualquer pessoa cum mínimo de conciência. É a luita por outra maneira de pensar o mundo, é a luita por outra maneira de produzir, é a luita polo controlo democrático da economía. Por isso nom me creo que a image desta comarca seja negativa. Sera-o para empresários sem escrúpulos. Sera-o para empresários da lei do máximo benefício custe o que custe e caiga quem caiga. Sera-o para empresários como os de Pescanova, caprichossos eles, que nom lhes deixárom fazer a piscifactoria no espaço protegido de Tourinham e já nom lhes valia outra cousa, e fórom para Portugal, vaia o demo com eles! E se Reganosa quere ir detrás faremos festa. Mais bem penso eu que a image que queda cada dia mais deturpada é a da própria Reganosa e a dos políticos que a defendem. Por isso Ramiro Arca está preocupado, porque sabe que ninguém dos deles, desses que se vem nas comidas de negócio, na cancha de tenis, nos campos de golf ou na sauna, aprovam a ubicaçom da planta de gas, simplesmente que como já está feita hai que deixa-la como está! Mas é duro para Ramiro Arca Pichel escuitar coa boca pequena dos seus colegas que a ubicaçom é umha machada, que já deveriam ter sabido que iam ter problemas coa gente. Ramiro, desde hai algumhas semanas, vai nervosso a trabalhar representando a Reganosa, a gente da prensa murmura cando passa, hai comentário de costas a ele, confidéncias nom compartilhadas. Ademais Ramiro sabe que cada vez que entre um gaseiro estaremos aí, para dizer que queremos viver, que som ilegais. E até a súa familia, a súa vicinhanza, companheiros da escola das súas crianzas, se as tem, podem começar a sinala-lo como o perigo, uns dos representantes do perigo, o perigo que ameza a nossa vida, cada día mais real, mais palpável, mais sentido.
____________________

Botárom lixo no meu verde jardim

2007-05-10T17:42:00.003+02:00

Comecei a minha faixa, escolhim cores moi vivas e um lenço firme, que terme, como umha vela do vento que zoa quase sempre nas minhas janelas cara à Ria. A minha casa sinala à direita, na outra banda, à planta regasificadora de Reganosa. Por isso ainda que queira, nom podo mais que pensar nela um dia sim e outro também. Sílvio Rodríguez soa na minha cabeça "han tirado basura en mi verde jardin, si descubro al culpable de tanto desastre lo va a lamentar".

Estes días especialmente intensos reconciliarom-me coa minha cidade. Umha cidade que parecia estar resignada a viver enxurrada. Umha cidade que com cada maré adormecia ou acordava ao cheiro dos seus própios escrementos. Mas a minha cidade está viva. Escuitei umha frase que nom sei bem a quem pertence, mas que di "as pessoas nom vivem em sociedade, construem sociedade para viver". A minha cidade está viva porque ante umha ameaça como a que representa REGANOSA construe um movimento cidadá de autodefesa. Um movimento que se ergueu hai mais de seis anos, mas que nestes quatro últimos dias conseguiu um dos momentos mais emotivos vividos a nível colectivo na cidade. As concentraçons no peirao de Curuxeias, a saída dos barcos, o seu regresso co froito recolhido arrincando aplausos e opai! das pessoas que os agardavamos... ainda que ao fim o gaseiro entrou. Ganharom, como soem ganhar-lhe em Ferrol, a quem se organiza contra as injustizas, pola força. Mas é triste pensar que detrás dessas ordes e detrás dessas decissons já nom estám os de sempre, agora estám os de sempre e alguns mais. Triste é reconhecer que alguns som amigos e amigas, ou velhos camaradas militantes noutras barricadas. Triste é escuitar umha frase repetida até fartar "em Ferrol esta-se criando um clima de inseguridade que vai fazer que o empresariado fuxa coas suas inversons a outra parte", e que essa frase nom saia da boca dos de sempre, senom dos de agora. Triste é que o "desarrollismo" dos anos sesenta se instale na Conselharia de Industria, mentres o mundo fai, mais decididamente que nunca, umha condena do modelo económico que o inspirou.

Nom sei que tipo de pactos podem desembocar num despropósito tam grande como é nestes momentos a planta de gás do concelho de Mugardos. Nom sei que tipo de políticas avalam um apoio sem medida a um grupo empresarial que nunca se destacou polo seu contributo ao bem comúm. Nom sei que tipo de políticas avalam um fazer os ouvidos xordos ante tanta voz do movimento cidadá que alerta do perigo para a cidadania. Nom sei que tipo de políticas avalam o considerar que a ameaza da planta de gás queda superada polo interesse estratégico que tem.
Nom sei. Mas o que sim sei é que essas políticas nom me representam, e o dia 27 irei dar o meu voto pola Ria, pola vida, por essa cidade viva e nom escrava dos pactos e os interesses económicos.Esta cidade coa que me reconciliei estes días, onde vemos caras novas e também velhas. Esta cidade onde a soldadura uniu as aristas que levamos cada quem ao lombo, para unir-nos porque está ameazada a nossa vida.

Estou pintando a minha faixa para pendurar da minha janela porque ainda queda muito caminho por andar. E coloquei o livro "Muros de silencio" ao pé da minha almofada, porque Henrique Barrera nolo recomendou hoje como um livro para a luita, que devemos estudar para ordear bem os nossos argumentos e seguir dando o debate por um modelo de desenvolvimento respetuoso coa vida e o meio. Do resto penso que está todo em marcha, quando menos já sei dumha nova cita cidadá no peirau, e umha nova reuniom do Comité de Emerxencia, e umha nova Asemblea Cidadá...
O xacimento romano da fotografia, estava sendo escavado por Patrimonio quando se decidiu construir a planta regasificadora. Os restos do xacimento, agora já desaparecido, estám na actualidade apilados em caixas.

________

Os gemelgos Kaczynski, a nova Inquisiçom polaca

2007-03-16T21:24:00.001+01:00

A notícia da aplicaçom da Lei em Polónia pola que mais de um milhom de pessoas vam ter que declarar se colaborárom ou nom co régime comunista, é o sinal que fai saltar todas as alarmas ao respeito do caminho que vem tomando o estado polaco nos últimos anos. A aliança entre o Partido Lei e Justiça dos gemelgos Kaczynski e o partido Liga das Famílias Polacas, está dando os seus frutos. Estám conseguindo criminalizar as práticas sociais, políticas ou religiosas que se apartem da linha integrista católica que pretende impor-se assim, coa lei e o medo, para criar, no meio da Europa que luita e trabalha polas Liberdades e a Igualdade, um estado confesional onde a moral católica-romana, tam beligerante cos direitos humanos, dicte as leis.

Sr Kaczynski, confeso que militei num tempo no partido comunista UPG, do que guardo luzes e sombras, mas no que me impregnei de valores como a Igualdade e a Solidariedade, que som valores comunistas, valores que inspirarom muitos cámbios sociais muito possitivos e que fazilitárom a criaçom no seio de estados capitalistas como o nosso do modelo chamado de bem-estar.

O aborto em Polónia é ilegal. As políticas de Planeamento Familiar som consideradas perjudiciais para a saúde, mesmo actua no país a organizaçom Farmaceuticos pola Família que se adica a recolher os escasos e carísimos preservativos e destruí-los. Às mulheres polacas incitase-lhes a ter mais crianças mentres a Liga das Famílias Polacas asegura no parlamento que o divórcio é perjudicial para a saúde. A Pátria polaca chama a parir sangue novo, mentres se verte sangue novo polaco na guerra de Iraque. A família patriarcal, que pom a cada quem no seu sítio, e nom mistura os roles que deve cumprir cada parte do matrimónio, é a única garantia para acabar coa violência de género. Umha situaçom que mesmo é denunciada polo Comité dos Direitos Humanos das Naçons Unidas.

Sr Kaczynski, confeso que eu som umha dessas mestres que vostede está disposto a expulsar dos centros de ensino em Polónia, pois intento transmitir os valores do respeito e a liberdade, o que supom incorporar livremente as opçons homosexuais como umha realidade mais, umha opçom das pessoas. Mas comprovo dia a dia que a homofóbia no seu país medra em todos os ámbitos. Os colectivos gays e lésbicos som atacados constantemente pola Juventudes da Liga, e na universidade se censuram ou proibem os estudos relacionados coa liberdade sexual. A homofóbia é mesmo levada aos debates do Parlamento Europeio, onde os representantes da ultradereita polaca venhem de formar grupo parlamentar próprio coas outras ultradereitas europeias encabezadas por Le Pen. A bandeira que lhes une é o racismo, a xenofobia e o antisemitismo, e um modelo social ultracatólico. Todos os valores que impulsárom o nazismo e o fascismo em Europa e que custarom milhons de mortes na Segunda Guerra Mundial, e que sustentárom o regime de Franco mais de cuarenta anos. Mas a legalidade do golpe fascista de Franco é outra das ideias que se propagam em Polónia, como asegurou o mais jovem parlamentário polaco da Liga na sua visita a Madrid com motivo da celebraçom do Foro Europeio contra a violência de género. Mas este jovem ultraconservador aproveitou mais a sua reuniom co Partido Carlista, onde inspirou ánimo a esta organizaçom de ultradereita, que tanto se fixo ver na última manifestaçom convocada em Madrid polo PP, para defender Espanha.

Estou segura que muitas pessoas que se estám manifestando co PP estes meses querriam ver algo semelhante aqui. Mas por sorte, eu tenho umha voda este mes de agosto, casam as minhas sobrinhas; a minha filha pariu umha nena e sei que se o deseja, pode decidir com liberdade ter mais ou nom; no mês de Maio, quando as eleiçons municipais, a Lei de Igualdade obrigará aos partidos a animar e facilitar a participaçom das mulheres nas suas listas... Sei que seguem morrendo mulheres vítimas de violência, que estám as condiçons laborais, que as multinacionais e os bancos imponhem as reglas do máximo benefício, que a especulaçom destrui a natureza,... sei, isso e muito mais, mas hoje, vendo o que passa em Polónia digo que ninguém nos quite o que temos, nem um passo atrás.
________________

Hoje em Estambul

2007-03-04T23:58:00.001+01:00

Hoje 4 de Março, um rio de mulheres percorrérom as ruas de Estambul. Eram muitas, coas cores lilas, coas bendeiras do arco da velha, cos símbolos feministas de diversas formas e cores... Novas e velhas, com velo ou cos seus maravilhosos cabelos ondeando coas bandeiras, porque sim, ia vento e eram vento. Puidem ver essas imagens em Euronews, privilegiada de mim, que ainda me emociono quando lembro o símbolo da Marcha Mundial das Mulheres entre todas elas. Privilegiada de mim que puidem ver como arranca a semana no mundo coas mulheres já na rua, reivindicando os seus direitos. Estes som dias de emoçom. Nós as galegas também imos estar ai, reivindicando outra vida, outro jeito de vivi-la. Porque necessitamos compartilhar o trabalho e trabalhar e produzir doutro jeito para compartilha-lo, e poder ter umha sociedade do coidado, sim, onde se poida coidar às pessoas e as pessoas se sintam coidadas. Nom queremos umha sociedade do consumo e da especulaçom, tam excluinte e esmagadora. Esta semana pensarei em todas as mulheres do mundo, porque todas pensaremos em todas, em todas as que somam esforços por transformar o mundo e em todas as que precisam desse mundo transformado.

A minha emoçom de hoje ao ver às mulheres turcas e kurdas marchando por Estambul, era umha emoçom acumulada, porque esta fim de semana penso que me tocou estar num lugar cumha carga simbólica muito especial. Tratava-se da cafeteria do Auditório na cidade de Compostela. Um dos comedores acolhia o jantar que fechou o acto de homenagem que a Conselharía de Cultura e a Secretaría Xeral de Igualdade organizárom para as mulheres represaliadas polo franquismo. Noutro comedor estavamos as mulheres que participavamos numha Jornada de celebraçom das Mulleres Cristians Galegas. Estiveramos pola manhá escoitando palavras bem tecidas que explicavam os esforços destas mulheres ao longo dos últimos 10 anos, para viver a sua fe e a sua espiritualidade afastando-se da opressom. Logo a professora Amada Traba, levou-nos às origens do patriarcado, aos fundamentos da nossa opressom para devolver-nos a um presente cheio de reivindicaçom e retos para o cámbio. E aí estavamos todas, baixo o mesmo teito. Aquelas que foram represaliadas no nome de Deus e da religiom, e as outras que estám resistindo para transformar a ideia de Deus e de religiom, porque nom renunciam ao direito de viver a espiritualidade, e tampouco aos seus direitos como mulheres. Já no café, olhei cara a porta e apareceu Isabel Vilalba, do Sindicato Labrego Galego. Umha rapaza moi nova que estivera participando como delegada da Marcha Mundial das Mulheres no Foro da Soberania Alimentaria que se celebrou em Mali. Havia dous dias que aterrara o seu aviom em Compostela. O cansáncio que acumulou nestes dias em Africa, nom lhe impediu achegar-se ao acto que ía ter lugar à tarde onde numha mesa redonda tinha que explicar como é que se chegara a construir a sua identidade como feminista. E ali falou, da sua avoa, da sua nai, da sua tia, do sindicato, das labregas... e dixo, como quem anúncia algo evidente, tangível, inevitável, mas nem com mais nem com menos intensidade coa que explicara a sua admiraçom polas cousas que fazia a sua avoa todos os dias..."vai haver um cámbio social muito importante porque hai umha imesa maioria no mundo que nom queremos mais o sistema neoliberal". Sentim que muitas cousas especiais estavam confluindo naquel edificio. E hoje as mulheres de Estambul tomárom as ruas.
__________________________

Considero que o feminismo fixo algo mais que um contributo, reconstruíu os alicerces da própria emancipaçom humana, ...

2007-03-02T14:46:00.009+01:00

Considero que o feminismo fixo algo mais que um contributo, reconstruíu os alicerces da própria emancipaçom humana, porque sentou as bases da construçom da democracia e deu sentido aos valores e aos direitos humanos. No caminho libertador nom se pode escluir ao 50% da humanidade, senom nom podemos falar de emancipaçom nem de justiça. O feminismo fixo possível sair das sombras da caverna de Platom para contemplar a realidade em mais dumha dimensom e coas cores da diversidade. Adentrou-se no privado e na nossa construçom psicológica, questionando mesmo expressom dessa construçom como a linguagem. Só desde posiçons conservadoras ou de desconhecimento se pode afirmar que já nom é necessário. A situaçom das mulheres no planeta indica todo o contrário, e a pluralidade e multiplicidade das expressons feministas som o indicador de que vemos nele umha ferramenta útil, o nosso movimento emancipador. Sendo relativamente recente, se temos em conta a história da humanidade, queda por diante um futuro que aguardamos cheio de conquistas e profundamente transformador.

Na velha Europa podemos considerar que hai um caminho andado, mas se observamos os efeitos da violência contra as mulheres, a situaçom do direito ao aborto, o modelo económico de produçom e consumo que asfixia a reproduçom e o coidado humano, a religiom maioritária profundamente misógena ... comprovamos todo o que queda por fazer e o importantes que som avanços como o que se deu em Portugal co resultado do referendum do aborto, ao frear um integrismo que está em plena ofensiva por manter em Europa as estruturas patriarcais. A incorporaçom de novas geraçons de feministas, ainda num país tam avelhentado coma o nosso, ponhem um ponto de optimismo nessa olhada cara esse futuro trabalhoso.

Caranza, 25 de Fevereiro de 2007
Lupe ces

Publicado na revista "Tempos Novos" nº118 Marzo-2007
_________

Entrevista en Praza das Letras: Le comigo

2006-12-10T09:26:00.001+01:00

Praza das Letras - Le comigo

Docente e integrante da Marcha Mundial das Mulleres
Lupe Ces Rioboo

10-12-2006

Cal foi o primeiro libro en galego que liches?

O meu primeiro libro en galego foron os Cantares Gallegos. A asociación de veciños á que estaba vencellado o meu pai entregaba uns premios consistentes nas obras completas de Rosalía de Castro. Había volumes sobrantes por alí, e foi así como chegou ás miñas mans.

E un libro que fose especialmente importante na túa vida?

Sen dúbida o libro que máis me marcou foi Sempre en Galiza, de Castelao. Lino cando tiña 17 anos, en 1974.

Que libro che gustaría ler en galego? Algún relacionado co teu ámbito profesional?

A nivel xeral El Quijote. Non sei se está xa traducido, pero gustaríame ter a oportunidade de lelo en galego. No ámbito profesional, todos os libros da editorial Grao. Os seus traballos achéganse moito ás necesidades que hoxe en día se nos presentan na docencia. Actualmente están dispoñíbeis en castelán e catalán. Podo lelos en castelán, porque o entendo, pero preferiría facelo na nosa lingua.

Cal pensas que podería ser un referente para a xente cativa e nova?

Depende moito da idade. No nivel de infantil, co que eu traballo, O coelliño branco é todo un éxito literario. Pero tamén gozan moito coa literatura de maiores, gústalles moito a poesía de Rosalía, que chegan a aprender de memoria.

Que libro pensas que ha de acompañar o teu nadal?

Agora mesmo estou lendo Camiño errado, dunha feminista francesa, que rematarei nas festas. Trátase dunha reprobación feroz ao feminismo desenvolvido nos dez últimos anos. Sempre está ben escoitar as críticas ao que estamos a facer...
Cal has de querer agasallar?

Pois posiblemente tres obras da editorial Grao, que antes comentaba. Trátase de libros que reflexionan sobre a acción comunitaria e o movemento asociativo.

Publicado na Revista impresa "Praza das Letras" e no sítio web "Le comigo".
_____________

25-N

2006-11-21T22:49:00.002+01:00

A realidade monstra-nos que em muitos países do planeta os direitos das mulheres nom som reconhecidos, e nom existem leis que as protejam fronte ás violências que as afectam. Porém, na Galiza, como em muitos países europeios da nossa área de influência, vivemos um presente político e social onde actuam instituiçons que promulgam leis que contemplam medidas integrais de protecçom ás vítimas de violência; redactam-se e aprovam-se leis de igualdade, e desde os meios de comunicaçom assistimos a umha condena sem precedentes do maltrato e os maltratadores.

Mesmo assim, as mulheres continuam a ser assassinadas polos seus agressores; as denúncias continuam a ser contabilizadas a milheiros cada ano; duas de cada dez pessoas na Galiza conhece algum caso de violência de género [1] e as novas geraçons reproduzem os roles e valores sexistas nas relaçons afectivo sexuais [2].

Ante esta realidade e a um ano da aprovaçom da Lei Integral Contra a Violência de Género no parlamento espanhol, e ás portas de ser aprovada a primeira Lei Galega para actuar cara ao mesmo objectivo, cumpriría que desde o feminismo se afirmara a necessidade de reflexom e de acçom em dous pontos:

*As Leis nom podem ficar no papel, necessitam meios para desenvolver-se e aplicar-se.

*Nom se erradicará a violência contra as mulheres mentres nom se avance no cámbio social e este se consolide.

Os serviços assistenciais, jurídicos e policiais que existem até o momento ao aveiro da Lei, nom garantem na maioria dos casos umha atençom integral ás vítimas de violência [3]. Existe ademais um imenso valeiro no planeamento do enfoque e medidas concretas em serviços fundamentais como saúde mental e ensino. Devemos continuar exigindo umha optimizaçom dos recursos, ampliaçom de orçamentos para desenvolver as leis e novas medidas que as completem.

Mas também devemos exigir-nos a nós próprias, e exigir a todo o tecido social um maior compromiso na luita pola erradicaçom da violência contra as mulheres. Lembremos que três de cada quatro pessoas que conhece situaçons de violência nom as denuncia [4]. Esa erradicaçom nom vai vir só da promulgaçom de leis e da actuaçom desta ou daquela outra administraçom, ou da aplicaçom de políticas mais ou menos ajeitadas que paliem os efectos da violência, senom da assunçom por amplos sectores da sociedade dos valores feministas [5].

A construcçom dessa nova sociedade esta-se fazendo dia a dia, com a luita de muitas mulheres no activismo feminista, mas também na suas casas, no seu entorno familiar e social e a solidariedade e complicidade dos homens que rexeitam um género construido desde a desigualdade e a opressom. Mas cumpre acelera-lo e fortalece-lo, e nom baixar a garda ante os cámbios políticos perjudiciais para as mulheres, que se estám a dar em Europa. Esse cámbio social é o que pode garantir que a vida de tantas mulheres nom fique apagada ou segada pola violência.Essa mudança começa polo respeito, exijamo-lo.

Assinado.-Lupe Ces
25 de Novembro de 2006

___________________________
Notas.-

[1] Informe Outubro 2006 sobre a percepçom da violència de género da Secretaria Geral de Relaçons Instritucionais da Conselharia de Vicepresidencia da Xunta de Galiza.

[2] Informe de Maria Jose Barahona, profesora da UCM

[3] Informe de Amnistia Internacional 2006 sobre a Violência de Genero no estado espanhol.

[4] Informe Outubro 2006 sobre a percepçom da violència de género da Secretaria Geral de Relaçons Institucionais da Conselharia de Vicepresidéncia da Xunta de Galiza.

[5] A Carta Mundial das Mulheres para a Humanidade desenvolve os valoras da Igualdade, Solidariedade, Liberdade, Justiça e Paz. www.marchemondiale.org
___________

Um impulso popular ao Dia das Letras

2006-05-22T22:22:00.002+02:00

Este ano 2006 a celebraçom do aniversário da publicaçom do livro de Rosalia de Castro, Cantares Gallegos, pareceu ter um novo ritmo e fôrom muitas as iniciativas que ao longo do país tivérom como objetivo a reivindicaçom da normalizaçom do galego como língua própria da Galiza. Mas segue a ser escasso o número de pessoas que participárom em cada umha destas iniciativas ainda que a manifestaçom de Compostela organizada pola Mesa de Normalizaçom Lingüística convocara alguns miles. Digo que é escasso pola situaçom de emergência que vive o nosso idioma e cumpre intentar outras iniciativas que em datas tam sinaladas coma esta das Letras, convoquem à maioria social a expresar o sentimento e a consciência colectiva, que independentemente da identificaçom com proxectos nacionalistas ou nom, vivem a identidade da Língua e a cultura comúm..

Aguardava-se que desde o novo governo se impulsase algo mais que actos institucionais ou a participaçom de cargos eleitos na manifestaçom da Mesa. Ao final o mais novidoso resultou ser a programaçom da TVG, que por primeira vez refletiu umha jornada diferente e mesmo propiciou nalguns programas pequenos debates sobre a situaçom lingüística.

Cumpre ilusionar a umha parte importante da cidadania na defesa, ainda que seja por um dia, de umha língua e umha cultura própria, e sentir e visualizar a identidade colectiva com propostas criativas e cargadas de simbolismo, que arredem da luita partidista a questom do idioma. Sem essas propostas, o dia feriado das Letras Galegas, converte-se para a maioria social em umha oportunidade de descanso, e se cadra bem colocado, para desfrutar de ponte laboral para mesmo realizar umha pequena viagem ou visitar à família. Só nos meios de comunicaçom aparecerám pequenos sectores que continuam mobilizando-se, ou instituiçons que representam umha maioria, mas que nom alcançam a comprender a necessidade de comprometer a participaçom cidadá nas suas políticas, também na defesa da língua e cultura do país.

Muitas pessoas com militáncias políticas,tenhem comentado que desde que o Dia das Letras é feriado, os actos de celebraçom e reivindicaçom tenhem mermado nom só em número, senom em participaçom, e muitas se perguntam se nom seria mais acaído que este fosse um dia laborável onde nos centros de trabalho e de ensino se volvesse às raízes do debate da necessidade de falar o galego e defender os direitos lingüísticos das pessoas que habitamos este pequeno país.
Estas análises nom reparam na debilidade do movimento associativo cultural, no próprio envelhecimento da populaçom galega ou na presença da nossa língua e cultura dentro do currículum escolar, o que converte em obsoletas, actividades que resultavam atrativas nos anos 80 e 90, quase sempre girando ao redor das figuras do santoral literário.

Pola contra, cumpre aproveitar este dia feriado para convocar a identidade colectiva e monstrá-la publicamente, olhando-nos, reconhecendo-nos na pluralidade que representamos e polo tanto independentemente das reivindicaçons que cada colectivo social mantém e deve também mostrar esse dia, completando esse abano que deve dar um ar novo, um impulso popular à construcçom e conservaçom da identidade.

Na celebraçom do 25 de Julho, som as distintas alternativas políticas e partidárias as que protagonizam a data apresentando distintos projectos para a construcçom do projecto nacional. O debate político sobre os problemas do país e quais som os melhores caminhos para solucioná-los, a análise da conjuntura na que se move esta velha naçom que se esforça por ser também no século XXI, passam a primeiro plano. Umha data para a mobilizaçom, a expressom política na rua e os discursos de quem pretenda ou simplesmente esté no seu destino, liderar um projecto chamado Galiza.

Estamos assistindo a um moi positivo e celebrado processo polo que a nossa sociedade, muitos anos confessional católica, está redefinindo-se em umha sociedade laica, este processo, é certo, está sendo muito mais lento do desejado, ainda assim parece irreversível. As datas festivas já nom tenhem o sentido religioso da época franquista. Seria bom contar-mos com datas feriadas onde nos reconhecesemos todas e todos, independentemente das crenças religiosas. O feito de que na Galiza a grande maioria social seja galego falante ou quando menos nom rejeite o uso do galego em momentos determinados da sua vida, favorece a possibilidade de celebrar essa identidade colectiva dum jeito lúdico e á vez profundamente simbólico.

Imaginemos que desde as instituiçons galegas e desde os colectivos sociais se convoca-se à sociedade galega a participar activamente num Dia das Letras Galegas diferente. Um dia onde todas as pessoas que vivemos na Galiza poideramos aguardar que alguém nos agasalhasse cum livro, um cd ou um filme na nossa língua, ou que as pessoas que temos mais próximas no-lo oferecesse como agasalho. Um dia onde, ainda feriado, as livrarias de todo o país organizassem feiras nas cidades e vilas para que isto fosse facilitado, e para servir de ponto de encontro. Um dia no que todas as pessoas levaramos um sinal que nos identifica-se coa nossa língua, por exemplo umha flor de tojo ou de gesta, que também poderia sinalizar os carros, os autocarros, os estabelecimentos públicos ou as xanelas e portas das vivendas. Um dia onde se comprometesse a todos os grupos que trabalham pola recuperaçom do folclore popular, e a todas as pessoas que assim o dispuserem, a que saisem à rua engalanados cos trajes tradicionais para tomar as praças, e brindar dança e música,... e teatro e cinema ao ar livre, e concertos de música em galego, e novas danças inspiradas nas nossas raízes..., um dia festivo e reivindicativo da língua e a cultura. Umha festa para desfrutar colectivamente e lembrar também, que há anos, tivemos a sorte de que umha mulher tivo a disposiçom de volver a dar à nossa língua um formato escrito e começar um processo de dignificaçom do galego que cumpre que continuemos nós, habitantes da Galiza, explorando todos os caminhos possíveis.
_____________

Das duas cidades que conformam Ferrol

2006-04-17T00:34:00.003+02:00

Nom gosto de que me mintam. Som consciente do necessário lugar que ocupa a mentira no comportamento humano. No mundo infantil, a mentira é considerada um indicador de inteligência das crianças para sobreviver às regras do mundo adulto. Mas as crianças nom toleram bem a mentira adulta, polo de desorientaçom que representa, por inesperada e pola confusom e frustraçom que leva aparelhadas. Pois bem eu tampouco a levo bem, mas ao medrar numha família muito numerosa onde cada quem guarda no seu subconsciente lembranças diferentes que podem dar lugar a múltiplas versions do mesmo feito, aprendim a conhecer a verdade como algo relativo e valorar mais nas pessoas os seus feitos, afectos e atitudes, que o que contam, ainda que incluam pequenas coleiçons de mentiras mesclando imaginaçom, desejo e realidade.

A mentira de quem impom as regras, as normas, ou se encarga de mante-las, deveria ativar no organismo coletivo umha reacçom de incompatibilidade que frustrara automaticamente qualquer intento de manipulaçom. Mas nom ocorre assim, como se este organismo colectivo que conformamos as pessoas nas suas formas mais variadas (comunidades familiares, classes, povos, gêneros, minorias...), nom apresentara capacidade genética para fazê-lo, e fosse só trás um longo processo de criaçom de anticorpos que puidera frear a imunodeficiência que nos caracteriza. Os movimentos Nunca Mais ou o efeito derivado da informaçom do governo Aznar sobre os atentados do 11-M, som dous exemplos que me cadram nesta teoria.

Esta reviravolta introdutória quere levar-vos a umha mentira que a Cámara de Comércio de Ferrol elaborou há uns dias, e que o jornal La Voz de Galicia elevou a nova de primeira plana na sua ediçom comarcal. A Cámara de Comércio assegura que a celebraçom da Semana Santa ferrolana trai à cidade 50 vezes mais de benefício que o que se inverte ne-la. As contas da Cámara de Comércio som simples. Para fazê-las utiliza umha folha de cálculo onde aparecem dumha parte os ingressos, é dizer, os subsídos que venhem das arcas do próprio concelho, a Deputaçom ou a Xunta, e por outra parte os supostos ingressos nos negócios de hostelaria da cidade que podam aportar os miles de visitantes que acudem nestas datas a Ferrol.

Esta é umha dessas mentiras que resulta de valorar um feito polo que parece obvio, sem reflexom sobre efeitos e consequências que conleva, ou sem capacidade de reflexom que associe idéias e busque mais além do que se vê.

Para luitar contra umha mentira, nom cumpre mais que desmonta-la em cada um dos argumentos nos que se construa. Existe primeiramente umha crença que assegura que a gente acode a Ferrol a ver as manifestaçons religiosas. Mentres nom se realize um estudo sociológico que o confirme, eu também podo assegurar que o que impulsa à gente a vir à nossa cidade é mais bem o mesmo impulso que move a outra a visitar a Feira do Encaixe de Camarinhas, ou os múltiplas balneários que salpicam a nossa geografia e prometem uns dias de relaxaçom, cámbio ou simples curiosidade, entendida como ganhas de conhecer.

Tampouco é de esquecer que Ferrol é hoje por hoje umha cidade de emigraçom, com um fluxo constante de perda de habitantes. Esses mesmos habitantes que retornam em datas moi sinaladas, Nadal e verám incluidos, e como nom, nesta semana onde muitas pessoas desfrutam dumhas pequenas ferias que lhes permitem viajar com um pouco de tempo. Nestas datas sentimos as ruas mais cheias, e os negócios sintem um pequeno impulso que ainda assim, nom evita a constante pingueira de feches que entre carteis de “aluga-se ou vende-se” esta-lhe dando um ar fantasmagórico ao nosso casco urbano.

Teríamos as mesmas visitas? Regressariam a Ferrol as pessoas nadas na cidade e agora fora por razons laborais? Acudiriam a outras ofertas de ócio caso de que as expressons católicas que percorrem as nossas ruas nom tiveram o apoio dos cartos públicos, e se limitassem a umha expressom expontánea de religiosidade e nom a uns actos assumidos como beneficiosos por interesse turístico? Ou o que é mais importante, realmente som mais os benefícios ou os perjuiços que arrodeam à celebraçom da Semana Santa ferrolana?

Polo que eu tenho valorado, a Semana Santa ferrolana tem uns custes engadidos que fam pensar em grandes perdas para a populaçom em geral. É umha actividade que, tal e como está concebida, repercute negativamente na sociedade, com elevadíssimos custes económicos. A minha folha de cálculo tem muitas mais entradas que a da Cámara de Comércio.

Quando umha estrutura religiosas está permanentemente vinculada ao poder numha sociedade, como é o caso da nossa, pensemos na figura do Arcebispo Gelmirez, a Inquisiçom ou a simbiose entre a Igreja católica e o franquismo, é muito difícil observar como irregulares certos comportamentos dumha sociedade democrática, que para sê-lo, deve ser também laica. De aí as irregularidades que se apresentam se pensamos que dos orçamentos do estado, a Igreja Católica percebe do estado, instituiçons autonómicas e municipais, uns 3.004.988.280€, é dizer, mais de três mil milhons de euros, e dessa cifra só um 15% se recaudam através do 0,54% voluntário que as pessoas declarantes a Fazenda podem doar, sem que o Estado cobre à Igreja Católica polos serviços de recaudaçom gratuita dessas doaçons. Esse dinheiro é aportado por toda a cidadania, independentemente de que esteja de acordo coas doutrinas e políticas morais do catolicismo dominante.

Os salários de sacerdotes, os colégios religiosos concertados, as infraestruturas (igrejas, colégios, rectorais...), que se utilizam como base para organizar e alimentar este tipo de manifestaçons religiosas, correm como gasto a conta dos cartos de toda a cidadania. Mais ainda, utilizam-se as Forças Armadas e os Corpos de Seguridade do estado para dar-lhe aos desfiles um carácter de oficialidade e pensamento único possível que visibiliza a ligaçom entre o poder religioso e o político.

Poderiamos pensar que esta vinculaçom Igreja-Estado, renovada polos Acordos coa Santa Sede em 1979, podia partir da idéia de que a cultura, a sanidade, a educaçom, som um direito, nom um negócio, e polo tanto o direito à desenvolver a própria espiritualidade ou a colectiva, também deve estar garantida polo Estado, mas o que defendem esses acordos é a perpetuaçom duns privilégios por umha instituiçom que está exenta de impostos e tem mais propriedades em bens imobiliários que o próprio estado.

E ainda há mais, porque nom é já o que nos custa a toda a cidadania manter umha Igreja coa que nom coincidimos nos seus critérios morais a maioria da populaçom, basta ver as estatísticas favoráveis ao divórcio, aos direitos de homossexuais e lesbianas, aborto, uso de preservativo...senom os enormes custes em quanto a saúde mental e sexual que a influência do catolicismo oficial acarrea à nossa sociedade. A última declaraçom do Bispo de Ourense fronte ao matrimónio celebrado entre um concelheiro do Partido Popular e o seu moço, agora já esposo; ou a do portavoz da Conferência Episcopal, condenando a masturbaçom, as relaçons sexuais fora do matrimónio, a homosexualidade, o aborto e a eutanásia, levantam todas as fantasmas dum modelo social gris e repressor, onde as pessoas nom podem ser felizes. Um modelo social que coincide com o defendido no seu momento polo Consejo Local del Movimiento, ao que pertencérom na sua última época na nossa cidade, algumhas das pessoas vinculadas à organizaçom das Confradias da Semana Santa ferrolana. De aí o gosto polo sofrimento, a morte associada à tortura, o lujo dos materiais, a hierarquia militarizada, e as vestimentas herdadas da tradiçom inquisitorial. Essa é a simbologia na que se expressa a espiritualidade nas ruas ferrolanas.

Há uns dias coincidim num acto celebrado no Ateneo Ferrolám, baixo o título “Feminismo enfermo de satisfaçom”, com um home que detentara um cargo de responsabilidade na Camara de Comércio durante muito tempo e agora já está jubilado. Aproveitou a sua intervençom desde o público para argumentar em contra da incorporaçom das mulheres ao mundo laboral e culpabilizar aos novos modelos de família da violência de gênero. A sua idade nom justificava a sua postura claramente sexista e discriminatória, mas o situava anclado no modelo social e político que o encumbrara e lhe dera o controlo do que agora parecia se lhe escapava das mans. Mas que é o que justifica agora a valoraçom da Cámara de Comércio e o efeito lupa aplicado por La Voz de Galicia ?

As novas geraçons que tanto desde as instituiçons como desde as estruturas económicas deveriam dar um impulso à nossa cidade, carecem de projecto, de idéias, de criatividade, de visom de futuro, e seguem construindo em falso umha cidade que se vem abaixo. Umha cidade escrava das elites que a dominárom e a governárom desde que decidírom fusilar ao alcalde que representava umha modernizaçom baseada numha sociedade laica. Junto a Quintanilha, todas as cidadans e cidadaos que sonhavam e construíam esse futuro. E como símbolo do círculo que ciclicamente se repite, pechando esperanças defraudadas, esforços de cámbios nom logrados, de defesas coletivas inconclusas, no 72 ou nas sucessivas reconversons do nosso monocultivo industrial, os baches nas estradas ferrolanas abrem-se umha e outra vez para lembrar-nos que estamos fazendo-o mal, construindo umha cidade sobre gándaras, intentando permanentemente soterrar os seus rios e as suas fontes; fechando em falso feridas, que como a da Ria supuram com cada marea baixa um cheiro pestilente resultado da batalha entre as duas cidades que conformam Ferrol, a cidade dos vencidos e vencidas, mortalmente ferida pola sangria da polpulaçom mais jovem; e a cidade dos vencedores e vencedoras, totalmente estériles e agonizantes num modelo social e económico esgotado e mórbido para todos os seres que respiramos por estes lugares.
____________________

O desejo...

2006-04-10T19:44:00.002+02:00

Aguardo que encontres do teu interesse este blogue, que che seja útil, como encontro eu útil, e me confortam, as ideias e pensamentos, sugerências e reflexons que compartilham comigo todas as pessoas que creem na construcçom do colectivo.
___________

Por favor, parade isto!

2005-07-27T13:31:00.003+02:00

Escrito postado no nodo galego da rede Indymedia em Julho de 2005, em relaçom dumha acçom contra um caixeiro automático em Compostela e a detençom de duas pessoas vinculadas a organizaçons independentistas. Posteriormente esta postagem foi reproduzida por outras pessoas no Foro Vieiros e noutros blogues suscitando diferentes reacçons.

POR FAVOR PARADE ISTO!!!

Eu também concordo com o que se di no escrito que inicia estes comentários mas quero faze-lo, segundo o meu critério, desde umha postura mais crítica que a que vejo reflectida aqui. Quero falar das conseqüencias que tenhem este tipo de actividades políticas violentas, nom só para as pessoas que as executam (cárcere, morte, lesións, enfermidades mentais,marginaçom social...), senom, e mais importante para mim, quem som as vítimas reais destas acçons armadas e que frutos se recolhem delas. Tudo isto, quero aclarar, som ensinanzas que eu saco da experiencia de ter vivido moi de perto um proceso de loita armada neste país ainda muito recente. Daquela experiencia saem estas reflexons, que agardo podam ser de utilidade para evitar sofrimentos inútiles e feridas que som muito dificis de curar quando nom impossiveis de cicatrizarar. Confio que nom se califique este escrito com os clichés cos que se manexam estes temas quando falam as bombas e as pistolas.

“Quem anda com coitelos acava cortando-se” di ao meu entender moi sabiamente o dito popular. Na Nova Poesia Galega, onde se recolhia o ideario do EGPGC, falava-se de que nom se ia atentar contra vidas humanas. A prática armada demostrou que ainda que a vontade seja moi clara, a violência mata, e sobre a conciência das pessoas que nos tocou viver esse proceso dum jeito ou outro, estám as quatro vidas perdidas: na organizaçom armada, Lola e Jose; a do guardia civil de Irijoa e a da moça de Vigo que estava na discoteca Clangor.

Quem pujo a bomba no caixeiro de Compostela pensou na possiblidade de ter quitado a vida ou ocasionado feridas a pessoas que passaram por ali nesse momento? Estám dispostas essas pessoas a que a vida de outras passe como umha pelota de mao em mao dependendo de avisos telefónicos e da vontade das forças do estado para actuar dum jeito ou outro? Som danos colaterais? Sim? Entom somos o mesmo que os imperialistas, mas ao nosso nível, à nossa escala, porque se tivessemos o seu poder, as suas armas, os seus números, reproduciriamos os mesmos esquemas de sociedades autoritárias, violentas e agressivas, é dizer, imperialistas, onde a ideia de que o fim justifica os meios, serve de colchom amortiguador de todo tipo de violaçons de direitos humanos e de submetimento da sociedade.

Também quero sulinhar o tipo de relaçons humanas que muitas vezes producem estas práticas políticas violentas, ao menos esta é a minha experiencia. A desconfianza entre companheiros e companheiras, as acusaçons e a mania perseguitoria instala-se nas relaçons e na vida cotia. A vinganza e o castigo asumen-se como metodologia. Nom quero dizer com isto que nom sejam práticas que estejam instaladas também nos movimentos socais ou na vida privada, porque fam parte da ideologia dominante e som parte inseparável da existencia dos modelos de estado que conhecemos, mas, como acontece nesse caso, ao estar a violência legitimada, as consequencias sobre as pessoas som terríveis, pensemos em consignas como “castigo aos colaboracionistas” e “um estado forte, temido polos nossos inimigos”. Neste caso, a pena de morte é ao estado de Texas, como estas actitudes e práticas som ás pessoas que nos erigimos num momento dado em elites pretendidamente revolucionárias.

É certo que a violência tem a sua raiz e o seu alimento nas desigualdades, mas nom é menos certo que a violência cria também desigualdades. As bombas som altofalantes de muita poténcia, fam escuitar a sua voz independentemente da importancia real ou numérica de quem as pom, do seu peso social. Som linguages de poder, nom dum poder popular, compartido e construido desde maiorias sociais conseguidas na participaçom e inclussom de minorias e maiorias diversas em proxectos comuns, senom o poder da violência justificada por ideologia e legitimándose na injustiça e opressom que produz o poder dominante. Pôr o destino dum povo, um proxecto político, nas maos dumhas poucas pessoas que convivem coa ideia de morrer, que decidem sobre a vida ou a morte de outras, é contradictório com a construcçom dum pais livre e umha sociedade feliz, que aposta pola vida e o desenvolvemento humano e do medio natural. Temos experiencias recentes e conhecimento de quanto tenhem que passar outras sociedades que vivem ou vivirom situaçons de guerra ou processos políticos armados, para conseguir procesos de negociaçom e avanço político. E estou a falar de sociedades onde a práctica armada contava ou conta com um respaldo social amplo!!! No caso da Galiza, esse respaldo, nem existiu nem existe. Pretende-se criar polo método da coacçom e o medo?
Nom é certo que exista um só caminho para conseguir objectivos políticos por muito legitimos que estes sejam. E se só existira o da violência, haveria que inventa-los. Tem Catalunya menos conciência nacional por carecer de organizaçons que practiquem a violência política? É umha sociedade menos articulada em quanto a redes e organizaçons sociais? É Quebec umha sociedade menos desenvolvida em quanto a procesos de autodeterminaçom? Em que espelhos nos olhamos?

Preocupa-me a situaçom das pessoas detidas, mas tenho que dizer que estou aliviada por nom ter que estar sofrendo pola morte ou feridas das pessoas que puiderom ser vítimas da bomba posta no caixeiro.Também que as pesoas e as organizaçons temos que asumir a responsabilidade que emana das nossas acçons ao longo das nossas vidas. E quem nom tem responsabilidade? Por que teria que sentir-se afectada? Porque tudo isto afecta-nos, nom só como pessoas que empatizamos com o sofrimento humano, senom que nos afecta directamente porque está feito no nome da libertaçom do nosso país, da nossa dignidade como povo.

Por favor, parade isto!

Temos neste país umha quota já demasiado elevada de mortes e sofrimento sem necessidade de criar mais: accidentes e enfermidades laborais; accidentes de tránsito; violência de género... por certo a última vítima, umha nena de dous anos no concelho de Narom que tivo umha morte terrível! De verdade alguém pensa que tudo isto amanha-se a bombazos? É tam despreciável o movemento político e social do nosso país, (sindicatos, partidos e organizaçons políticas, movimento ecologista, redes feministas, movimentos pola soberania alimentária e o comércio justo, de educaçom para a paz, medios de comunicaçom alternativos, movimentos de acçom cultural, movimentos de defessa da lingua, espaços alternativos, de defessa dos direitos das pessoas presas, polos direitos civís, as liberdades sexuais, da saúde, das pessoas imigrantes...), dá tam pouca confianza que nom pague a pena gastar as nossas vidas, o nosso dinheiro, as nossas ideias em alimenta-los, desenvolve-los, melhora-los para construir um futuro melhor para este povo? Agardo que a minha experiência e a de muita outra gente valga para algo e que este escrito nom seja utilizado por quem nom quere solucionar os problemas senom potencialos em contra do nosso país.

Lupe Ces, 27-07-2005
_______________________________

Logos GNU-Linux

2005-07-01T09:22:00.001+02:00